ଆଜିଠାରୁ ସାଧାରଣ ଭକ୍ତଙ୍କ ଲାଗି ଉନ୍ମୁକ୍ତ ଅଯୋଧ୍ୟା ରାମ ମନ୍ଦିର

ଅଯୋଧ୍ୟା : ଅଯୋଧ୍ୟାରେ ରାମ ମନ୍ଦିରର ପ୍ରାଣ ପ୍ରତିଷ୍ଠା ପରେ ଆଜିଠାରୁ ସର୍ବସାଧାରଣ ତଥା ଭକ୍ତଙ୍କ ଲାଗି ଉନ୍ମୁକ୍ତ ହେବ ମନ୍ଦିର । ଗତକାଲି ମହାସମାରୋହରେ ମନ୍ଦିରର ପ୍ରାଣ ପ୍ରତିଷ୍ଠା ଉତ୍ସବରେ ସାମିଲ ହୋଇଥିଲେ ପ୍ରଧାନମନ୍ତ୍ରୀଙ୍କ ସମେତ ବହୁ ରାଜନେତା, କ୍ରିକେଟ ତାରକା ଓ ବଲିଉଡ ତାରକା । ନୂଆ ମନ୍ଦିରର ପ୍ରତିଷ୍ଠା ସହ ଏହା ପ୍ରମୁଖ ଦର୍ଶନୀୟ ସ୍ଥଳୀରେ ପରିବର୍ତ୍ତିତ ହୋଇଛି ।

ଭକ୍ତଙ୍କ ଲାଗି ସକାଳ ୭ଟାରୁ ଦିନ ୧୧ଟା ଯାଏ ଏବଂ ଅପରାହ୍ଣ ୨ଟାରୁ ସନ୍ଧ୍ୟା ୭ଟା ଯାଏ ମନ୍ଦିର ଖୋଲା ରହିବ । ପୂର୍ବାହ୍ନ ସାଢେ ୬ଟାରେ ହେବ ଜାଗରଣ ତଥା ଶ୍ରୀଙ୍ଗର ଆରତି । ସେହିପରି ସନ୍ଧ୍ୟା ସାଢେ ୭ଟାରେ ହେବ ସନ୍ଧ୍ୟା ଆରତି । ଉଭୟ ଅଫଲାଇନ ଓ ଅନଲାଇନ ଜରିଆରେ ଭକ୍ତମାନେ ଆରତି ବା ଦର୍ଶନ ଲାଗି ପାସ୍ ପାଇପାରିବେ । ଗତକାଲି ପ୍ରତିଷ୍ଠା ଉତ୍ସବରେ ଯୋଗଦେଇ ପ୍ରଧାନମନ୍ତ୍ରୀ କହିଥିଲେ- ଅସୀମ ଧୈର୍ଯ୍ୟ, ତ୍ୟାଗ ଓ ପ୍ରତୀକ୍ଷା ପରେ ପ୍ରଭୁ ଶ୍ରୀରାମ ଆସିଛନ୍ତି । ହଜାର ହଜାର ବର୍ଷ ପରେ ଏହି ଐତିହାସିକ ଘଟଣାକୁ ଲୋକେ ସ୍ମରଣ ରଖିବେ । ଆଇନର ମର୍ଯ୍ୟାଦା ରକ୍ଷା କରିଥିବା ଦୃଷ୍ଟିରୁ ସେ ସୁପ୍ରିମକୋର୍ଟଙ୍କୁ ଧନ୍ୟବାଦ ଜଣାଇଥିଲେ । ପ୍ରାଣ ପ୍ରତିଷ୍ଠା ଅବସରରେ ଅଯୋଧ୍ୟାରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଛି । ହଜାର ହଜାର ସାଧୁସନ୍ଥଙ୍କ ଗହଣରେ ଭକ୍ତିମୟ ହ ହୋଇଛି ପରିବେଶ ।