ଗମ୍ଭୀର ହେବାରେ ଲାଗିଛି ଉତ୍ତର-ପୂର୍ବାଞ୍ଚଳରେ ବନ୍ୟା ପରିସ୍ଥିତି, ୨୯ରେ ପହଞ୍ଚିଲା ମୃତକଙ୍କ ସଂଖ୍ୟା

ଦିସପୁର: ଗମ୍ଭୀର ହେବାରେ ଲାଗିଛି ଉତ୍ତର-ପୂର୍ବାଞ୍ଚଳରେ ବନ୍ୟା ପରିସ୍ଥିତି । ବନ୍ୟାରେ ମୃତକଙ୍କ ସଂଖ୍ୟା ୨୯ରେ ପହଞ୍ଚିଛି । ଆସାମ, ମେଘାଳୟ ଓ ଅରୁଣାଚଳ ପ୍ରଦେଶରେ ବନ୍ୟା ସ୍ଥିତିରେ ସୁଧାର ଆସିନାହିଁ । ବନ୍ୟା ଓ ବାରମ୍ବାର ଭୂସ୍ଖଳନ ଯୋଗୁ ଜନଜୀବନ ବିପର୍ଯ୍ୟସ୍ତ ହୋଇଛି । କେବଳ ଆସାମରେ ମୃତ୍ୟୁ ସଂଖ୍ୟା ୧୮ରେ ପହଞ୍ଚିଛି ଏବଂ ହଜାର ହଜାର ଲୋକ ରିଲିଫ ଶିବିରରେ ରହିଛନ୍ତି ବୋଲି କହିଛି ଆସାମ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ।

ଗତ ୧୪ ତାରିଖଠାରୁ ଲାଗି ରହିଥିବା ବନ୍ୟା ପରିସ୍ଥିତିରେ ପ୍ରାୟ ୭ ଲକ୍ଷ ଲୋକ ଏବେ ବି ଜଳବନ୍ଦୀ ରହିଛନ୍ତି । ମେଘାଳୟରେ ୩ ଜଣ ଓ ଅରୁଣାଚଳ ପ୍ରଦେଶରେ ୮ ଜଣ ପ୍ରାଣ ହରାଇଛନ୍ତି । ଅରୁଣାଚଳ ପ୍ରଦେଶର କୁରୁଙ୍ଗ କୁମି ଜିଲ୍ଲା ଅଧିକ ପ୍ରଭାବିତ ହୋଇଛି । ଫ୍ଲାସ୍ ଫ୍ଲଡ ଯୋଗୁ ଅନେକ ସ୍ଥାନରେ ଜଳବନ୍ଦୀ ଲୋକଙ୍କ ସଂଖ୍ୟା ବୃଦ୍ଧି ପାଇଛି ।