ମାମଲା ଦୁର୍ବଳ କରିବାକୁ ଲାଞ୍ଚ ନେଉଥିଲେ ପୋଲିସ ବାବୁ ! ଯୋଜନା ମୁତାବକ ଧରିଲା ଭିଜିଲାନ୍ସ

ବଲାଙ୍ଗିର: ଭିଜିଲାନ୍ସ ଜାଲରେ ଧରାପଡ଼ିଲେ ପୋଲିସ ବାବୁ । ଟଙ୍କା ନେଉଥିବା ବେଳେ ଭିଜିଲାନ୍ସ ଜାଲରେ ଛନ୍ଦି ହେଲେ ସବ୍-ଇନିସ୍ପେକ୍ଟର । କାର୍ଯ୍ୟରେ ଅବହେଳା କରିବାକୁ ୧୦ହଜାର ଟଙ୍କା ନେଉଥିବା ବେଳେ ଧରିଲା ଭିଜିଲାନ୍ସ । ଟଙ୍କା ନେଇ ଅଭିଯୁକ୍ତକୁ ଖସାଇ ଦେବା ପ୍ଲାନ୍ ଫେଲ ମାରିଲା ଶେଷରେ ଧରା ହେଲେ ପୋଲିସ ବାବୁ ।

ଘଟଣାଟି ହେଉଛି ବଲାଙ୍ଗିର ଜିଲ୍ଲା ମୁରିବାହାଲ ଥାନାର । ଥାନାରେ କର୍ଯ୍ୟରତ ଥିବା ସମୟରେ ସବଇନିସ୍ପେକ୍ଟର ୧୦ ହଜାର ଟଙ୍କା ଲାଞ୍ଚ ନେବା ବେଳେ ଗିରଫ କରିଛି ବଲାଙ୍ଗିର ଭିଜିଲାନ୍ସ । ଗିରଫ ସବଇନିସ୍ପେକ୍ଟର ହେଉଛନ୍ତି  ସରୋଜ ରଥ । ସୂଚନା ଅନୁସାରେ, ଗତ ୨୦୧୯ ମସିହାରେ  ମୁରୁବାହାଲ ଥାନା ଖରବାହାଲି, ଗୁଡିଘାଟ ଗାଁର ସଂଜୀବ ପ୍ରଧାନ ନାମକ ଜଣେ ବ୍ୟକ୍ତିଙ୍କ ବିରୁଦ୍ଧରେ ଜଣେ ମହିଳା ଏତଲା ଦେଇଥିଲେ । ଏହି ମାମଲାର ଚାର୍ଜସିଟକୁ ହାଲୁକା ଭାବେ ଲେଖିବାକୁ ଥାନାର ସବଇନିସ୍ପେକ୍ଟର ସରୋଜ ରଥ ଆଜି ୧୦ ହଜାର ଟଙ୍କା ଲାଞ୍ଚ ନେଉଥିଲେ ।

ଏହି ସମୟରେ ଯୋଜନା ମୁତାବକ ବଲାଙ୍ଗିର ଭିଜିଲାନ୍ସ ଡିଏସପି କାଦମ୍ବିନୀ ସାମଲଙ୍କ ନେତ୍ରୁତ୍ୱରେ ଭିଜିଲାନ୍ସ ଟିମ୍ ଚଢାଉ କରି ଅଭିଯୁକ୍ତ ପୋଲିସ ଅଧିକାରୀଙ୍କୁ ଗିରଫ କରିଛି । ରସାୟନ ପ୍ରଲେପ ବୋଳା ୧୦ ହଜାର ଟଙ୍କାକୁ ମଧ୍ୟ ଭିଜିଲାନ୍ସ ତାଙ୍କ ନିକଟରୁ ଜବତ କରିଛି । ଏହି ଚଢ଼ାଉରେ ବଲାଙ୍ଗୀର ଟିମ ସମେତ ସମ୍ବଲପୁର ଓ ବରଗଡ ଟିମ୍ ସାମିଲ ଥିଲେ ।