ରାଜ୍ୟର ଉପାନ୍ତ ଅଞ୍ଚଳ ଗସ୍ତ କରିବ ଗୃହ କମିଟି, ପରଖିବ ଓଡ଼ିଆ ଭାଷାରେ ପାଠପଢ଼ା ସ୍ଥିତି
ଭୁବନେଶ୍ୱର: ରାଜ୍ୟର ଉପାନ୍ତ ଅଞ୍ଚଳରେ ଓଡ଼ିଆ ଭାଷାରେ ପାଠପଢ଼ା କିପରି ଚାଲିଛି ? ଏହାର ତଦାରଖ କରିବ ବିଧାନସଭା ଗୃହ କମିଟି । ଖୁବଶୀଘ୍ର କମିଟି ଏସବୁ ଅଞ୍ଚଳ ଗସ୍ତ କରି ସ୍ଥିତି ଅନୁଧ୍ୟାନ କରିବ । ସ୍କୁଲ ଗୁଡ଼ିକରେ ଓଡ଼ିଆ ଭାଷାରେ ପାଠପଢ଼ା, ଓଡ଼ିଆ ପୁସ୍ତକ ପହଞ୍ଚିଛି କି ନାହିଁ ? କେତେ ଓଡ଼ିଆ ଶିକ୍ଷକ ଅଛନ୍ତି ? ପ୍ରତି ୩ ମାସରେ ବିଇଓ ଏନେଇ ରିପୋର୍ଟ ଦେବେ । ରାଜ୍ୟ ସ୍ତରରେ ଜଣେ ନୋଡାଲ ଅଫିସର ଏସବୁର ତଦାରଖ କରିବେ । ଆଜି ଗୃହ କମିଟି ବୈଠକରେ ଏନେଇ ବିସ୍ତୃତ ଆଲୋଚନା ହୋଇଛି ।
ଛତିଶଗଡ଼ରେ ଓଡ଼ିଆ ଶିକ୍ଷକ ନିଯୁକ୍ତି ହେଉନାହିଁ । ଶିକ୍ଷକ ନିଯୁକ୍ତି ନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗକୁ ଚିଠି ଲେଖାଯିବ । ସେହିପରି ଝାଡ଼ଖଣ୍ଡରେ ଯେପରି ଓଡ଼ିଆକୁ ଦ୍ୱିତୀୟ ରାଜ୍ୟଭାଷା ସମ୍ମାନ ନଦେଇ କାଟି ଦିଆଯାଇଛି, ସେ ନେଇ ଅନୁଧ୍ୟାନ ପାଇଁ ଗୃହ କମିଟି ଗସ୍ତ କରିବ । ବାଚସ୍ପତି ନିର୍ଦ୍ଦେଶ ଦେଇଛନ୍ତି ଯେ, କମିଟି ଗସ୍ତ କରି ବୁଝିବ, କାହିଁକି ଝାଡ଼ଖଣ୍ଡରେ ଏପରି ସ୍ଥିତି ଉପୁଜିଲା ।
ଝାଡ଼ଖଣ୍ଡ ଓ ଛତିଶଗଡ଼ ରାଜ୍ୟରେ ଓଡ଼ିଆ ଭାଷାର ପ୍ରଚଳନ ଓ ସ୍କୁଲରେ ଓଡ଼ିଆ ପାଠପଢ଼ାକୁ ଅଣଦେଖା କରାଯାଉଛି । ଏପରିକି କିଛି ରାଜ୍ୟରେ ଓଡ଼ିଆ ଭାଷାକୁ ଦ୍ୱିତୀୟ ଭାଷାରୁ ବାଦ ଦିଆଯାଇଛି । ସେଠାରେ ଓଡ଼ିଆ ଶିକ୍ଷକମାନଙ୍କୁ କମ୍ ଦରମା ଦିଆଯାଉଥିବାରୁ ଦରମା ବୃଦ୍ଧି ପାଇଁ ପ୍ରସ୍ତାବ ଦେଇଛି ଗୃହ କମିଟି ।
