ମିଡିଆକୁ ଢାଲ କରି କରୁଥିଲେ ଦୁର୍ନୀତି,ଏବେ ଯିଏ ସତ କହୁଛି ତାକୁ ବଦନାମ କରିବା ପାଇଁ କରୁଛନ୍ତି ଉଦ୍ୟମ

ଭୁବନେଶ୍ୱର: ବାହାମାସ୍ ମନି ଲଣ୍ଡ୍ରିଂ ମାମଲାରୁ ସାରୁଅ ଜମି ସ୍କାମ । ସ୍କାମ୍ ଖୋଲି ଦେଇଛି ମୁଖା । ଆମେ ରିପୋର୍ଟ କରୁ ଆପଣ ଡିସାଇଡ୍ କରନ୍ତି,ଟାଗ୍ ଲାଇନ ସହ ଖବର ଚଲାଉଥିବା ନ୍ୟୁଜ୍ ଚ୍ୟାନେଲ ଖବର କେମିତି ନିଜକୁ ସୁହାଇବ ତାକୁ ନେଇ ରିପୋର୍ଟ କରନ୍ତି । ମିଡିଆକୁ ବ୍ରହ୍ମାସ୍ତ୍ର କରି ନିଜ କଳା କାରନାମାକୁ ଲୁଚାଇ ଆସୁଥିବା ଚ୍ୟାନେଲ ଓ ଏହାର ପ୍ରମୋଟର ଏବେ ଗୋଟିଏ ପରେ ଗୋଟିଏ ମାମଲାରେ ଛନ୍ଦି ହୋଇ ବାଟବଣା ହେଲେଣି । ଲୋକଙ୍କ ସମ୍ମୁଖରେ ଅସଲ ମୁଖା ଖୋଲିବା ବିବ୍ରତ କଲାଣି । ତେଣୁ ସୁଟ୍ ଦ’ ମେସେଂଜର ନୀତିକୁ ଆପଣାଇଛି ଏହି ତଥାକଥିତ ନିରପେକ୍ଷ, ନିର୍ଭିକ ଚ୍ୟାନେଲ ଓ ଏହାର ୱେବ୍ ପୋର୍ଟାଲ ।

ସାରୁଅ ଜମି କେଳେଙ୍କାରୀରେ ଫଶି ଆକତାମାକତା ହୋଇଥିବା ମ୍ୟାଡାମ ପଣ୍ଡା ଓ ଟୁଇଟର ପଣ୍ଡା ଏବେ ସତ ଦେଖାଉଥିବା ନନ୍ଦିଘୋଷ ଟିଭିକୁ ଟାର୍ଗେଟ୍ କରିବା ଆରମ୍ଭ କଲେଣି । ନିଜ ଚ୍ୟାନେଲର ସିଷ୍ଟର କନସର୍ଣ୍ଣ କୁହାଯାଉଥିବା ଓଡ଼ିଶା ରିପୋର୍ଟର ଏକ ରିପୋର୍ଟ ଶନିବାର ସନ୍ଧ୍ୟା ବେଳେ ଡିଜିଟାଲ ପ୍ଲାଟଫର୍ମରେ ଅପଲୋଡ୍ କରିଛି । ଯେଉଁଥିରେ ନନ୍ଦିଘୋଷ ଟିଭି ଫର୍ଜି ଚ୍ୟାନେଲ, ଏହା ଅଳ୍ପ ଦିନ ମଧ୍ୟରେ ବନ୍ଦ ହୋଇଯିବ । ନନ୍ଦିଘୋଷ ପାଖରେ ଆବଶ୍ୟକ ଅନୁମତି ନାହିଁ । ଏହି ଚ୍ୟାନେଲର ମାଲିକାନାକୁ ନେଇ ଦ୍ୱନ୍ଦ୍ୱ ରହିଛି ଭଳି ପ୍ରଶ୍ନ ଉଠାଇଛି ।

