ବାହାନଗା ଟ୍ରେନ୍ ଟ୍ରାଜେଡି, ରିମାଣ୍ଡ ଅବଧି ପରେ ବିଚାର ବିଭାଗୀୟ ହାଜତ ଗଲେ ୩ ଅଭିଯୁକ୍ତ

ଭୁବନେଶ୍ୱର: ବାହାନଗା ଟ୍ରେନ୍ ଟ୍ରାଜେଡି ମାମଲା । ଜେଲ ଗଲେ ୩ ଅଭିଯୁକ୍ତ । ତିନି ଅଭିଯୁକ୍ତଙ୍କୁ ଆଉ ରିମାଣ୍ଡରେ ନେବନି ସିବିଆଇ । ଆସନ୍ତା ୧୪ ଦିନ ପର୍ଯ୍ୟନ୍ତ ବିଚାର ବିଭାଗୀୟ ହଜାତକୁ ଗଲେ ଗିରଫ ତିନି ଅଭିଯୁକ୍ତ । ସେପଟେ ସିନିୟର୍ ସେକ୍ସନ ଇଞ୍ଜିନିୟର ପକ୍ଷରୁ ଜାମିନ ଆବେଦନ ଶୁଣାଣି ଉପରେ ଅଧିକ ସମୟ ମାଗିଛନ୍ତି ତାଙ୍କ ଓକିଲ । ସିବିଆଇ ଦୁଇଟି ପର୍ଯ୍ୟାୟରେ ମୋଟ ୯ ଦିନ ରିମାଣ୍ଡରେ ନେଇ ତିନି ଅଭିଯୁକ୍ତଙ୍କୁ ପଚରା ଉଚରା କରିଥିଲା । ତିନି ଅଭିଯୁକ୍ତଙ୍କଠାରୁ ଅନେକ ସତ ଉଗାରିଛି CBI । କାର୍ଯ୍ୟରେ ଅବହେଳା କାରଣରୁ ଦୁର୍ଘଟଣା ଓ ପ୍ରମାଣ  ନଷ୍ଟ ପଛରେ ଆଉ କାହାରି ହାତ ରହିଛି କି ସେ ସମସ୍ତ ଦିଗକୁ ନେଇ ସିବିଆଇ ଖୋଳତାଡ ଜାରି ରଖିଛି ।

ଏ ପଯ୍ୟନ୍ତ ୬ଜଣକୁ ସମନ କରାଯାଇଥିବାବେଳେ ଅନେକଙ୍କୁ ସିବିଆଇ ଜେରା କରିଥିବା ଜଣାପଡ଼ିଛି । ଚିଫ୍ ଅଫ୍ ରେଲୱେ ସିକ୍ୟୁରିଟିଙ୍କ ତଦନ୍ତ ରିପୋର୍ଟ ଆଧାରରେ ୭ ଜଣଙ୍କୁ ନିଲମ୍ବିତ କରାଯାଇଛି । ତା ଭିତରୁ ତିନି ଜଣ ଗିରଫ ହୋଇସାରିଥିବାବେଳେ, ଷ୍ଟେସନ ମାଷ୍ଟର, ସମେତ ଆସିଷ୍ଟାଣ୍ଟ ଷ୍ଟେସନ୍ ମାଷ୍ଟର, ଟ୍ରାଫିକ୍ ଇନସପେକ୍ଟର ଓ ମେଣ୍ଟେନର୍  ସିବିଆଇ ସ୍କାନରରେ ରହିଛନ୍ତି । ସିବିଆଇ କୋର୍ଟରେ ୨୭ ତାରିଖରେ ମାମଲାର ପରବର୍ତ୍ତୀ ଶୁଣାଣି ରହିଛି ।