୪୦ ଦିନର ମାରାଥନ ଶୁଣାଣି ଶେଷ, ଅଯୋଧ୍ୟା ରାୟ ସଂରକ୍ଷିତ ରଖିଲେ ସୁପ୍ରିମକୋର୍ଟ

ବିବାଦୀୟ ଅଯୋଧ୍ୟା ରାମ ଜନ୍ମଭୂମି-ବାବ୍ରୀ ମସଜିଦ୍ ଜମି ବିବାଦର ଦୈନିକ ଶୁଣାଣି ଶେଷ ହୋଇଛି । ପ୍ରଧାନ ବିଚାରପତିଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ ସାମ୍ବିଧାନିକ ଖଣ୍ଡପୀଠ ମାମଲାର ଶୁଣାଣି କରି ରାୟକୁ ସଂରକ୍ଷିତ ରଖିଛନ୍ତି । ଶୁଣାଣି ଶେଷ ପୂର୍ବରୁ ଜମି ଉପରେ ଅଧିକାର ଦାବି କରୁଥିବା ୩ ପକ୍ଷଙ୍କୁ କୋର୍ଟ ତିନି ଦିନ ସମୟ ଦେଇଥିଲେ । ମାମଲାକୁ ସରଳ କରିବା ପାଇଁ ତିନିଦିନ ମଧ୍ୟରେ ଲିଖିତ ତଥ୍ୟ ଦେବାକୁ କୋର୍ଟ କହିଥିଲେ ।
ଭାରତୀୟ ଇତିହାସରେ ଦ୍ୱିତୀୟ ଲମ୍ବା ମାମଲା ଭାବେ ଅଯୋଧ୍ୟା ମାମଲାର ଶୁଣାଣି ୪୦ ଦିନ ଧରି ଚାଲିଥିଲା । ଅଯୋଧ୍ୟାର ବିବାଦୀୟ ୨.୭୭ ଏକର ଜମିକୁ ତିନି ପକ୍ଷଙ୍କ ମଧ୍ୟରେ ସମାନ ଭାବେ ବାଣ୍ଟିଦେବାକୁ ୨୦୧୦ ମସିହା ସେପ୍ଟେମ୍ବର ୩୦ରେ ଆହ୍ଲାବାଦ ହାଇକୋର୍ଟ ରାୟ ଦେଇଥିଲେ । ଏହାକୁ ଚ୍ୟାଲେଞ୍ଜ କରି ହୋଇଥିବା ସମସ୍ତ ଆବେଦନର ଶୁଣାଣି ପାଇଁ ପ୍ରଧାନ ବିଚାରପତି ରଞ୍ଜନ ଗୋଗୋଇଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ ଖଣ୍ଡପୀଠରେ ଥିଲେ ଜଷ୍ଟିସ୍ ଏ.ସ୍ଏ ବୋବଡେ, ଜଷ୍ଟିସ୍ ଡି.ୱାଇ ଚନ୍ଦ୍ରଚୁଡ଼, ଜଷ୍ଟିସ ଏସ.ଏ. ନାଜିର ଓ ଜଷ୍ଟିସ ଅଶୋକ ଭୂଷଣ।
ପ୍ରଧାନ ବିଚାରପତି ଜଷ୍ଟିସ ରଞ୍ଜନ ଗୋଗୋଇଙ୍କ ଅବସର ପୂର୍ବରୁ ସର୍ବୋଚ୍ଚ ନ୍ୟାୟାଳୟ ନଭେମ୍ବର ୧୭ ସୁଦ୍ଧା ଅଯୋଧ୍ୟା ମାମଲା ଉପରେ ଚୂଡ଼ାନ୍ତ ରାୟ ପ୍ରକାଶ କରିବେ ବୋଲି ଆଶା କରାଯାଉଛି । ତେବେ, ଆସନ୍ତୁ ନଜର ପକାଇବା ଲଗାତାର ୪୦ ଦିନର ଶୁଣାଣି ବେଳେ ହିନ୍ଦୁ ଓ ମୁସଲିମ ପକ୍ଷଙ୍କ ତରଫରୁ କଣ ସବୁ ଯୁକ୍ତି ଉପସ୍ଥାପନ କରାଯାଇଥିଲା।
ହିନ୍ଦୁ ପକ୍ଷଙ୍କ ଯୁକ୍ତି
