‘ଦୁର୍ଘଟଣା ସମୟରେ ବାହାନଗା ଗ୍ରାମବାସୀ ପାଲଟିଥିଲେ ଦେବଦୂତ’

ବାହାନଗା: ସେବାକୁ ସମ୍ମାନ, ସମର୍ପଣକୁ ପ୍ରୋତ୍ସାହନ। ଟ୍ରେନ ଟ୍ରାଜେଡିର ଦେବଦୂତ ବାହାନଗାବାସୀଙ୍କୁ ବଡ଼ ଉପହାର। ମଣିଷପଣିଆର ମଡେଲ ସାଜିଥିବା ବାହାନଗା ସାଜିବ ଦେଶରେ ଶ୍ରେଷ୍ଠ। ଜୁନ ୨ତାରିଖ କାଳରାତିରେ ଶହଶହ ଜୀବନ ବଞ୍ଚାଇଥିବା ଜନସାଧାରଣଙ୍କୁ ଭେଟି କୃତଜ୍ଞତା ଜଣାଇଛନ୍ତି ଫାଇଭ-ଟି ସଚିବ। ଏହି ଅବସରରେ ବାହାନଗାକୁ ରାଜ୍ୟ ସରକାରଙ୍କ ବଡ଼ ଭେଟି ସମ୍ପର୍କରେ ଘୋଷଣା କରିଛନ୍ତି ଫାଇଭ-ଟି ସଚିବ। ବାହାନଗାରୁ ଆରମ୍ଭ ହେଉଛି ପ୍ରାଥମିକ ଓ ଏମଇ ସ୍କୁଲ ରୂପାନ୍ତରଣ ପ୍ରକ୍ରିୟା। ଏଥିପାଇଁ ମୁଖ୍ୟମନ୍ତ୍ରୀଙ୍କ ଅଢେଇ କୋଟି ଟଙ୍କା ମଞ୍ଜୁରୀ ପତ୍ରକୁ ମଞ୍ଚ ଉପରେ ଜିଲ୍ଲାପାଳଙ୍କୁ ପ୍ରଦାନ କରିଛନ୍ତି ଫାଇଭ-ଟି ସଚିବ। ଏହାଛଡ଼ା ବାହାନଗାକୁ ଦେଶର ମଡେଲ ପଞ୍ଚାୟତ ରୂପେ ଗଢି ତୋଳିବା ଓ ଅନ୍ୟାନ୍ୟ ସମସ୍ୟାର ସମାଧାନ ପାଇଁ ମିଳିଛି ନିର୍ଭର ପ୍ରତିଶ୍ରୁତି।

ଏଥିସହ ବାହାନଗା ସ୍କୁଲର ରୂପାନ୍ତରଣ ପାଇଁ ଖର୍ଚ୍ଚ ହେବ ଅଢେଇ କୋଟି ଟଙ୍କା। ଏଥିପାଇଁ ମୁଖ୍ୟମନ୍ତ୍ରୀ ମଞ୍ଜୁରୀ ଦେଇଛନ୍ତି। ଏହି ମଞ୍ଜୁରୀ ପତ୍ରକୁ ଜିଲ୍ଲାପାଳଙ୍କୁ ଦେଲେ ଭିକେ ପାଣ୍ଡିଆନ୍‌। ଏଥିସହ ସେ ଅଞ୍ଚଳରେ ବିଭିନ୍ନ ଧାର୍ମିକ ଅନୁଷ୍ଠାନ ପାଇଁ ହୋଇଥିବା ନିବେଦନକୁ ନେଇ ଆସନ୍ତା ସପ୍ତାହ ଭିତରେ ଖୁସି ଖବର ମିଳିବ ବୋଲି କହିଛନ୍ତି।

ବାଲେଶ୍ବର ଗସ୍ତରେ ଥିବା ଫାଇଭ ଟି ସଚିବ ଭିକେ ପାଣ୍ଡିଆନ୍‌ ବାହାନଗାରେ ପହଞ୍ଚି ଲୋକଙ୍କୁ ଧନ୍ୟବାଦ ଜଣାଇଥିଲେ। ଟ୍ରେନ୍‌ ଟ୍ରାଜେଡି ବେଳେ ଦେବଦୁତ ସାଜିଥିଲେ ସ୍ଥାନୀୟ ଲୋକେ। ସେଦିନ କାଳରାତିର କଥା ମନେ ପକାଇଥିଲେ ଫାଇଭ ଟି ସଚିବ। ଏଥିସହ ଦୁଇ ମିନିଟର ନିରବ ପ୍ରାର୍ଥନା କରିଥିଲେ। ସ୍ଥାନୀୟ ଲୋକଙ୍କ ସହଯୋଗ ପାଇଁ ବହୁତ ଲୋକ ଟ୍ରେନ ଟ୍ରାଜେଡିରୁ ବଞ୍ଚିଯାଇଥିଲେ । ଏଥିପାଇଁ ସାରା ରାଜ୍ୟ ଆପଣଙ୍କ ନିକଟରେ ଚିର ଋଣୀ ବୋଲି 5T ସଚିବ କହିଛନ୍ତି ।