ରାଜସ୍ଥାନ ପଲିଟିକାଲ୍ ଡ୍ରାମା : ପୁଣି ମନ୍ତ୍ରୀ ପରିଷଦ ବୈଠକ, ବିଧାନସଭା ଅଧିବେଶନ ପାଇଁ କସରତ

ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ବିଧାନସଭା ଅଧିବେଶନ ବସାଇବା ଜିଦ୍ଦିରେ ଅଟଳ ରହିଛନ୍ତି । କରୋନା ମହାମାରୀ ସମୟରେ ମଧ୍ୟ ସଚିନ ପାଇଲଟଙ୍କୁ ରାଜନୀତିକ ସ୍ତରରେ ମାତ୍ ଦେବା ସହ ନିଜ ସରକାରର ସଂଖ୍ୟା ଗରିଷ୍ଠତା ପ୍ରମାଣ କରିବା ପାଇଁ ସେ ପାରୁ ପର୍ଯ୍ୟନ୍ତ ପ୍ରୟାସ କରୁଛନ୍ତି । ଏହି ବାବଦୀୟ ଆଲୋଚନା ପାଇଁ ଗତ ୧୨ ଘଣ୍ଟା ମଧ୍ୟରେ ସେ ୨ୟ ଥର ପାଇଁ କ୍ୟାବିନେଟ୍ ବୈଠକର ଡାକରା ଦେଇ ସାରିଛନ୍ତି । ପୂର୍ବରୁ ରାଜ୍ୟପାଳ  କଲରାଜ ମିଶ୍ର କରୋନା ବେଳେ ବିଧାନସଭା ଅଧିବେଶନକୁ ନେଇ ପ୍ରଶ୍ନ ଉଠାଇଥିବା ହେତୁ ବାଧ୍ୟ ହୋଇ ରାଜସ୍ଥାନ ସରକାର ପୁଣି ଥରେ କ୍ୟାବିନେଟ ବୈଠକ ବସାଇ ଏନେଇ ଆଲୋଚନା କରୁଥିବା ଜଣାପଡିଛି ।   ତେବେ ବୈଠକରେ କ୍ୟାବିନେଟ ସାନି ଏକ ପ୍ରସ୍ତାବକୁ ମଞ୍ଜୁର କରି ରାଜ୍ୟପାଳଙ୍କ ପାଖକୁ ପଠାଇବା ପାଇଁ ନିଷ୍ପତ୍ତି ନିଆଯାଇଛି ।

ତେବେ ଗୁରୁବାର ଦିନ ରାତ୍ରିରେ ଅଶୋକ ଗେହଲଟଙ୍କ ବାସଭବନରେ କ୍ୟାବିନେଟ୍ ବୈଠକ ବସିଥିଲା  । ରାତ୍ରି ୯ଟାରୁ ଆରମ୍ଭ ହୋଇଥିବା ଏହି ବୈଠକ ବିଳମ୍ୱିତ ରାତ୍ରି ପର୍ଯ୍ୟନ୍ତ ଚାଲିଥିଲା । ଆଲୋଚନା ଶେଷ ନହୋଇ ପାରିବାରୁ ଗେହଲଟ୍ ବାଧ୍ୟ ହୋଇ ଆଜି ୪ଟା ବେଳେ ପୁଣି ଥରେ କ୍ୟାବିନେଟ ବୈଠକ ବସାଉଛନ୍ତି । ସୂଚନା ଅନୁଯାୟୀ, ବୈଠକରେ ପ୍ରସ୍ତୁତ ହୋଇଥିବା ସଂଶୋଧିତ ପ୍ରସ୍ତାବ ରାଜ୍ୟପାଳଙ୍କ ପାଖକୁ ପଠାଇ ପୁଣି ଥରେ ବିଧାନସଭା ଅଧିବେଶନ ପାଇଁ ଅନୁମତି ମଗାଯିବ । ତେବେ ଆଶୋକ ଗେହଲଟ ନିଜ ସଂଖ୍ୟା ଗରିଷ୍ଠତା ଦର୍ଶାଇବା ପାଇଁ ବିଧାନସଭା ଅଧିବେଶନ ପାଇଁ ଅଡି ବସିଛନ୍ତି । ତେବେ ଚର୍ଚ୍ଚା ଏହା ମଧ୍ୟ ହେଉଛି ଯେ, କଂଗ୍ରେସ ବିଧାନସଭା ଅଧିବେଶନରେ ହ୍ୟୁପି ଜାରି କରିପାରେ । ଏଭଳି ହେବା ଦ୍ୱାରା ଦଳ ବିରୁଦ୍ଧରେ ଭୋଟ ଦେବା କିମ୍ୱା ଭୋଟ ପାଇଁ ଅନୁପସ୍ଥିତ ରହିବା ନେତାଙ୍କ ବିରୋଧରେ ରାଜ୍ୟ କଂଗ୍ରେସ କାର୍ଯ୍ୟାନୁଷ୍ଠାନ ହେବା ସହଜ ହେବ ।