୧) ବହୁ ଶତାବ୍ଦୀ ପୂର୍ବରୁ ଏଠାରେ ମନ୍ଦିର ନିର୍ମାଣ ହୋଇଥିଲା।ଏକାଦଶ ଶତାବ୍ଦୀରେ ରାଜା ବିକ୍ରମାଦିତ୍ୟ ଏହାକୁ ନିର୍ମାଣ କରିଥିଲେ । ମନ୍ଦିରକୁ ୧୫୨୬ ମସିହାରେ ବାବର କିମ୍ବା ସପ୍ତଦଶ ଶତାବ୍ଦୀରେ ଔରଙ୍ଗଜେବ ଧ୍ୱଂସ କରି ଦେଇଥିଲେ ।
୨) କିମ୍ବଦନ୍ତୀ, ଐତିହ୍ୟ ସ୍କନ୍ଧ ପୁରାଣ ଅନୁସାରେ ଅଯୋଧ୍ୟା ପ୍ରଭୁ ରାମଙ୍କ ଜନ୍ମଭୂମି । ଜନ ମାନସରେ ମଧ୍ୟ ଏହା ବିଶ୍ୱାସ ରହିଛି ।
୩) ମସଜିଦରେ ଲେଖା ଯାଇଥିବା ଇସଲାମିକ ବାର୍ତ୍ତା ପବିତ୍ର କୋରାନ୍ ଓ ହଦିଥର ଉଲ୍ଲଂଘନ କରୁଛି ।
୪) ସାକ୍ଷ୍ୟ, ପ୍ରମାଣକୁ ବିଶ୍ୱାସକୁ ନେଲେ ବହୁ ଶତାବ୍ଦୀ ତଳେ ଅଯୋଧ୍ୟାରେ ପ୍ରଭୁ ରାମ ଜନ୍ମଗ୍ରହଣ କରିଥିଲେ ।
୫) ଏଏସ୍ଆଇ ବା ଭାରତୀୟ ପ୍ରତ୍ନତତ୍ତ୍ୱ ବିଭାଗର ଏକ ରିପୋର୍ଟ ଅନୁସାରେ ଉକ୍ତ ସ୍ଥାନରେ ଥିବା ଭବ୍ୟ ମନ୍ଦିରକୁ ଧ୍ୱଂସ କରି ଦିଆଯାଇଛି ।
ମୁସଲିମ ପକ୍ଷଙ୍କ ଯୁକ୍ତି
୬) ବିବାଦୀୟ ସ୍ଥାନରେ ୧୫୨୮ ମସିହାରୁ ମସଜିଦ ରହିଛି।ଏହା ଉପରେ ୧୮୫୫ ମସିହାରେ ଆକ୍ରମଣ ହୋଇଥିବା ରେକର୍ଡ କହୁଛି । ୧୯୩୪ ମସିହାରେ ଏନେଇ ମକଦ୍ଦମା ରୁଜୁ ହୋଇଥିଲା।
୭) ମସଜିଦକୁ ବାବର ଦେଇଥିବା ଅନୁଦାନକୁ ବ୍ରିଟିଶ ସରକାର ସ୍ୱୀକୃତି ଦେଇଥିଲେ । ଯାହାକୁ ନବାବ ଚାଲୁ ରଖିଥିଲେ ।
୮) ବିଭିନ୍ନ ତଥ୍ୟ ଅନୁସାରେ ୧୮୮୫ ମସିହା ପର୍ଯ୍ୟନ୍ତ ଏଠାରେ ମସଜିଦ୍ ରହିଥିଲା । ଏପରିକି ମୁସଲମାନମାନେ ୧୯୪୯ ମସିହା ଡିସେମ୍ବର ୨୨ ଓ ୨୩ରେ ଏହି ବିବାଦୀୟ ସ୍ଥାନରେ ଇଦ୍ ପ୍ରାର୍ଥନା କରିଥିଲେ ।
୯) ଐତିହାସିକ ଓ ଗେଜେଟରେ ଉପସ୍ଥାପିତ ମତ ମସଜିଦର ଉପସ୍ଥିତିକୁ ଦୁର୍ବଳ କରିବା । ହିନ୍ଦୁ ଧର୍ମର ପ୍ରାର୍ଥନାକୁ ପ୍ରମାଣ ଭାବେ ଗ୍ରହଣ କରିବା ଅନୁଚିତ୍ ବୋଲି ମୁସଲମାନ୍ ପକ୍ଷ ଦାବି କରିଛି ।
୧୦) ଏଏସ୍ଆଇ ରିପୋର୍ଟ ଅନୁସାରେ ମସଜିଦ ପୂର୍ବରୁ ଏଠାରେ ମନ୍ଦିରର ଢାଞ୍ଚା ଥିଲା । ଯାହା କାଳ୍ପନିକ ଏହାର କୌଣସି ବୈଜ୍ଞାନିକ ସତ୍ୟତା ନାହିଁ ବୋଲି ଦାବି ହୋଇଛି ।
')}