ତେବେ ସବୁଠୁ ବଡ ପ୍ରଶ୍ନ ହେଉଛି ଟୁଇଟର ପଣ୍ଡାଙ୍କ ୱେବ ମିଡିଆ କେମିତି ଜାଣିଲା ନନ୍ଦିଘୋଷ ଫର୍ଜୀ ଚ୍ୟାନେଲ ? ଖଜୁରୀ ଗଛର କି ଗୁଣ ଗାଇବି, ସେ ତ ମୂଳରୁ ପାହାଚ ପାହାଚ । ବରାବର ମିଛ କହି ଆସୁଥିବା ପଣ୍ଡା ଦମ୍ପତିଙ୍କ ସଂସ୍ଥା ପୁଣି ମିଛ କହି ଜନସାଧାରଣଙ୍କୁ ବିଭ୍ରାନ୍ତି କରିବା ଆରମ୍ଭ କରିଦେଇଛି । ଔଷଧ ବିକଳରେ ତାଟିଆ କାମୁଡିବା ନ୍ୟାୟରେ ନିଜ ସ୍କାମ(ଦୁର୍ନୀତି ଓ କେଳେଙ୍କାରୀ)କୁ ଲୁଚାଇବା ପାଇଁ ପାଗଳ ଭଳି ଡହଡହ ସତକୁ ମିଛ ବୋଲି କହିବାକୁ ଉଦ୍ୟମ କରୁଛି । ଜଣେ ତଥାକଥିତ ସୂଚନା ଅଧିକାରୀ କର୍ମୀଙ୍କ ଅଜ୍ଞତାକୁ ଗୁପ୍ତଧନ ରୂପେ ବିବେଚନା କରି ଖୁସି ହୋଇଛନ୍ତି ପଣ୍ଡା କପଲ । କେବଳ ଖୁସି ହୋଇ ଯାଇଥିଲେ ଚଳିଥାନ୍ତା, କିନ୍ତୁ ସର୍ବସାଧାରଣଙ୍କ ପାଇଁ ଫେକ୍ ନ୍ୟୁଜ ମଧ୍ୟ ପରିବେଷଣ କରିଛି ବୈଜୟନ୍ତଙ୍କ ସଂସ୍ଥା । ଟୁଇଟର ପଣ୍ଡାଙ୍କ ବିଭିନ୍ନ ଗଣମାଧ୍ୟମ ସଂସ୍ଥାର ଲୋକପ୍ରିୟତା ଦିନକୁ ଦିନ ହ୍ରାସ ପାଇବାରେ ଲାଗିଛି । ସଂସ୍ଥାର ଲୁକ୍କାୟିତ ଆଭିମୁଖ୍ୟ ଏବଂ କର୍ମଚାରୀଙ୍କୁ ଫସାଇବା ନୀତି ଯୋଗୁ ଧୀରେ ଧୀରେ କର୍ମଚାରୀ ଛାଡିବା ଆରମ୍ଭ କରିଛନ୍ତି । ଏହା ଟୁଇଟର-ମ୍ୟାଡାମ ପଣ୍ଡାକୁ ଭୟଭୀତ କରିଛି । ଏଭଳି ଟ୍ରେଣ୍ଡ ଲାଗି ରହିଲେ ଶୂନ ଟିଭି କୁହାଯାଉଥିବା ସଂସ୍ଥା ଦିନେ ଗୋଲ ହୋଇଯିବ । ତେଣୁ ନନ୍ଦିଘୋଷ ଟିଭି ବନ୍ଦ ହୋଇଯିବ ବୋଲି କପୋଳକଳ୍ପିତ ଖବର ଜାଣିଶୁଣି ପରିବେଷଣ କରାଯାଇଛି । ନନ୍ଦିଘୋଷ ଟିଭି ଅଳ୍ପ ଦିନ ମଧ୍ୟରେ ଜନସାଧାରଣଙ୍କ ମଧ୍ୟରେ ଆଦୃତ ହୋଇଛି ।

