ବିମାନରେ ଶୋଇପଡ଼ିଥିଲେ ଉଠିବା ପରେ ଏମିତି ଘଟିଲା…

ଆବୁଧାବି : ବିମାନରେ ଶୋଇପଡ଼ିବାରୁ ଇଣ୍ଡିଗୋ କର୍ମଚାରୀଙ୍କ ସହ ଏମିତି ଘଟଣା ଘଟିଥିଲା ଯାହା ଜାଣିଲେ ଆପଣ ମଧ୍ୟ ଆଶ୍ଚର୍ଯ୍ୟ ହେବେ । ଇଣ୍ଡିଗୋ ଏୟାରଲାଇନ୍ସ ମୁମ୍ବାଇରୁ ଆବୁଧାବି ଆସୁଥିବାବେଳେ ଜାହାଜର ଜଣେ ବ୍ୟାଗ୍ ହ୍ୟାଣ୍ଡେଲର ଜାହାଜର କାର୍ଗୋ କମ୍ପାର୍ଟମେଣ୍ଟରେ ଶୋଇପଡ଼ିଥିଲେ ଏବଂ ସିଧା ପହଞ୍ଚିଥିଲେ ଆବୁଧାବିରେ ।

ଏହି ବିମାନ ଚଳାଚଳ ଦାୟିତ୍ୱରେ ଥିବା ଡିଜିସିଏଙ୍କ କହିବାନୁସାରେ ରବିବାର ଲୋକଙ୍କ ଜିନିଷପତ୍ର ଜାହାଜରୁ ବାହାର କରିବା ପରେ ବ୍ୟାଗ୍ ହ୍ୟାଣ୍ଡେଲର ଜଣକ ଅତ୍ୟଧିକ କ୍ଳାନ୍ତ ହୋଇ ସେଠାରେ ଥିବା ଜିନିଷ ପଛପଟେ ହିଁ ଶୋଇପଡ଼ିଥିଲେ । ଜିନିଷ ଲୋଡ୍ ହେବା ପରେ ବିମାନର  ଦ୍ୱାର ବନ୍ଦ ହୋଇଯାଇଥିଲା ଏବଂ ବିମାନଟି ମୁମ୍ୱାଇରୁ ଆବୁଧାବି ନିମନ୍ତେ ବାହାରିଥିଲା । ଏହା ଭିତରେ କର୍ମଚାରୀଙ୍କ ନିଦ ଭାଙ୍ଗିଯାଇଥିଲେ ମଧ୍ୟ ଜାହାଜଟି ଉଡ଼ାଣ ଅବସ୍ଥାରେ ଥିବାରୁ ଓହ୍ଲାଇବା ପାଇଁ ତାଙ୍କ ପାଖରେ କୈାଣସି ଉପାୟ ନଥିଲା ।

ସାଧାରଣତଃ ଜାହାଜରେ ଲୋକଙ୍କ ଜିନିଷ ରଖାଯାଉଥିବା ସ୍ଥାନଟି ଭୀଷଣ ଥଣ୍ଡା ଏବଂ ଏଠାରେ ଅଧିକ ସମୟ ତିଷ୍ଠିବା ଜଣେ ମଣିଷପକ୍ଷେ କଷ୍ଟକର ହୋଇପଡ଼େ । ମାତ୍ର କର୍ମଚାରୀଙ୍କ ସ୍ୱାସ୍ଥ୍ୟ ପରୀକ୍ଷା କରିବା ପରେ ବର୍ତ୍ତମାନ ସେ ସୁସ୍ଥ ଥିବା ଡିଜିସିଏ ସୂଚନା ଦେଇଛନ୍ତି । ଡିଜିସିଏଙ୍କ ଅନୁସାରେ ଆବୁଧାବି ଏୟାରପୋର୍ଟର ସହଯୋଗରେ ସଂପୃକ୍ତ  କର୍ମଚାରୀଙ୍କୁ ସେହି ବିମାନରେ ମୁମ୍ବାଇ ଅଣାଯାଇଥିଲା । ବର୍ତ୍ତମାନ କମ୍ପାନୀ କର୍ମଚାରୀ ଜଣଙ୍କୁ ଚାକିରିରୁ ନିଲମ୍ବିତ କରିଥିବା ବେଳେ ପୋଲିସ ମାମଲାର ଯାଞ୍ଚ ଆରମ୍ଭ କରିଛି ।