ନନ୍ଦିଘୋଷ ବ୍ୟୁରୋ : ରୋଜଗାର ଦେଉଛି ବାଉଁଶ କରଡ଼ି। ବର୍ଷା ଦିନେ ଆଦିବାସୀଙ୍କ ପାଲଟିଛି ଜୀବନଜୀବିକା। ବଜାରରେ କରଡ଼ିର ରହିଛି ଢେର ଚାହିଦା। ବାଉଁଶ ମୂଳରୁ କଅଁଳ ଗଜା ଭାବେ ବାହାରେ ‘କରଡ଼ି’। ଏହାର ସ୍ୱାଦ ବେଶ ନିଆରା। ଜଙ୍ଗଲଜାତ ଏହି ଦ୍ରବ୍ୟର ଚାହିଦା ପଶ୍ଚିମ ଓଡ଼ିଶାର ବିଭିନ୍ନ ଜିଲ୍ଲାରେ ବେଶ ଅଧିକ। ହେଲେ ବର୍ତ୍ତମାନ କଳାହାଣ୍ଡି ଜିଲ୍ଲାର ବିଭିନ୍ନ ବଜାରରେ ବାଉଁଶ କରଡ଼ିର ବେଶ ଚାହିଦା ରହିଛି। ଘଞ୍ଚ ଜଙ୍ଗଲରୁ କରଡ଼ିକୁ ଆଣି ଛୋଟ ଛୋଟ ଖଣ୍ଡ କରି ବଜାରରେ ବିକ୍ରି କରି ଭଲ ଦୁଇ ପଇସା ରୋଜଗାର କରୁଛନ୍ତି ଆଦିବାସୀ ପରିବାର। କରଡ଼ି ପଶ୍ଚିମ ଓଡ଼ିଶା ସଂସ୍କୃତି ଓ ପରମ୍ପରାର ଅବିଚ୍ଛେଦ୍ୟ ଅଙ୍ଗ। କରଡ଼ି ସ୍ୱାସ୍ଥ୍ୟ ପାଇଁ ବେଶ ହିତକର। ମଧୁମେହ ଓ ହୃଦରୋଗୀଙ୍କ ପାଇଁ ବହୁ ଉପକାରୀ। କରଡ଼ିରୁ ମୁଖ୍ୟତଃ ବେସର ତରକାରୀ, ଆମ୍ବିଳ, ଭଜା, ଚିପ୍ସ ସହ ଆଚାର ଓ ଚଟଣୀ ଭଳି ୪୦ରୁ ଊର୍ଦ୍ଧ୍ୱ ପ୍ରକାରର ଖାଦ୍ୟ ପ୍ରସ୍ତୁତ ହୋଇଥାଏ। ବର୍ଷର କେବଳ ୩ ମାସ ଏହା ମିଳୁଥିବା ଯୋଗୁଁ ଲୋକେ କରଡ଼ି କିଣିବାକୁ ଆଗ୍ରହର ସହିତ ଅପେକ୍ଷା କରିଥାନ୍ତି।