କେବଳ ସେତିକି ନୁହେଁ, ଗୋଟିଏ ପରେ ଗୋଟିଏ ସ୍କାମର ପର୍ଦ୍ଦାଫାଶ କରୁଛି । ପଣ୍ଡା ବାବୁ-ବାବୁଆଣୀଙ୍କ ବାହାମାସ୍ ଲିଙ୍କ୍ ଜାତୀୟ ଗଣମାଧ୍ୟମରେ ଚର୍ଚ୍ଚାର ବିଷୟ ପାଲଟିଥିଲା । ଟିକସ ଠକେଇର ଭୂସ୍ବର୍ଗ କୁହାଯାଉଥିବା ବାହାମାସର ଜାଲି କମ୍ପାନୀ ଜରିଆରେ କୋଟି କୋଟି ଟଙ୍କାର କଳାଟଙ୍କାର କାରବାର କରିଥିଲେ ପଣ୍ଡା ଦମ୍ପତି। ଠକେଇ ଅଭିଯୋଗର ମଧ୍ୟ ତଦନ୍ତ ନିର୍ଦ୍ଦେଶ ଦେଇ ସାରିଛନ୍ତି ଦିଲ୍ଲୀ ହାଇକୋର୍ଟ । ୨୦୧୯ରେ ହାଇକୋର୍ଟରେ ଜନସ୍ବାର୍ଥ ମାମଲା ରୁଜୁ କରୁଥିବା ‘ପାଥ’ ସଂସ୍ଥା ପକ୍ଷରୁ ନିକଟରେ ଏକ ସାମ୍ବାଦିକ ସମ୍ମିଳନୀ ପରେ ବୈଜୟନ୍ତ ଓ ଜଗିଙ୍କ ସବୁ କଳା କେଳେଙ୍କାରୀର ହୋଇଥିଲା ପର୍ଦ୍ଦାଫାସ । ଟୁଇଟର ପଣ୍ଡାଙ୍କ ବାହାମାସ୍ ଲିଙ୍କ୍ ନେଇ ୨୦୧୯ ଜାନୁଆରୀ ୨୪ରେ ହୋଇଥିବା ପିଆଇଏଲକୁ ବିଚାରଯୋଗ୍ୟ କହି ଗ୍ରହଣ କରିଥିଲେ ହାଇକୋର୍ଟ । ୨୦୨୦ ଫେବୃଆରୀ ୭ ତାରିଖରେ କେନ୍ଦ୍ରୀୟ ସଂସ୍ଥାଙ୍କୁ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ ଦିଲ୍ଲା ହାଇକୋର୍ଟ । କଳାଧନ କେଳେଙ୍କାରୀ ମାମଲାକୁ ଗମ୍ଭୀର କହିବା ସହ ଅଭିଯୋଗର ତ୍ୱରିତ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ । ଇତି ମଧ୍ୟରେ ନିର୍ଦ୍ଦେଶକୁ ୮ ମାସ ବିତି ଯାଇଥିବା ବେଳେ ତଦନ୍ତର ଶିଥିଳତାକୁ ନେଇ ପ୍ରଶ୍ନ ଉଠାଇଥିଲା ଦିଲ୍ଲୀର ପାଥ୍ ସଂଗଠନ । ଇଏ ତ ଟୁଇଟର ପଣ୍ଡାଙ୍କ ଆର୍ନ୍ତଜାତୀୟ ମହାଠକେଇ । ଏହି କଥାକୁ ସମସ୍ତ ଦସ୍ତାବିଜ୍ ସହ ପରିବେଷଣ କରିଥିଲା ନନ୍ଦିଘୋଷ ଟିଭି । ଯାହା ତାଙ୍କୁ ଅଡୁଆରେ ପକାଇଥିଲା ।

ସେହିପରି ଟୁଇଟର ପଣ୍ଡା ଅନୁସୂଚିତ ଜାତି(ଏସସି) ବର୍ଗର ବ୍ୟକ୍ତିବିଶେଷଙ୍କ ଜମି ହାତେଇବା ପାଇଁ ନିଜ ସଂସ୍ଥାର କର୍ମଚାରୀଙ୍କୁ ହାତ ବାରିସି କରିଥିଲେ । ତାଙ୍କୁ ଭଗବାନଙ୍କ ଭଳି ଯେଉଁ କର୍ମଚାରୀମାନେ ଭାବୁଥିଲେ । ସେମାନଙ୍କୁ ଚାକିରୀର ଭୟ ଦେଖାଇ ସେମାନଙ୍କ ନାଁରେ ଜମି କିଣୁ ଥିଲେ ପୂର୍ବତନ ସାଂସଦ ମହୋଦୟ । କେବଳ ସେତିକି ନୁହେଁ, କମ୍ପାନୀର ନିର୍ଦ୍ଦେଶକ ତଥା ଉଚ୍ଚପଦସ୍ଥ କର୍ମଚାରୀଙ୍କ ଜରିଆରେ କରୁଥିଲେ କେଳେଙ୍କାରୀ । ବେଆଇନ ଜମି ହାତେଇବା, ବେଆଇନ ନିର୍ମାଣ କରିବା ପାଇଁ ସେମାନଙ୍କୁ କରିଥିଲେ ବ୍ୟବହାର । ଏହି କଥା ତାଙ୍କ କର୍ମଚାରୀମାନେ ମାନି ସାରିଛନ୍ତି । ଏହି ଖବରକୁ ମଧ୍ୟ ନନ୍ଦିଘୋଷ ଟିଭି ଯୁକ୍ତିଯୁକ୍ତ ତଥ୍ୟ ଆଧାରରେ ପରିବେଷଣ କରିଥିଲା । ଯାହା ଟୁଇଟର ପଣ୍ଡାଙ୍କୁ ଅସ୍ତବ୍ୟସ୍ତ କରିଦେଇଥିଲା । ସତ୍ୟ ଆଧାରିତ ଖବର ପରିବେଷଣ କରିବା କଣ ଅପରାଧ ? ଯଦି ସତ୍ୟ କହିବା ଅପରାଧ, ତେବେ ତାହା ନନ୍ଦିଘୋଷ ଟିଭି ବାରମ୍ବାର ଏଭଳି ଅପରାଧ କରିବାକୁ କୁଣ୍ଠାବୋଧ କରିବ ନାହିଁ ।

