ଫେଲ ମାରିଲା ଆୟୁଷ୍ମନ ଭାରତ: ବିଜେପି ସରକାରର ଆଉ ଏକ ପ୍ରତିଶ୍ରୁତି ପାଣିର ଗାର

ଭୁବନେଶ୍ବର: ଏପ୍ରିଲ ପହିଲାରୁ ରାଜ୍ୟରେ ଆୟୁଷ୍ମାନ ଭାରତ ଯୋଜନା ଲାଗୁ କରିବାକୁ ପ୍ରତିଶ୍ରୁତି ଦେଇଥିଲେ ରାଜ୍ୟ ସରକାର । କିନ୍ତୁ ପ୍ରତିଶ୍ରୁତି ପାଲଟିଲା ପାଣିର ଗାର । ରାଜ୍ୟ ବାହାରେ ଉନ୍ନତ ଚିକିତ୍ସା ପାଇଁ ଆୟୁଷ୍ମାନ ଯୋଜନା ଫଳପ୍ରଦ ହୋଇଥାନ୍ତା ବୋଲି କହିଥିଲେ ସରକାର । କ୍ଷମତାକୁ ଆସିବା ପରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସକେଓ୍ବାଇ)ର ନାମ ବଦଳାଇ ଗୋପବନ୍ଧୁ ଜନ ଆରୋଗ୍ୟ ଯୋଜନା କଲେ । ଆଉ ଗୋପବନ୍ଧୁ ଜନ ଆରୋଗ୍ୟ ଯୋଜନା ଓ ଆୟୁଷ୍ମାନ ଭାରତ ସମ୍ମିଶ୍ରଣରେ ନୂଆ କାର୍ଡ଼ ହିତାଧିକାରୀଙ୍କୁ ଦିଆଯିବା କଥା । ହେଲେ ଗୋଟିଏ ଆସ୍ୟୁଡ ସ୍କିମ ଓ ଅନ୍ୟଟି ଇନସ୍ୟୁଡ ସ୍କିମ ହୋଇଥିବାରୁ କନଭର୍ଜେନ୍ସରେ ବୈଷୟିକ ସମସ୍ୟା ଦେଖାଦେଇଛି । ୧୫ ଦିନ ମଧ୍ୟରେ ରାଜ୍ୟରେ ଆୟୁଷ୍ମାନ ଯୋଜନା ଲାଗୁ ହେବ ବୋଲି କହିଛନ୍ତି ମୁଖ୍ୟମନ୍ତ୍ରୀ ।

କାହିଁକି ଫେଲ ମାରିଲା ଡେଡଲାଇନ ? କେଉଁଠି ରହିଲା ଅସୁବିଧା ? ନବୀନ ସରକାର ଅମଳରେ ସ୍ବାସ୍ଥ୍ୟ ସେବା କ୍ଷେତ୍ରରେ ମାଇଲ ଖୁଣ୍ଟ ଭାବେ ପରିଚିତ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ମହିଳାଙ୍କ ପାଇଁ ୧୦ ଲକ୍ଷ ଏବଂ ପୁରୁଷଙ୍କ ପାଇଁ ୫ ଲକ୍ଷ ଟଙ୍କାର ମାଗଣା ଚିକିତ୍ସା ବ୍ୟବସ୍ଥା ଥିଲା । ବିଜେପି ସରକାରରେ ଏହାର ନାମ ପରିବର୍ତ୍ତନ କରି ଗୋପବନ୍ଧୁ ଜନ ଆରୋଗ୍ୟ ଯୋଜନା କରାଗଲା ପରେ ବି ବ୍ୟବସ୍ଥା ସମାନ ଥିଲା । ଏହାସହ କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନାକୁ ସମ୍ମିଶ୍ରଣ କରି ରାଜ୍ୟରେ ଲାଗୁ କରିବା ପାଇଁ ନିଷ୍ପତ୍ତି ହେଲା । ଏପ୍ରିଲ ପହିଲାରୁ ଆୟୁଷ୍ମାନ ଭାରତ ଯୋଜନା ଲାଗୁ କରିବାକୁ ମାର୍ଚ୍ଚ ୧୨ ତାରିଖରେ ଘୋଷଣା କରିଥିଲା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ । ହେଲେ ତାହା ହୋଇପାରିଲା ନାହିଁ । ଉଭୟ ଯୋଜନାରୁ ଗୋଟିଏ ଇନସ୍ୟୁଡ ହୋଇଥିବା ବେଳେ, ଆଉ ଗୋଟିଏ ଆସ୍ୟୁଡ । ଉଭୟ ଯୋଜନାର ହିତାଧିକାରୀଙ୍କ ପାଇଁ ଅଲଗା ଅଲଗା ଗାଇଡଲାଇନ ଥିବାରୁ, ଏହାକୁ ଗୋଟିଏ ପ୍ଲାଟଫର୍ମକୁ ଆଣିବା ପାଇଁ ବୈଷୟିକ ସମସ୍ୟା ଥିବାରୁ ବିଳମ୍ବ ହେଉଥିବା ଜଣାପଡ଼ିଛି ।

