ବାହାନଗା ଟ୍ରେନ୍ ଟ୍ରାଜେଡିରେ ୨୭୫ଜଣଙ୍କ ମୃତ୍ୟୁ ହୋଇଥିବା ବେଳେ ଏପର୍ଯ୍ୟନ୍ତ ପ୍ରାୟ ୨ଶହ ମୃତଦେହ ଚିହ୍ନଟ ହୋଇପାରିନି

ନନ୍ଦିଘୋଷ ବ୍ୟୁରୋ: ବାହାନଗା ଟ୍ରେନ୍ ଟ୍ରାଜେଡିରେ ୨୭୫ଜଣଙ୍କ ମୃତ୍ୟୁ ହୋଇଥିବା ବେଳେ ଏପର୍ଯ୍ୟନ୍ତ ପ୍ରାୟ ୨ଶହ ମୃତଦେହ ଚିହ୍ନଟ ହୋଇପାରିନି । ମୃତକଙ୍କ ମଧ୍ୟରେ ଅଧିକାଂଶ ପଶ୍ଚିମବଙ୍ଗ, ଝାଡ଼ଖଣ୍ଡ, ତାମିଲନାଡୁ ଓ ଆନ୍ଧ୍ରପ୍ରଦେଶର। ସେମାନଙ୍କ ସଂପର୍କିତ ତଥ୍ୟ ଏସଆରସି ଏବଂ ସୂଚନା ଓ ଲୋକସଂପର୍କ ବିଭାଗର ଓ୍ବେବସାଇଟରେ ରହିଛି। ଦୁର୍ଘଟଣାରେ ମୃତ ବ୍ୟକ୍ତିଙ୍କ ଫଟୋ ଓ୍ବେବସାଇଟରେ ଅପଲୋଡ୍ କରାଯାଇଛି । srcodisha.nic.in, bmc.gov.in ଏବଂ osdma.org ଓ୍ବେବସାଇଟରେ ମୃତକଙ୍କୁ ଚିହ୍ନଟ କରିପାରିବେ ପରିବାର ଲୋକ ।

ସର୍ବାଧିକ ୭୨ଘଣ୍ଟା ପର୍ଯ୍ୟନ୍ତ ମୃତଦେହ ରଖା ଯାଇପାରିବ। ତେବେ ଶବ ଚିହ୍ନଟ ପାଇଁ ସଂପର୍କୀୟଙ୍କୁ ଅଧିକ ସମୟ ଦେବାକୁ ମୃତଦେହକୁ ଆଉ କିଛି ଦିନ ରଖିବାକୁ ବ୍ୟବସ୍ଥା କରାଯାଉଛି। ଶବକୁ ଅଧିକ ଦିନ ରଖିବାକୁ ସ୍ପେଶାଲ ଫରେନସିକ୍ ଟିମର ସହାୟତା ନିଆଯାଉଛି। ଦିଲ୍ଲୀ ଏମସରୁ ସ୍ବତନ୍ତ୍ର ଟିମ୍ ଆସି ଓଡ଼ିଶାରେ ପହଞ୍ଚିଛି। ସେମାନଙ୍କୁ ରାଜ୍ୟ ଫରେନସିକ୍ ଟିମ୍ ସହାୟତା କରିବ । ମୃତଦେହ ଚିହ୍ନଟ ପାଇଁ ମୃତକଙ୍କ ସମ୍ପର୍କୀୟଙ୍କୁ ରାଜ୍ୟ ସରକାର ଅନୁରୋଧ କରିଛନ୍ତି ।

18003450061 ଟ୍ରୋଲ ଫ୍ରି ନମ୍ବର ଜାରି କରାଯାଇଛି। ମୃତଦେହ ଚିହ୍ନଟ ପାଇଁ ପରିବାର ଲୋକ ଏହି ନମ୍ବରରେ କଲ କରିପାରିବେ। ଅଫିସର ସେମାନଙ୍କୁ ସାହାଯ୍ୟ କରିବେ। ସେମାନଙ୍କୁ କୌଣସି ଅସୁବିଧା ହେବ ନାହିଁ। କେବଳ ଓଡ଼ିଶା ଲୋକଙ୍କ ପାଇଁ ଟୋଲ୍ ଫ୍ରି ନମ୍ବର 1929 ରହିଛି । ରାଜ୍ୟ ସରକାରଙ୍କ ଖର୍ଚ୍ଚରେ ମୃତଦେହକୁ ସେମାନଙ୍କ ଗାଁକୁ ପଠାଯିବ । ବିଭିନ୍ନ ହସପିଟାଲରେ ଚିକିତ୍ସାଧୀନ ଆହତ ବ୍ୟକ୍ତିଙ୍କ ତାଲିକା ମଧ୍ୟ ଓ୍ବେବସାଇଟରେ ରହିଛି ।