କଂଗ୍ରେସର ବନ୍ଦ ପାଳନ; ଦୋକାନ ବଜାର ଖୋଲା ଓ ସ୍ବାଭାବିକ ରହିଛି ଗାଡି ଚଳାଚଳ

ଭୁବନେଶ୍ୱର: ଆଜି ୬ ଘଣ୍ଟିଆ ହରତାଳ କରୁଛି କଂଗ୍ରେସ। କିନ୍ତୁ ଏହି ସମୟରେ କୋର୍ଟଙ୍କ ନିର୍ଦ୍ଦେଶର ଉଲ୍ଲଂଘନ ହେଲେ ନିଆଯିବ କାର୍ଯ୍ୟାନୁଷ୍ଠାନ। ଓଡ଼ିଶା ବନ୍ଦ କରିବାକୁ କହିଥିଲା କଂଗ୍ରେସ। କିନ୍ତୁ ବନ୍ଦ ପାଳନକୁ ନେଇ ନକାରାତ୍ମକ ବାଣି ଶୁଣାଇଥିଲେ ହାଇକୋର୍ଟ।

ବନ୍ଦ ପାଳନକୁ ନେଇ ହାଇକୋର୍ଟ କହିଥିଲେ ଯେ, ରାଜନୈତିକ ଦଳ ବିକ୍ଷୋଭ ପ୍ରଦର୍ଶନ କରିପାରିବେ, କିନ୍ତୁ କାହାର ବ୍ୟକ୍ତିଗତ ସ୍ବାଧୀନତା ଛଡ଼ାଇ ନେଇ ପାରିବେ ନାହିଁ। ଅଖଚକ ବନ୍ଦ କରିବା ମଧ୍ୟ ବେଆଇନ। ହରତାଳ ବେଳେ ରାସ୍ତାରେ କୌଣସି ଗାଡ଼ିମୋଟର ଜବରଦସ୍ତ ଅଟକାଇ ପାରିବେନି ଆନ୍ଦୋଳନକାରୀ । ରେଳ ଓ ବିମାନ ଯାତ୍ରା ବନ୍ଦ କରିପାରିବେନି ।

କୌଣସି ବ୍ୟବସାୟିକ ପ୍ରତିଷ୍ଠାନକୁ ଜୋର ଜବରଦସ୍ତ ବନ୍ଦ କରାଯାଇ ପାରିବନି ବୋଲି ହାଇକୋର୍ଟ କହିଥିଲେ । ବିକ୍ଷୋଭ ପ୍ରଦର୍ଶନ ସମୟରେ ଯଦି କୌଣସି ସ୍ଥାନରେ ବଳପୂର୍ବକ ଦୋକାନ ବଜାର, ପରିବହନ ମାଧ୍ୟମକୁ ବନ୍ଦ କରିବାକୁ କଂଗ୍ରେସ କର୍ମୀ ଚେଷ୍ଟା କରନ୍ତି, ତେବେ ପୋଲିସ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।

ଏହାକୁ ଦୃଷ୍ଟିରେ ରଖି ଶାନ୍ତିଶୃଙ୍ଖଳା ରକ୍ଷା ପାଇଁ ଟ୍ବିନ ସିଟିରେ ମୁତୟନ ହୋଇଛନ୍ତି ୩୫ ପ୍ଲାଟୁନ୍ ଫୋର୍ସ । ଭୁବନେଶ୍ବରରେ ୨୦ ପ୍ଲାଟୁନ ଫୋର୍ସ ମୁତୟନ ହୋଇଛନ୍ତି । ୩୦ଜଣ ଇନ୍ସପେକ୍ଟର, ୪୫ ଜଣ ସବ ଇନ୍ସପେକ୍ଟର ଏବଂ ଏଏସଆଇ, ୧୫ ଜଣ ଡିଏସପି, ୫ଜଣ ଏସିପି ଓ ଡିସିପି ରାଙ୍କର ଅଫିସର ନିୟୋଜିତ ହୋଇଛନ୍ତି । ସାଧାରଣ ଲୋକଙ୍କୁ ହଇରାଣ କରାଗଲେ ୧୧୨କୁ କଲ୍ କରି ଜଣାଇବାକୁ ପୋଲିସ ପକ୍ଷରୁ ସୂଚନା ଦିଆଯାଇଛି ।