ମାଛ ଜାଲରେ ଲାଗିଲା ବାଲଟ୍ ବାକ୍ସ, ନିର୍ବାଚନରେ ଅନିୟମିତତା ସନ୍ଦେହ
ନୟାଗଡ଼: ମାଛ ଜାଲରେ ଲାଗିଲା ଭୋଟ ବାଲଟ୍ ବାକ୍ସ । ପୋଖରୀରୁ ମାଛ ଧରିବା ବେଳେ ମିଳିଲା ଭୋଟ ବାକ୍ସ । ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକ ଗୋତିସାହି ଗାଁ ନିକଟ ପୋଖରୀରୁ ମିଳିଛି ଏହି ବାକ୍ସ । ରଜତ ସ୍ୱାଇଁଙ୍କ ଚାଷ ଜମିରେ ଥିବା ପୋଖରୀରୁ ଜାଲ ପକାଇ ମାଛ ଧରିବା ବେଳେ ଏହି ବାକ୍ସ ଉଦ୍ଧାର କରାଯାଇଛି ।
ତେବେ ବାକ୍ସଟି ଖାଲି ଥିବା ଦେଖାଯାଇଛି । ହେଲେ ସବୁଠାରୁ ବଡ଼ ପ୍ରଶ୍ନ ହେଲା ଏଠାରୁ ଭୋଟ ବାକ୍ସ ଆସିଲା କେଉଁଠୁ ? ନିକଟ ଅତୀତରେ କୌଣସି ଭୋଟ ହୋଇନାହିଁ । ଗତ ସାଧାରଣ ନିର୍ବାଚନ ୨୦୧୯ ମସିହାରେ ହୋଇଥିଲା । ଏହା ପୂର୍ବରୁ ୨୦୧୭ରେ ସରପଞ୍ଚ ନିର୍ବାଚନ ହୋଇଥିଲା । ହେଲେ ଗତ ସାଧାରଣ ନିର୍ବାଚନ ବେଳେ ଗୋତିସାହି ଓ ଏହାର ଆଖପାଖ ଅଞ୍ଚଳରେ ଥିବା ବୁଥ୍ରେ କୌଣସି ବିଘଟନ ହୋଇଥିବା ଅଭିଯୋଗ ନାହିଁ । ହେଲେ ସରପଞ୍ଚ ନିର୍ବାଚନ ବେଳେ ସେ ଅଞ୍ଚଳରେ ସାମାନ୍ୟ ବିଶୃଙ୍ଖଳା ଦେଖା ଦେଇଥିଲା । ତେବେ କ’ଣ ୨୦୧୭ରୁ ଏହି ଭୋଟ୍ ବାକ୍ସ ପୋଖରୀରେ ପଡ଼ିଛି । ଆଉ ଭୋଟ ବାକ୍ସ ପଡ଼ିବା ଖବର କ’ଣ କେହି ଜାଣିପାରି ନାହନ୍ତି ? କିମ୍ବା ଏହି ଭୋଟ ବାକ୍ସ ଅନ୍ୟ କେଉଁ ସ୍ଥାନରୁ ଏଠାକୁ ଆଣି ଏହି ପୋଖରୀରେ ଫିଙ୍ଗାଯାଇଛି ?
ଏଭଳି ନାନା ପ୍ରଶ୍ନ ଏବେ ସ୍ଥାନୀୟ ଲୋକଙ୍କ ମନରେ ରହିଛି । ଏହି ଘଟଣା ନେଇ କୌଣସି ଉଚ୍ଚପଦସ୍ଥ ଅଧିକାରୀଙ୍କ ପ୍ରତିକ୍ରିୟା ମିଳିପାରି ନାହିଁ । ଉପଜିଲ୍ଲାପାଳଙ୍କୁ ଏନେଇ ପ୍ରଶ୍ନ କରାଯାଇଛି ହେଲେ ଏବେ ସୁଦ୍ଧା ସେ ଏନେଇ କୌଣସି ପ୍ରତିକ୍ରିୟ ଦେଇ ନାହାନ୍ତି ।