ଏହି ୨ଟି ଘଟଣାକୁ ବାଦ୍ ଦେଲେ ବି ଆହୁରି ସାଘାଂତିକ ଅଭିଯୋଗ ରହିଛି ଟୁଇଟର ଦୁନିଆର ଏହି କାଗଜ ବାଘଙ୍କ ନାଁରେ । ସାରୁଅ ଜମିରେ ଗଢି ଉଠିଥିଲା ଷ୍ଟୁଡିଓ । ଆଉ ଏଥିରେ ନିୟୋଜିତ ହୋଇଥିଲେ କିଛି କର୍ମଚାରୀ । ଠିକା ନିଯୁକ୍ତି ହୋଇଥିବା ଏହି ଶ୍ରମିକମାନେ ଦିନ ଦିନ ଧରି ପାଉଣାରୁ ବଞ୍ଚିତ ହୋଇଛନ୍ତି । କରୋନାର କରାଳ ରୂପ ସେମାନଙ୍କୁ ଅର୍ଥନୈତିକ ଭାବେ ଭାଙ୍ଗି ଦେଇଥିଲା । ନିଜର ହକ୍ ପାଇଁ ସେମାନଙ୍କ ଶାନ୍ତିପୂର୍ଣ୍ଣ ଧାରଣା ଦେଇଥିଲେ । ତାଙ୍କୁ ପାଉଣା ଦେବା ଦୂରର କଥା, ତାଙ୍କ କଥା ଶୁଣିବାକୁ ଟୁଇଟର ପଣ୍ଡାଙ୍କ ସମୟ ନାହିଁ । ଶୋଷିତ,ନିଷ୍ପେସିତ,ଅବହେଳିତଙ୍କ ସ୍ୱରକୁ ଗଣମାଧ୍ୟମରେ ପ୍ରସାରଣ କରିବା କଣ ଅପରାଧ । ତେଣୁ ନିଜ ଦୁର୍ନୀତି, କେଳେଙ୍କାରୀ ଘଟଣା ବାହାରକୁ ଆସିବା ପରେ ଟୁଇଟର ପଣ୍ଡା ଆବୁଲତାବୁଲ ହେଉଥିବା କୁହାଯାଉଛି ।

ଏଥିରେ ଛାନିଆ ହୋଇ ତାଙ୍କ ଗଣମାଧ୍ୟମ ସଂସ୍ଥାର ଡିଜିଟାଲ ମାଧ୍ୟମରେ ଏକ ଭିତ୍ତିହୀନ ଖବର ପରିବେଷଣ କରାଯାଇଛି। ଯାହା ଅତ୍ୟନ୍ତ ହାସ୍ୟାସ୍ପଦ । କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରଣାଳୟ ୱେବସାଇଟରେ ସମସ୍ତ ତଥ୍ୟ ଉପଲବ୍ଧ । ଚ୍ୟାନେଲ ପ୍ରସାରଣ ପାଇଁ ନନ୍ଦିଘୋଷଟିଭିକୁ ଯେ ସ୍ୱୀକୃତି ମିଳିଛି ସେଥିରୁ ଅତ୍ୟନ୍ତ ସ୍ପଷ୍ଟ । ନନ୍ଦିଘୋଷ ଟିଭି ଯେଉଁ କମ୍ପାନୀ ଦ୍ୱାରା ପରିଚାଳିତ ହେଉଛି, ତାହା ମଧ୍ୟ ସଂପୃକ୍ତ ୱେବ ସାଇଟ୍ ରେ ଲେଖାଯାଇଛି । ଏଥିପାଇଁ ସୂଚନା ଅଧିକାର ଆଇନ ବଳରେ ତଥ୍ୟ ମାଗିବା ଆବଶ୍ୟକ ନ ଥିଲା । ଭାରତବର୍ଷର ବିଭିନ୍ନ ଚ୍ୟାନେଲ ବିଭିନ୍ନ କମ୍ପାନୀ ଦ୍ୱାରା ପରିଚାଳିତ । ଏହା ମଧ୍ୟ ଆଇନତଃ ବୈଧ । ଏନେଇ ୱେବସାଇଟ୍ ରେ ମଧ୍ୟ ଏକଥା ସ୍ପଷ୍ଟ ଉଲ୍ଲେଖ ହୋଇଛି । ପୂର୍ବରୁ କମ୍ପାନୀ ପରିଚାଳନାରେ ଅନ୍ୟ ଏକ ନାଁରେ ଟିଭି ଥିଲା । ଏବେ ନନ୍ଦିଘୋଷ ଟିଭି ରହିଛି ।

