ନନ୍ଦିଘୋଷ ବ୍ୟୁରୋ : ମାଛ ଜାଲରେ ଛନ୍ଦି ହୋଇ ଫସିଲା ହାତୀ ଛୁଆ । ଦୀର୍ଘ ୧୨ ଘଣ୍ଟା ପରେ ଉଦ୍ଧାର କଲା ବନ ବିଭାଗ I ଅନୁଗୁଳ ଜିଲ୍ଲା ପାଲଲହଡା ବନାଞ୍ଚଳ ଦେବଗଡ଼ ବନଖଣ୍ଡ ହରିପୁର ଗ୍ରାମ ନିକଟରେ ବିଛାଯାଇଥିଲା ମାଛ ଜାଲ । ଏହି ଜାଲରେ ଛନ୍ଦି ହୋଇ ପାଣି ଭିତରେ ଫସି ରହିଥିଲା ହାତୀ ଛୁଆ । ଦୀର୍ଘ ୧୨ ଘଣ୍ଟାର କସରତ ପରେ ଛୁଆ ହାତୀକୁ ସୁରକ୍ଷିତ ପାଣିରୁ ଉଦ୍ଧାର କରିଛି ବନ ବିଭାଗ ।କିଛିଦିନ ହେବ ୧୧ ଟିକିଆ ହାତୀ ପଲ ଚସାଗୁରୁଜାଙ୍ଗ ଓ ପବିତ୍ରପୁର ପଞ୍ଚାୟତର ବିଭିନ୍ନ ଗାଁରେ ବ୍ୟାପକ କ୍ଷୟକ୍ଷତି କରୁଥିଲେ । ଗତକାଲି ସନ୍ଧ୍ୟା ସମୟରେ ପବିତ୍ରପୁର ପଞ୍ଚାୟତ ପଟୁ ନଦୀ ପାର ହୋଇ ଯାଉଥିବା ବେଳେ ଛୁଆ ହାତୀଟି ପାଣିରେ ବିଛା ଯାଇଥିବା ମାଛ ଜାଲରେ ଛନ୍ଦି ହୋଇ ଫସି ଯାଇଥିଲା। ସ୍ଥାନୀୟ ଲୋକେ ଦେଖି ତୁରନ୍ତ ପାଳଲହଡା ବନ ବିଭାଗକୁ ସୂଚନା ଦେଇଥିଲେ । ଆଜି ସକାଳୁ ବନବିଭାଗ ଘଟଣାସ୍ଥଳରେ ପହଂଚି ହାତୀ ଛୁଆକୁ ଉଦ୍ଧାର କରି ମା ହାତୀ ପାଖରେ ଛାଡିଛି ।
