୧୦୦ ଫୁଟ୍ ତଳକୁ ଖସିଲା ଯାତ୍ରୀବାହୀ ଅଟୋ, ଘରକୁ ଫେରୁଥିଲେ ୧୫ ଶ୍ରମିକ

ଗଜପତି: ଗଜପତି ଜିଲ୍ଲାର କାଶୀନଗର ବ୍ଲକ ପାର୍ତଡ଼ା ନିକଟ ଲୁହାଜଲ ନାଳ ଘାଟିରେ ବଡ଼ ଦୁର୍ଘଟଣା ଘଟିଛି । ଶ୍ରମିକଙ୍କୁ ନେଇ ଫେରୁଥିବା ଏକ ଅଟୋ ରିକ୍ସା ଲୁହାଜଲ ଘାଟି ଉଠି ନପାରି ୧୦୦ ଫୁଟ୍ ତଳକୁ ଖସିପଡ଼ିଛି । ଏଥିରେ ୩ ଶିଶୁଙ୍କ ସମେତ ୮ ଜଣ ଗୁରୁତର ଥିବା ବେଳେ ୪ ଜଣ ଆହତ ହୋଇଛନ୍ତି । ଅଟୋରେ ୧୫ ଜଣ ଶ୍ରମିକ ଥିଲେ ।

ପାଞ୍ଚ ମାଇଲ ରାଗାଇସିଂ ଠାରୁ ଅଡେଇସିଂ ଗାଁକୁ ୧୫ ଜଣ ଶ୍ରମିକଙ୍କୁ ନେଇ ଅଟୋଟି ଯାଉଥିଲା । ଲୁହାଜଲ ନାଳ ଘାଟି ଉଠିବା ବେଳେ ଭାରସାମ୍ୟ ହରାଇଥିଲା ଅଟୋଟି । ଫଳରେ ୧୦୦ ଫୁଟ୍ ତଳକୁ ଖସି ପଡ଼ିଥିଲା । ଖବର ପାଇ ଅଡାଇସିଂ ଗାଁ ଲୋକ ଆମ୍ବୁଲାନ୍ସକୁ ଖବର ଦେଇଥିଲେ । ସମସ୍ତଙ୍କୁ ଉଦ୍ଧାର କରାଯାଇ ପାରଳାଖେମୁଣ୍ଡି ଜିଲ୍ଲା ଚିକିତ୍ସାଳୟରେ ଭର୍ତ୍ତି କରାଯାଇଛି ।

୫ ବର୍ଷୀୟା ଚାନ୍ଦିନୀ ଗମାଙ୍ଗର ଗୋଡ଼ ଭାଙ୍ଗି ଯାଇଥିବା ବେଳେ ୩ ବର୍ଷୀୟା ପ୍ରିଞ୍ଜିଲିନା ଗମାଙ୍ଗଙ୍କ ମୁଣ୍ଡରେ ଗୁରୁତର ଆଘାତ ଲାଗିଛି । ଅଟୋରେ ନିର୍ଦ୍ଧାରିତ ଯାତ୍ରୀଙ୍କ ଠାରୁ ଅଧିକ ଶ୍ରମିକ ଥିଲେ । ଫଳରେ ଅଟୋଟି ଘାଟି ରାସ୍ତାରେ ଉପରକୁ ଉଠିନପାରି ଓଲଟି ପଡ଼ିଥିଲା ।