ଢାକା: ବାଂଲାଦେଶରେ ସାମ୍ପ୍ରଦାୟିକ ହିଂସା ମାମଲା କ୍ରମାଗତ ଭାବେ ସାମ୍ନାକୁ ଆସୁଛି । ଅକ୍ଟୋବର ୧୩ ତାରିଖରେ ହିନ୍ଦୁ ଧର୍ମର ମୁଖ୍ୟ ପର୍ବ ଦୁର୍ଗା ପୂଜାରୁ ଆରମ୍ଭ ହୋଇଥିବା ହିଂସା ଥମିବାର ନାଁ ଧରୁନି । ବାଂଲାଦେଶର କୋମିଲ୍ଲା ଠାରେ ଦୁର୍ଗା ପୂଜା ପେଣ୍ଡାଲ ଉପରେ ଆକ୍ରମଣ ପରେ ରବିବାର ଦିନ ରଙ୍ଗପୁରର ଉପଜିଲ୍ଲାରେ ଥିବା ହିନ୍ଦୁମାନଙ୍କ ଘରେ ନିଆଁ ଲଗାଇବା ମାମଲା ସାମ୍ନାକୁ ଆସିଛି । ବାଂଲାଦେଶର ମିଡିଆ ହାଉସ୍ ଢ଼ାକା ଟ୍ରିବ୍ୟୁନର ରିପୋର୍ଟ ଅନୁଯାୟୀ, ଏହି ଘଟଣା ପୀରଗଞ୍ଜର ରାମନାଥପୁର ୟୁନିଅନର ମାଝିପାରା ଜେଲପୋଲିରେ ଘଟିଛି । ଖବର ଅନୁଯାୟୀ, କେତେକ ଉଗ୍ରବାଦୀ ହିନ୍ଦୁଙ୍କ ୨୦ଟି ଘର ପୋଡି ଦେଇଥିଲେ, କିନ୍ତୁ ସ୍ଥାନୀୟ ସଂଗଠନର ସଭାପତିଙ୍କ ଅନୁଯାୟୀ ଦୁର୍ବୃତ୍ତମାନେ ୬୫ଟି ଘରେ ନିଆଁ ଲଗାଇ ଦେଇଛନ୍ତି ।
ସୋସିଆଲ ମିଡିଆ ପୋଷ୍ଟକୁ ନେଇ ପୁଣି ହିଂସା ହୋଇଥିବା ସୂଚନା
ପୋଲିସର ସୂଚନାନୁସାରେ, ଏହି ମାମଲା ସୋସିଆଲ ମିଡିଆ ପୋଷ୍ଟ ସହିତ ମଧ୍ୟ ଜଡିତ ଏବଂ ଜଣେ ହିନ୍ଦୁ ବ୍ୟକ୍ତିଙ୍କ ଫେସବୁକରେ ଆପତ୍ତିଜନକ ପୋଷ୍ଟ ପରେ ହିଁ ଉତ୍ତେଜନା ଦେଖାଦେଇଥିଲା । ପୋଲିସ ଘଟଣାସ୍ଥଳରେ ପହଞ୍ଚି ଏହି ଯୁବକଙ୍କୁ ସୁରକ୍ଷା ଯୋଗାଇ ଦେଇଥିଲା ଏବଂ ତାଙ୍କ ଘରକୁ ସୁରକ୍ଷିତ ରଖିଥିଲା, କିନ୍ତୁ ଦୁର୍ବୃତ୍ତ ମାନେ ଉକ୍ତ ସ୍ଥାନରେ ନିକଟସ୍ଥ ଘରେ ନିଆଁ ଲଗାଇ ଦେଇଥିଲେ। ଢାକା ଟ୍ରିବ୍ୟୁନର ସଭାପତି ମହମ୍ମଦ ସାଡକୁଲ ଇସଲାମଙ୍କ ଅନୁଯାୟୀ ଏହି ଦୁର୍ବୃତ୍ତମାନେ ଜମାତ-ଇ-ଇସଲାମୀର ସ୍ଥାନୀୟ ୟୁନିଟ୍ ଏବଂ ଛାତ୍ର ୱିଙ୍ଗ୍ ଇସଲାମିକ୍ ଛାତ୍ର ଶିବିରର ଥିଲେ।
