ଭତ୍ତା ଟଙ୍କା ପାଇଁ ରାସ୍ତାରେ ଗୁରୁଣ୍ଡି ଗୁରୁଣ୍ଡି ଗଲେ ବୃଦ୍ଧା

ବଲାଙ୍ଗୀର : ଭତ୍ତା ଟଙ୍କା ପାଇଁ ରାସ୍ତାରେ ଗୁରୁଣ୍ଡି ଗୁରୁଣ୍ଡି ଗଲେ ବୃଦ୍ଧା । ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି ବଲାଙ୍ଗୀର ଜିଲ୍ଲା ପାଟଣାଗଡ ବ୍ଲକ ଫଟାମୁଣ୍ଡା ପଂଚାୟତର ପାଣ୍ଡେସରା ଗାଁରେ । ଏହି ଗାଁର ଜଣେ ଭିନ୍ନକ୍ଷମ ବୟସ୍କା ସୁରେଖା ନାଗ ଭତ୍ତା ପାଇଁ ଗୁରୁଣ୍ଡି ଗୁରୁଣ୍ଡି ଯାଉଥିବାର ଭିଜୁଆଲ ଭାଇରାଲ ହେବାରେ ଲାଗିଛି । କିଛି ବର୍ଷ ପୂର୍ବେ ଏହି ମହିଳାଙ୍କ ସ୍ବାମୀଙ୍କ ମୃତ୍ୟୁ ହୋଇଥିବା ବେଳେ ସାହାଯ୍ୟ କରିବା ପାଇଁ ପରିବାରରେ କେହି ନାହାନ୍ତି । ତାଙ୍କ ପାଖରେ ପଇସା ନଥିବାରୁ ଭତ୍ତା ଟଙ୍କା ଉଠାଣ ପାଇଁ ୨ କିମି କୁଡାପଦାର ଗାଁକୁ ଗୁରୁଣ୍ଡି ଗୁରୁଣ୍ଡି ଯାଇଥିଲେ । ଏହାଦେଖି ଯୁବ ସମାଜସେବୀ କରୁଣା କର ମିଶ୍ର ତାଙ୍କୁ ଟ୍ରାକ୍ଟରରେ ବସାଇ ଘରେ ପହଞ୍ଚାଇଥିଲେ । ଏଭଳି ଭିନ୍ନକ୍ଷମ ବୃଦ୍ଧାଙ୍କ ନିକଟରେ ସରକାର ଭତ୍ତାଟଙ୍କା ପହଞ୍ଚାଇବାର ନିୟମ ରହିଛି । ହେଲେ ଖୋଦ ଉପମୁଖ୍ୟମନ୍ତ୍ରୀଙ୍କ ଅଞ୍ଚଳରେ ଏଭଳି ଘଟଣାକୁ ନିନ୍ଦା କରାଯାଇଛି । ଏନେଇ ଉଚ୍ଚସ୍ତରୀୟ ତଦନ୍ତ ପାଇଁ ଅଞ୍ଚଳବାସୀ ଦାବି କରିଛନ୍ତି । ଘଟଣାକୁ ନେଇ ପ୍ରଶାସନିକ ଅଧିକାରୀଙ୍କ କୋଣସି ପ୍ରତିକ୍ରିୟା ମିଳିପାରିନି l