ଘରୋଇ ସ୍କୁଲ କର୍ତ୍ତୃପକ୍ଷଙ୍କ ଦାଦାଗିରି, ରି-ଆଡମିଶନ ଫି ଦେବା ପାଇଁ ବାଧ୍ୟ କରୁଛନ୍ତି କର୍ତ୍ତୃପକ୍ଷ
ଭୁବନେଶ୍ୱର: ସ୍କୁଲ ଫି ଦିଅ, ନହେଲେ ଅନଲାଇନ କ୍ଲାସରେ ବସି ପାରିବ ନାହିଁ । ଫି ନଦେଲେ ପାଠ ପଢ଼ି ପାରିବେ ନାହିଁ ଛାତ୍ରଛାତ୍ରୀ । ଏ ଭଳି ଧମକ ଆଉ କାହାର ନୁହେଁ । ରାଜଧାନୀରେ ଗଢ଼ି ଉଠିଥିବା ବଡ଼ ବଡ଼ ପ୍ରାଇଭେଟ ସ୍କୁଲର ଦବଙ୍ଗଗିରି । ଘରୋଇ ସ୍କୁଲ କର୍ତ୍ତୃପକ୍ଷ ଛାତ୍ରଛାତ୍ରୀଙ୍କ ଅଭିଭାବକଙ୍କୁ ଦେଉଛନ୍ତି ଏଭଳି ଧମକ । ୟେ ହେଉଛି ଧମକ ଦେଇଥିବା ମେସେଜ ।
ଏହାରି ବିରୋଧରେ ଭୁବନେଶ୍ୱର ସହିଦ ନଗର ଥାନାରେ ଏତଲା ଦେଇଛନ୍ତି ଅଭିଭାବକ । ଓଡିଶା ହାଇକୋର୍ଟ ସ୍କୁଲ ଫିକୁ ନେଇ ଏକ ରାୟ ଶୁଣାଇଥିଲା । କରୋନା ସମୟରେ ସ୍କୁଲ ଫି ପାଇଁ ସ୍କୁଲର ଅଭିଭାବକ ବାଧ୍ୟ କରିପାରିବେ ନାହିଁ କି କ୍ଲାସରୁ ବଞ୍ଚିତ କରିପାରିବେ ନାହିଁ । କିନ୍ତୁ ଫିକୁ ନେଇ ସ୍କୁଲ କର୍ତ୍ତୃପକ୍ଷ ଆରମ୍ଭ କରିଦେଲେଣି ଦାଦାଗିରି । ଘରୋଇ ସ୍କୁଲର ମନ୍ମାନିକୁ ବିରୋଧ କରିଛି ଓଡ଼ିଶା ଅଭିଭାବକ ମହାସଂଘ ।
ଏହି ଧମକପୂର୍ଣ୍ଣ ମେସେଜ ସଂପର୍କରେ ଆମେ ପ୍ରଭୁଜୀ ଇଂଲିଶ ମିଡିୟମ ସ୍କୁଲର ପ୍ରିନ୍ସିପାଲଙ୍କ ସହ ଯୋଗାଯୋଗ କରିଥିଲୁ । ଫି ନନେଲେ ଅନୁଷ୍ଠାନ କେମିତି ଚଳାଇବୁ ବୋଲି ଓଲଟା ପ୍ରଶ୍ନ କରିଛନ୍ତି ପ୍ରିନ୍ସିପାଲ । ସମସ୍ତେ ନେଉଛନ୍ତି ଆମେ ବି ନେବୁ ବୋଲି ସେ କହିଛନ୍ତି ।
ବର୍ତ୍ତମାନର ପରିସ୍ଥିତିରେ କୌଣସି ବିଦ୍ୟାଳୟ ଛାତ୍ରଛାତ୍ରୀଙ୍କୁ ଅନଲାଇନ କ୍ଲାସରୁ ବଞ୍ଚିତ କରିପାରିବେ ନାହିଁ ବୋଲି ହାଇକୋର୍ଟ ପୂର୍ବରୁ କହିଥିଲେ । କିନ୍ତୁ ହାଇକୋର୍ଟଙ୍କୁ ଅବମାନନା କରି ବହୁ ସ୍କୁଲ ଏଭଳି ନିଷ୍ପତ୍ତି ନେଉଥିବା ଅଭିଯୋଗ ହୋଇଛି