ସୋସିଆଲ ମିଡିଆରେ ମଧ୍ୟ କିଛି ଭିଡିଓ ମଧ୍ୟ ସାମ୍ନାକୁ ଆସିଛି ଯାହା ପୀରଗଞ୍ଜର ବୋଲି ଦାବି କରାଯାଉଛି । ଭିଡିଓରେ ଗାଁର ଘର ଜଳୁଥିବା ଦେଖିବାକୁ ମିଳିଛି ଏବଂ ଆକ୍ରମଣକାରୀଙ୍କ ସହ ପୋଲିସ ସଂଘର୍ଷ କରୁଛି । ଅଗ୍ନିକାଣ୍ଡ ପରେ ତୁରନ୍ତ ପୋଲିସ ଏବଂ ଆକ୍ରମଣକାରୀଙ୍କ ମଧ୍ୟରେ ସଂଘର୍ଷ ଏବଂ ଗୁଳି ବିନିମୟ ମଧ୍ୟ ଦେଖିବାକୁ ମିଳିଥିଲା । ତେବେ ଢାକା ଟ୍ରିବ୍ୟୁନ୍ ଏହି ଭିଡିଓଗୁଡିକର ସତ୍ୟତାକୁ ନିଶ୍ଚିତ କରି ନାହିଁ ।
ସୂଚନା ଅନୁଯାୟୀ ବାଂଲାଦେଶର କୋମିଲ୍ଲା ଜିଲ୍ଳାରେ ଦୁର୍ଗାପୂଜା ସମାରୋହ ବେଳେ ପେଣ୍ଡାଲରେ ଭଙ୍ଗାରୁଜା ଓ ହିନ୍ଦୁ ମନ୍ଦିର ଉପରେ ଆକ୍ରମଣ ଘଟଣାର ନିନ୍ଦା କରିଛନ୍ତି ପ୍ରଧାନମନ୍ତ୍ରୀ ଶେଖ ହାସିନା । ଏହି ଆକ୍ରମଣରେ ସାମିଲ ହୋଇଥିବା ବ୍ୟକ୍ତି ଯେକୌଣସି ଧର୍ମ କିମ୍ବା ଜାତିର ହୋଇଥିଲେବି କଦାପି କ୍ଷମା ଦିଆଯିବନି ବୋଲି ଚେତାବନୀ ଦେଇଛନ୍ତି ସେ ।
ବିବିସି ବଙ୍ଗଳାର ଏକ ରିପୋର୍ଟ ଅନୁଯାୟୀ, ଭାରତରେ ଏଭଳି କିଛି ନହେବା ଉଚିତ୍ ଯାହାର ପ୍ରଭାବ ବାଂଲାଦେଶ ଉପରେ ପଡିବ । କିମ୍ବା ଏଠାକାର ହିନ୍ଦୁମାନଙ୍କ ଉପରେ ପଡିବ । ବାଂଲାଦେଶର ଚାନ୍ଦିପରୁ ସ୍ଥିତ ହାଜିଗଞ୍ଜ ଉପଜିଲାରେ ବୁଧବାର ଦିନ ଦୁର୍ଗା ପୂଜା ସମାରୋହ ବେଳେ ସାମ୍ପ୍ରଦାୟିକ ହିଂସାରେ ୩ ଜଣଙ୍କର ମୃତ୍ୟୁ ହୋଇଥିଲା । ଆଉ ୬୦ରୁ ଅଧିକ ଆହତ ହୋଇଥିଲେ । ଏକ ଫେସବୁକ୍ ପୋଷ୍ଟରେ କୋରାନକୁ ଅପମାନ କରାଯାଇଥିବା ଦର୍ଶାଇ ହିଂସା ହୋଇଥିଲା । ଯାହା ପରେ ଅନେକ ଦୁର୍ଗା ପେଣ୍ଡାଲରେ ଭଙ୍ଗାରୁଜା କରାଯାଇଥିଲା ।
ପ୍ରଧାନମନ୍ତ୍ରୀ ହସିନା ଏକ ଭିଡିଓ କନଫରେନ୍ସି ଜରିଆରେ ଢାକାର ଢାକେଶ୍ୱରି ଜାତୀୟ ମନ୍ଦିରରେ ଆୟୋଜିତ କାର୍ଯ୍ୟକ୍ରମରେ ଯୋଡି ହୋଇଥିଲେ । ଏହି ଅବସରରେ ସମ୍ବୋଧନ ଦେଇ ସେ କହିଥିଲେ, କାମିଲ୍ଲା ଜିଲ୍ଲାରେ ହୋଇଥିବା ଘଟଣାର ଯାଞ୍ଚ କରାଯାଉଛି । ହିନ୍ଦୁ ମନ୍ଦିର ଓ ଦୁର୍ଗା ପୂଜା ମଣ୍ଡପ ଉପରେ ଯିଏଭି ଆକ୍ରମଣ କରିଛନ୍ତି ତାକୁ ଛଡା ଯିବନାହିଁ ।
