ଖେରି ଚାଷୀ ହତ୍ୟାର ମାଷ୍ଟର୍ ମାଇଣ୍ଡ ଆଶିଷ ମିଶ୍ରା
1 min read
ଲକ୍ଷ୍ନୌ: ବିଜେପି ଓ କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ପାଇଁ ବଢ଼ିଲା ଅଡୁଆ । ଲଖିମପୁର ଖେରି ଚାଷୀ ହତ୍ୟା ଯୋଜନାବଦ୍ଧ । ହତ୍ୟାର ମାଷ୍ଟର୍ ମାଇଣ୍ଡ ତଥା ମୁଖ୍ୟ ଅଭିଯୁକ୍ତ ହେଉଛନ୍ତି କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଆଶିଷ । ଆଜି ଦାଖଲ ହୋଇଥିବା ଖେରି ହତ୍ୟା ମାମଲାର ଚାର୍ଜସିଟରେ ଏମିତି ଉଲ୍ଲେଖ କରିଛି ତଦନ୍ତକାରୀ ସ୍ପେଶାଲ ଇନଭେଷ୍ଟିଗେଟିଂ ଟିମ୍ ।
ଖେରି ମାମଲାକୁ ନେଇ ତଦନ୍ତକାରୀ ଦଳ ୫ ହଜାର ପୃଷ୍ଠାର ଚାର୍ଜସିଟ୍ ଦାଖଲ କରିଛନ୍ତି । ଏଥିରେ ଖେରି ମାମଲାକୁ ଯୋଜନାବଦ୍ଧ ହତ୍ୟା ଦର୍ଶା ଯାଇଛି । ଚାର୍ଜସିଟରେ କେନ୍ଦ୍ରମନ୍ତ୍ରୀଙ୍କ ପୁଅ ଆଶିଷଙ୍କୁ ମୁଖ୍ୟ ଅଭିଯୁକ୍ତ ଦର୍ଶା ଯାଇଥିବା ବେଳେ ମନ୍ତ୍ରୀଙ୍କ ଆଉ ଜଣେ ସମ୍ପର୍କୀୟଙ୍କ ନାଁ ମଧ୍ୟ ରହିଛି । ସେ ହେଉଛନ୍ତି କେନ୍ଦ୍ରମନ୍ତ୍ରୀଙ୍କ ସମ୍ପର୍କୀୟ ବୀରେନ୍ଦ୍ର ଶୁକ୍ଳା । ବିରେନ୍ଦ୍ର ପ୍ରମାଣ ନଷ୍ଟ କରିବାକୁ ଚେଷ୍ଟା କରୁଥିବା ଚାର୍ଜସିଟରେ ଉଲ୍ଲେଖ ରହିଛି । । ଚାର୍ଜସିଟ୍ ସହ ପେନଡ୍ରାଇଭ, DVD ଦାଖଲ କରିଛି ଏସଆଇଟି ।
ସୂଚନାଯୋଗ୍ୟ, ଖେରି ମାମଲାକୁ ନେଇ କେନ୍ଦ୍ରମନ୍ତ୍ରୀ ଓ ତାଙ୍କ ପୁଅକୁ ବିଜେପି ଘଣ୍ଟ ଘୋଡାଉ ଥିବା ଅଭିଯୋଗ ହୋଇ ଆସୁଛି । ଘଟଣା ଦିନରୁ ମନ୍ତ୍ରୀଙ୍କ ଇସ୍ତଫାଠାରୁ ଆରମ୍ଭ କରି ବହିଷ୍କାର ଦାବି କରି ଆସୁଛନ୍ତି ବିରୋଧୀ । ହେଲେ ବିଜେପି କେନ୍ଦ୍ରୀୟ ଟିମ୍ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନେଇନାହିଁ ।
ଲଖିମପୁର ଖେରିର ଇଏ ସେହି ଚାଷୀ ହତ୍ୟା ଯାହା ଅହଂକାରୀ ବିଜେପି ସରକାରଙ୍କ ମୂଳ ଦୋହଲାଇ ଦେଇଛି । ଇଏ ସେହି ହତ୍ୟା ଯାହା ବର୍ଷ ଧରି ଚାଲି ଆସିଥିବା ଚାଷୀ ଆନ୍ଦୋଳନକୁ ଦେଇଥିଲା ନୂଆ ଦିଗ । ଇଏ ସେହି ହତ୍ୟା ଯାହା ୩ କଳା ଆଇନ୍ ପ୍ରତ୍ୟାହାର କରି ଚାଷଙ୍କୁ ଶାନ୍ତ କରିବାକୁ ଅହଂକାରୀ ବିଜେପି ସରକାରକୁ କରିଥିଲା ବାଧ୍ୟ । ଏବେ ଏସଆଇଟିର ଚାର୍ଜସିଟରେ କେନ୍ଦ୍ରମନ୍ତ୍ରୀଙ୍କ ପୁଅ ଓ ସମ୍ପର୍କୀୟଙ୍କ ନାଁ ବିଜେପିକୁ ପୁଣି ଅଡୁଆରେ ପକାଇବାକୁ ଯାଉଛି । ବିଜେପି ବଡ଼ପଣ୍ଡାମାନେ କେନ୍ଦ୍ରମନ୍ତ୍ରୀ ଓ ତାଙ୍କ ମଣିଷ ମରା ପୁଅକୁ କେତେଦିନ ଘଣ୍ଟ ଘୋଡାଇ ରଖୁଛନ୍ତି ଦେଖିବାକୁ ବାକି ରହିଲା ।
