ଢେଙ୍କାନାଳରେ କୁକୁର ସହ କୁନି ଝିଅକୁ ବାହା କରାଇଲେ ପରିବାର ଲୋକେ, ଜାଣନ୍ତୁ କାହିଁକି?
ଢେଙ୍କାନାଳ: ବାଜୁଛି ବାଜା, ନାଚି ନାଚି ଆସୁଛନ୍ତି ବରଯାତ୍ରୀ । ବର ମୁଣ୍ଡରେ ଛତା, ବେକରେ ଫୁଲର ମାଳ । କନ୍ୟା ପକ୍ଷ କଲେ ସ୍ୱାଗତ, ପୁରୋହିତ କଲେ ମନ୍ତ୍ର ପାଠ । ଆରମ୍ଭ ହେଲା ବାହାଘର । ଏଭଳି ବାହାଘର ଯାହା ଆପଣ ଆଗରୁ ଦେଖିଥିବେ । କିନ୍ତୁ ଏହି ବହାଘରର ବର ହେଉଛି କୁକୁର ଓ କନ୍ୟା ହେଉଛି ଜଣେ କୁନି ଝିଅ । ଏଭଳି ବାହାଘର ଦେଖିବାକୁ ମିଳିଛି କଙ୍କଡାହାଡ଼ ବ୍ଳକ୍ ଅନ୍ତର୍ଗତ ଦେବଗଣ ସାହିରେ ।
ଅନ୍ଧ ବିଶ୍ୱାସର ବଶବର୍ତ୍ତୀ ହୋଇ କଳୁଷିତ ପରମ୍ପରାର ନାଁରେ କୁକୁର ସହିତ ହେଉଛି କୁନି ଝିଅ ବିବାହ । ପୂର୍ବ ପୁରୁଷରୁ ଚାଲି ଆସୁଥିବା କୁକୁର ବାହାଘର ରୀତିନୀତିରେ ବିବାହ କରୁଛନ୍ତି ଢେ଼ଙ୍କାନାଳ ଜିଲ୍ଲା ,କଙ୍କଡ଼ାହାଡ଼ ବ୍ଲକ ଅନ୍ତର୍ଗତ କରଗୋଳା ପଞ୍ଚାୟତ ଅଧିନରେ ଥିବା ଦେବଗଣ ସାହିରେ ବସ ବାସ କରୁଥିବା ଆଦିବାସୀ ସଂପ୍ରଦାୟ ଲୋକେ ।
ପୂରା ରୀତିନୀତିରେ ହେଉଛି ବାହାଘର। ଆଦିବାସୀମାନଙ୍କ ବିଶ୍ୱାସ ରହିଥାଏ ଯେ ଘରେ ଯଦି ଗୋଟେ ପିଲା ଜନ୍ମ ଗ୍ରହଣ କରିଥାଏ, ସେହି ପିଲା ତା ମା ପାଖରୁ କ୍ଷୀର ପାନ କରିବା ସମୟରେ ପାଟିର ଉପର ପଟରେ ଯଦି ପିଲାର ଦାନ୍ତ ଗୋଟେ ଦେଖିବାକୁ ମିଳେ, ତେବେ ସେହି ପିଲାର ଗ୍ରହ ନକ୍ଷତ୍ର ଖରାପ ବୋଲି ଜଣା ପଡ଼ିଥାଏ, ଏବଂ ସେହି ପିଲାର ଦାନ୍ତକୁ କୁକୁର ଦାନ୍ତ ବୋଲି ସେମାନେ କହିଥାନ୍ତି । ତେବେ ସେହି ପିଲା ଯଦି ବଡ଼ ହୋଇଯାଏ , ଆଉ ବଡ଼ ହୋଇଯିବା ପରେ ତା’ର ବିଭିନ୍ନ ପ୍ରକାରର ଦୁର୍ଘଟଣା ଘଟିବାର ଆଶଙ୍କା ଥାଏ । ତେବେ ସେହି ଦୁର୍ଘଟଣାଟିକୁ ରୋକିବାକୁ ଛୋଟ ପିଲା ସମୟରେ ତାକୁ କୁକୁର ସହିତ ପୂର୍ଣ୍ଣ ରୀତିନୀତିରେ ବିବାହ କରାଯାଇଥାଏ । । ଆଉ ବିବାହ ପରେ ସେ ଗ୍ରହମୁକ୍ତ ହୋଇଥାଏ ବୋଲି ସେମାନେ ବିଶ୍ୱାସ ରହିଛି । ଖାଲି ସେତିକି ନୁହେଁ ବର ପକ୍ଷ ଓ କନ୍ୟାପକ୍ଷ ଉଭୟ ମିଶି ଏକ ଭୋଜିର ଆୟୋଜନ ମଧ୍ୟ କରାଯାଏ । ତେବେ ଯୁଗ ଯେତେ ଆଗେଇଲେ ବି ଆଜି ବି ଅନ୍ଧ ବିଶ୍ୱାସର ଅନ୍ଧ ଗଳିରେ ଲୋକ ଜୀବନ ଜାପନ କରୁଛନ୍ତି। ଯାହାର ଉଦାହରଣ ଏହି ବାହାଘର।
