ବଲାଙ୍ଗୀର ଜିଲ୍ଲାରେ ରହିଛି ମାଳମାଳ ସମସ୍ୟା, ଅନୁଦାନ ଘୋଷଣା କରିବାକୁ ଦାବି !

ବଲାଙ୍ଗୀର  : ବଲାଙ୍ଗୀର ଜିଲ୍ଲାରେ ସମସ୍ଯା ମାଳମାଳ । ଜଳସେଚନ ହାର ମାତ୍ର ୩ ପ୍ରତିଶତ । ଆଗେଇ ପାରୁନି ଜିଲ୍ଲାର ସୁକତେଲ ପ୍ରକଳ୍ପ କାମ । ୬ ମାସହେଲେ ଶୁଖିଲା ରହିଛି ନଦୀନାଳ । ପୂର୍ବ ସରକାରଙ୍କ ସମୟରେ ୬ ଟି ଭୂତଳ ଜଳ ପ୍ରକଳ୍ପ ଆରମ୍ଭ କରାଯାଇଥିଲା I କିନ୍ତୁ ସରକାର ବଦଳିବା ପରେ ପ୍ରକଳ୍ପ ଗୁଡିକୁ ବାତିଲ କରିଦିଆଗଲା I ଦେଓଗାଁ ଓ ଆଗଲପୁର ଅଞ୍ଚଳରେ ମଧ୍ଯ ଭୂତଳ ଜଳ ପ୍ରକଳ୍ପ ବନ୍ଦ ରହିଛି । ନବୀନ ସରକାରଙ୍କ ସମୟରେ ୫ ଟି ପାନୀୟଜଳ ଯୋଗାଣ ପ୍ରକଳ୍ପ ହାତକୁ ନିଆଯାଇଥିଲା I ଟେଣ୍ଡର ପ୍ରକ୍ରିୟା ପରେ କେତେକ କମ୍ପାନୀ କାମ କରୁଛନ୍ତି I ଜଳଜୀବନ ମିଶନ ଯୋଜନାରେ ପୂର୍ବ ସରକାର ୫୦ ପ୍ରତିଶତ ଅନୁଦାନ ଦେଇଥିବାବେଳେ ଟଙ୍କାଟିଏ ଦେଇନାହିଁ କେନ୍ଦ୍ର । ଏସବୁ ଭିତରେ ଆସନ୍ତାକାଲି ବଲାଙ୍ଗୀର ଗସ୍ତରେ ଆସୁଛନ୍ତି ମୁଖ୍ଯମନ୍ତ୍ରୀ । ବିଜେପି ସରକାରକୁ ଆସିବା ପୂର୍ବରୁ ଅନେକ ପ୍ରତିଶ୍ରୁତି ଦେଇଥିଲା । ହେଲେ ଏବେ ଜିଲ୍ଲାରେ ସମସ୍ଯା ବଢିଥିବାରୁ ତୁରନ୍ତ ଅନୁଦାନ ଘୋଷଣା କରିବାକୁ ଦାବି କରିବ ଜିଲ୍ଲା ଉନ୍ନୟନ ପରିଷଦ ।

ଜିଲ୍ଲାର ଏକମାତ୍ର ଚିନି କାରଖାନା ବନ୍ଦ ହୋଇପଡିଛି I ସରକାରକୁ ଆସିଲେ କାରଖାନାର ପୁନଃରୁଦ୍ଧାର ସହ ଚାଲୁ କରିବା ପାଇଁ ପ୍ରତିଶ୍ରୁତି ଦେଇଥିଲା ବିଜେପି । ସରକାରକୁ ଆସିବାର ବର୍ଷେ ହେଲାଣି । କିନ୍ତୁ କାରଖାନା ଚାଲୁ କରିବାକୁ କୌଣସି ପଦକ୍ଷେପ ନିଆଯାଇ ନଥିବା ଅଭିଯୋଗ କରିଛି ଦେଓଗାଁ ଚିନିକଳ ସଂଘର୍ଷ ସମିତି । ଚିନିକଳ ବନ୍ଦ ଥିବାରୁ ବ୍ଲକର ୨୦ ହଜାର ଆଖୁ ଚାଷୀ ଓ ଶତାଧିକ କର୍ମଚାରୀ ଦୁର୍ଦ୍ଦିନରେ ଦିନ କାଟୁଛନ୍ତି I ତୁରନ୍ତ ଏଥିପାଇଁ ପଦକ୍ଷେପ ନନେଲେ ଆତ୍ମହୂତି ଦେବାକୁ ଚେତବନୀ ଦେଇଛନ୍ତି କର୍ମଚାରୀ I