କରୋନା ପାଇଁ ଏବେ ଅଦରକାରୀ ବାଉଁଶରେ ତିଆରି ସୁନ୍ଦର ସୁନ୍ଦର ଘର ସଜ୍ଜା ସାମଗ୍ରୀ
ବାଲେଶ୍ୱର: କରୋନା ଉଜାଡ଼ି ଦେଇଛି ଅନେକଙ୍କ ଜୀବନ ଜୀବିକା । ୬ ମାସ ଧରି କଟକଣା ଲାଗିବା ଫଳରେ ବହୁ କାରିଗର ହାତ ବାନ୍ଧି ବସି ରହିଛନ୍ତି । ବିକ୍ରିବଟା ନଥିବାରୁ କର୍ମଚାରୀଙ୍କୁ ଦରମା ଦେବା ତ ଦୂରର କଥା ନିଜର ଚଳିବା ବି କଷ୍ଟକର ହୋଇ ପଡିଛି । ବାଉଁଶରେ ସୁନ୍ଦର ସୁନ୍ଦର ଅଳଙ୍କାର । ଗଦା ହୋଇ ରହିଛି ଘର ସଜ୍ଜା ସାମଗ୍ରୀ । ହେଲେ ସବୁ ଗୁଡାକ ଯେପରି ଅଦରକାରୀ । କାରିଗରର ଏହିସବୁ ସୁନ୍ଦର କାରିଗରୀ ଏବେ ଅଲୋଡା ।
କରୋନା କଟକଣା ଯୋଗୁଁ ବିକ୍ରିବଟା ବନ୍ଦ । ଯିଏ ବହିଣା ଦେଇଥିଲେ ସେମାନେ ବି ଫେରାଇ ନେଉଛନ୍ତି । ତେଣୁ ଅଖା ଭିତରେ ବନ୍ଧା ହୋଇ ରହିଛି ସବୁ କଳାକୃତି । ଏବେ ହାତ ବାନ୍ଧି ବସିଛନ୍ତି ବାଲେଶ୍ୱର ଜିଲ୍ଲା ସିମୁଳିଆ ବ୍ଲକର ଜାମୁଝାଡି ଗାଁର ବାଉଁସ କଳାକୃତି ପ୍ରଶିକ୍ଷକ ସରୋଜିନୀ ଦାସ । କର୍ମଚାରୀ ଓ ଶ୍ରମିକଙ୍କୁ ଦରମା ଦେବା ତ ଦୂରର କଥା ନିଜେ ଚଳିବା କଷ୍ଟକର ଥିବାରୁ ବୃତ୍ତି ବଦଳାଇବାକୁ ଚିନ୍ତା କରୁଥିବା କହିଛନ୍ତି ।
ତ୍ରିପୁରାରେ ଶିକ୍ଷା ନେବା ପରେ ନିଜ ଉଦ୍ୟମରେ ବାଉଁଶ କାରିଗରୀ ଆରମ୍ଭ କରିଥିଲେ ସରୋଜିନୀ । ଜିଲ୍ଲା ତଥା ଜିଲ୍ଲା ବାହାର ଅନେକ ତାଙ୍କ ନିକଟରୁ ପ୍ରଶିକ୍ଷଣ ବି ନେଇଛନ୍ତି । ଅନେକଙ୍କୁ ରୋଜଗାରର ରାସ୍ତା ଦେଖାଇଛନ୍ତି । ଏଥିପାଇଁ ଅନେକ ସଂସ୍ଥା ପକ୍ଷରୁ ପୁରସ୍କୃତ ହୋଇଛନ୍ତି ସରୋଜିନୀ । ହେଲେ କରୋନା ଯୋଗୁଁ ମେଳା, ମହୋତ୍ସବ ବନ୍ଦ ରହିଥିବାରୁ ବିକ୍ରିବଟା ନାହିଁ ।
ଉତ୍କଳିକା ମାଧ୍ୟମରେ ରାଜ୍ୟ ସରକାର ସାମଗ୍ରୀ କ୍ରୟ କଲେ ଉପକୃତ ହୋଇପାରନ୍ତେ ବୋଲି କହିଛନ୍ତି । ରୋଜଗାର ହରାଇବା ପରେ କର୍ମଚାରୀଙ୍କୁ ଦରମା ଦେବାକୁ ମୁର୍ତ୍ତୀ କାରିଗରଙ୍କ ନିକଟରୁ ମୁର୍ତ୍ତୀ ଆଣି ପଲିସ କରି କଛି ରୋଜଗାର କରିବାକ ଚେଷ୍ଟା କରିଛନ୍ତି ସରୋଜିନୀ ।