ଆୟୁଷ୍ମାନ ଭାରତ ଯୋଜନାର ଡେଡଲାଇନ ଫେଲ୍ ମାରିଥିବା ବେଳେ, ରାଜ୍ୟରେ ନୂଆ ମଦ ନୀତି ପାଇଁ ବି ଏପ୍ରିଲ ପହିଲାକୁ ଦିନ ଧାର୍ଯ୍ୟ ହୋଇଥିଲା, ତାହା ବି ଫେଲ୍ ମାରିଛି । ଏପଟେ ଓଡ଼ିଶା ଦିବସକୁ କଳାଦିବସ ଭାବେ ପାଳନ କରିଛନ୍ତି ନୂତନ ପେନସନଭୁକ୍ତ ସରକାରୀ କର୍ମଚାରୀ । ପୁରୁଣା ପେନସନ ଦାବିରେ ଲକ୍ଷ ଲକ୍ଷ କର୍ମଚାରୀ ସୋସିଆଲ ମିଡିଆରେ ଓଡ଼ିଶା ଦିବସକୁ କଳା ଦିବସ ଭାବେ ଅଭିହିତ କରିଛନ୍ତି । ନ୍ୟାସନାଲ ପେନସନ ସିଷ୍ଟମ ନୁହେଁ କି କେନ୍ଦ୍ର ଦ୍ବାରା ଲଦି ଦିଆଯାଇଥିବା ୟୁନିଭର୍ସାଲ ପେନସନ ସିଷ୍ଟମ ନୁହେଁ, କେବଳ ପୁରୁଣା ପେନସନ୍ ସିଷ୍ଟମ ଦରକାର ବୋଲି ଦାବି କରିଛନ୍ତି ସରକାରୀ କର୍ମଚାରୀ ।

ଗୋପବନ୍ଧୁ ଜନ ଆରୋଗ୍ୟ ଯୋଜନାରେ ସାମିଲ ହୋଇଛନ୍ତି ରାଜ୍ୟର ୧ କୋଟି ପରିବାର । ଏଥିପାଇଁ ୬ ହଜାର ୨୪୯ କୋଟି ଟଙ୍କାର ବ୍ୟବସ୍ଥା କରିଛନ୍ତି ସରକାର । ହେଲେ ଆୟୁଷ୍ମାନ ଯୋଜନା ଓଡ଼ିଶାରେ ଲାଗୁ ହେଲେ, ଦେଶର ୨୯ ହଜାର ଘରୋଇ ହସ୍ପିଟାଲରେ ରୋଗୀ ଚିକିତ୍ସା ସୁବିଧା ପାଇବେ ବୋଲି ଆକଳନ କରାଯାଇଛି ।