କୌଣସି ତଥ୍ୟ ଏବଂ ଆଧାର ନ ଥାଇ ଖବରକୁ ହଟଚମଟ କରି ପରିବେଷଣ କରିବାରେ ସିଦ୍ଧହସ୍ତ ଶୂନ ଟିଭି । ଅତୀତରେ ଏମିତି ଫେକ୍ ନ୍ୟୁଜ ପରିବେଷଣ କରି ଆଇନର ପରିସରଭୁକ୍ତ ହୋଇସାରିଛି ଏହି ସଂସ୍ଥା । ଏଥର ମଧ୍ୟ ଫେକ୍ ନ୍ୟୁଜ ପରିବେଷଣ କରିବା ସହ ଏହା କିଭଳି ଅଧିକରୁ ଅଧିକ ଭାଇରାଲ ହେବ, ସେଥିପାଇଁ ନିଜ ପ୍ରତିନିଧିଙ୍କୁ କାମରେ ଲଗାଇ ଦିଆଯାଇଛି । କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରଣାଳୟର ତଥ୍ୟକୁ ଏଠାରେ ଉପସ୍ଥାପନ କରାଯାଇଛି । ଏହାକୁ ଅନୁଧ୍ୟାନ କଲେ ଓଡ଼ିଶା ରିପୋର୍ଟର କେତେ ସତିଆ ତାହା ଜଣାପଡିବ ।

ଓଡ଼ିଶା ରିପୋର୍ଟରର ଖବରରେ ନନ୍ଦିଘୋଷ ଟିଭି ପ୍ରାଇଭେଟ୍ ଲିଃ ବିଷୟରେ ପ୍ରଶ୍ନ ଉଠାଯାଇଛି । ନନ୍ଦିଘୋଷ ଟିଭି ପ୍ରାଇଭେଟ ଲିଃ ସମ୍ପର୍କରେ ଜନସାଧାରଣ ଯଦି ତଥ୍ୟ ଚାହୁଁଛନ୍ତି, ତାହାକୁ ପ୍ରକାଶ କରିବାରେ ନନ୍ଦିଘୋଷ ଟିଭି କୁଣ୍ଠାବୋଧ କରିବ ନାହିଁ । କିନ୍ତୁ ଓଡ଼ିଶା ରିପୋର୍ଟରକୁ ତଥ୍ୟ ଦେବାକୁ ନନ୍ଦିଘୋଷ ଟିଭି ପ୍ରାଇଭେଟ ଲିଃ ବାଧ୍ୟ ନୁହେଁ । ନନ୍ଦିଘୋଷ ଟିଭି, ଚଳାଇବା ପାଇଁ ଅର୍ଥ କେଉଁଠୁ ଆସୁଛି, ସେ କଥା ଓଡ଼ିଶା ରିପୋର୍ଟର ପ୍ରଶ୍ନ କରୁଛି । ହେଲେ କହି ଦେଉଥାଉ ପରକୁ, ବୁଦ୍ଧି ନ ଆସଇ ନିଜକୁ ନ୍ୟାୟରେ ଓଡ଼ିଶା ରିପୋର୍ଟର ଚଳାଇବା ପାଇଁ କେଉଁଠୁ ପଇସା ଆସୁଛି, ସେ କଥା ତ ଓଡ଼ିଶା ରିପୋର୍ଟର ବାଲା ଜାଣିଥିବେ । ନନ୍ଦିଘୋଷ ଟିଭିର ଲୋକପ୍ରିୟତାରେ ଭୟଭୀତ ଏହି ସୋସିଆଲ ମିଡିଆ ନେତାଙ୍କ ସଂସ୍ଥା ଓଡ଼ିଶା ରିପୋର୍ଟର ବିରୋଧରେ ବିଭ୍ରାନ୍ତିକର ଖବର ପରିବେଷଣ ପାଇଁ ନନ୍ଦିଘୋଷ ଟିଭି ଆଇନର ଆଶ୍ରୟ ନେବ ବୋଲି ଏହାର କର୍ତ୍ତୃପକ୍ଷ ସୂଚନା ଦେଇଛନ୍ତି ।