ଲୋକସଭାରେ ବଲାଙ୍ଗିର ସାଂସଦ ସଙ୍ଗୀତା କାହିଁକି ଖାଇଲେ ମାଡ଼, କିଏ କଲା ରକ୍ଷା… ଜାଣନ୍ତୁ

ଦିଲ୍ଲୀ: ସଂସଦରେ ଅଭାବନୀୟ ଘଟଣା । ଲୋକସଭାରେ ବିଜେପିର ମହିଳା ସାଂସଦଙ୍କୁ ବିରୋଧୀ କଂଗ୍ରେସର ଦୁଇ ଜଣ ମହିଳା ସାଂସଦ ରାମ୍ୟା ହରିଦାସ ଓ ଜ୍ୟୋତିମଣି ଆକ୍ରମଣ କରିଥିବା ଅଭିଯୋଗ ହୋଇଛି । ଆକ୍ରମଣର ଶିକାର ହୋଇଛନ୍ତି ଓଡ଼ିଶାର ବଲାଙ୍ଗୀର ଲୋକସଭା ଆସନ ସଦସ୍ୟା ସଙ୍ଗୀତା ସିଂହଦେଓ ।

ହଠାତ୍‌ ବିରୋଧ ଦଳର ଦୁଇ ମହିଳା ସାଂସଦ ସଙ୍ଗୀତାଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । ସଙ୍ଗୀତା ଆହତ ହୋଇଛନ୍ତି । ମନ୍ତ୍ରୀ ସ୍ମୃତି ଇରାନୀଙ୍କ ହସ୍ତକ୍ଷେପ ଫଳରେ ସଙ୍ଗୀତା ରକ୍ଷା ପାଇଥିଲେ । ପରେ ସେ ଚିକିତ୍ସାଳୟକୁ ଯାଇ ପ୍ରାଥମିକ ଚିକିତ୍ସା କରାଇଛନ୍ତି । ମେଡିକାଲ ରିପୋର୍ଟ ସହିତ ଘଟଣା ସମ୍ପର୍କରେ ସଙ୍ଗୀତା ଲୋକସଭା ବାଚସ୍ପତିଙ୍କ ନିକଟରେ ଲିଖିତ ଅଭିଯୋଗ କରିବା ସହିତ ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି । ଗଣତନ୍ତ୍ରରେ ବିରୋଧ କରିବା ପାଇଁ ବିରୋଧୀଙ୍କର ଅଧିକାର ଅଛି । କିନ୍ତୁ ଗଣତନ୍ତ୍ରର ସର୍ବୋଚ୍ଚ ସଦନରେ ସାଂସଦଙ୍କୁ ସାଂସଦ ଆକ୍ରମଣ କରିବା ସବୁ ମହଲରେ ଭୃକୁଞ୍ଚନ ସୃଷ୍ଟି କରିଛି । ଏହି ଘଟଣାକୁ ସମସ୍ତେ ନିନ୍ଦା କରିଛନ୍ତି ।