ନିର୍ଦ୍ଧାରିତ ସମୟରେ ହେବ ଉତ୍ତର ପ୍ରଦେଶ ବିଧାନସଭା ନିର୍ବାଚନ

ନୂଆଦିଲ୍ଲୀ: ନିର୍ଦ୍ଧାରିତ ସମୟରେ ହେବ ଉତ୍ତର ପ୍ରଦେଶ ବିଧାନସଭା ନିର୍ବାଚନ । ବିଧାନସଭା ନିର୍ବାଚନ ନେଇ ରାଜ୍ୟର ସମସ୍ତ ରାଜନୈତିକ ଦଳ ସହମତ ଅଛନ୍ତି ବୋଲି କହିଛନ୍ତି ମୁଖ୍ୟ ନିର୍ବାଚନ କମିଶନର ସୁଶୀଲ ଚନ୍ଦ୍ରା । ମୁଖ୍ୟ ନିର୍ବାଚନ କମିଶନର ସୁଶୀଲ ଚନ୍ଦ୍ରା କହିଛନ୍ତି କି ପ୍ରାୟ ସମସ୍ତ ଦଳ ନିର୍ବାଚନ ସପକ୍ଷରେ ରହିଛନ୍ତି । କରୋନା କଟକଣା ଭିତରେ ବିଧାନସଭା ନିର୍ବାଚନ ହେବ ବୋଲି କହିଛନ୍ତି ସୁଶୀଲ ଚନ୍ଦ୍ରା । ଉତ୍ତର ପ୍ରଦେଶରେ ୧୧ ହଜାର ଅଧିକ ପୋଲିଂ ବୁଥରେ ଭୋଟ ଗ୍ରହଣ ହେବ । ରାଜ୍ୟରେ ୫୨ ଲକ୍ଷ ୮୦ ହଜାର ନୂଆ ଭୋଟର ଯୋଡ଼ି ହୋଇଥିବାବେଳେ ପ୍ରତି ବୁଥ୍ ଲାଗି ଭୋଟରଙ୍କ ସଂଖ୍ୟା ହ୍ରାସ କରାଯାଇଛି । ପ୍ରତି ୧୨୦୦ ଭୋଟରଙ୍କ ଲାଗି ଗୋଟିଏ ବୁଥ୍ ଗଠନ ହେବ ବୋଲି କହିଛନ୍ତି ସୁଶୀଲ ଚନ୍ଦ୍ରା ।

Representatives of all political parties met us and told us that elections should be conducted on time following all COVID19 protocols: Chief Election Commissioner Sushil Chandra on 2022 UP Assembly elections pic.twitter.com/0xmDP9rwH1

— ANI UP/Uttarakhand (@ANINewsUP) December 30, 2021

ଏଥି ସହ ଯେଉଁମାନେ କୋଭିଡ ସଂକ୍ରମିତ ଥିବେ ସେମାନେ ଘରେ ରହି ଭୋଟ ଦେବା ପାଇଁ ବ୍ୟବସ୍ଥା କରାଯାଇଛି । ସେହିପରି ୮୦ ବର୍ଷରୁ ଅଧିକ ବୟସ୍କ ଘରେ ରହି ଭୋଟ ଦେବା ବ୍ୟବସ୍ଥା ମଧ୍ୟ କରାଯାଇଛି । ସମ୍ପୂର୍ଣ୍ଣ ଡୋଜ ନେଇଥିବା କର୍ମଚାରୀ ପୋଲିଂ ଟିମରେ ସାମିଲ ହେବେ । ନିର୍ବାଚନ ହେବାକୁ ରାଜ୍ୟଗୁଡିକରେ ଟିକାକରଣକୁ ଗୁରୁତ୍ବ ଦିଆଯିବ ବୋଲି ସେ କହିଛନ୍ତି । ଆସନ୍ତା ଜାନୁଆରୀ ୫ରେ ପ୍ରକାଶିତ ହେବ ଚୂଡାନ୍ତ ଭୋଟର ତାଲିକା । ସକାଳ ୮ଟାରୁ ସନ୍ଧ୍ୟା ୬ଟା ଯାଏ ଭୋଟ ଗ୍ରହଣ ଚାଲିବ ବୋଲି କହିଛନ୍ତି ମୁଖ୍ୟ ନିର୍ବାଚନ କମିଶନର ।