କରୋନା ଟିକା ନେଇ ଯାଇଥିବା ଆଶା ଓ ଅଙ୍ଗନବାଡି ଦିଦିଙ୍କୁ ଅଟକ ରଖିଲେ ଗ୍ରାମବାସୀ
ଭୁବନେଶ୍ୱର: ମୟୂରଭଞ୍ଜ ଜିଲ୍ଲା ଉଦଳା ବ୍ଳକ୍ ବଡ଼ଖମଣା ପଞ୍ଚାୟତର ତାଳସେରୀ ଗାଁରେ ଅଭାବନୀୟ ଘଟଣା । କରୋନା ଟିକାକୁ ବାରଣ କରି ଆଶାକର୍ମୀ ଓ ଅଙ୍ଗନଓ୍ୱାଡି ଦିଦିଙ୍କୁ ଅଟକ ରଖିଲେ ଗ୍ରାମବାସୀ । ଗାଁର ୧୨ଜଣଙ୍କୁ ଦିନକ ପୂର୍ବରୁ କରୋନା ଟିକା ଦିଆଯାଇଥିଲା । ଗତକାଲି ଗ୍ରାମରେ ଅବଶିଷ୍ଟ ଲୋକଙ୍କୁ ଟିକା ଦେବା ପାଇଁ ଯାଇଥିବା ଆଶାକର୍ମୀ ଓ ଅଙ୍ଗନବାଡିକର୍ମୀଙ୍କୁ ଅଟକ ରଖିଥିଲେ ଗ୍ରାମବାସୀ ।
ଟିକା ନେଲେ ଅସୁସ୍ଥ ହେବା ଭୟରେ ଗ୍ରାମବାସୀ ଏଭଳି କରିଥିବା ଜଣାପଡ଼ିଛି । ଲୋକମାନେ ସୁସ୍ଥ ଥିବାବେଳେ କ’ଣ ପାଇଁ ଟିକା ନେବେ ନାହିଁ ବୋଲି ପ୍ରଶ୍ନ କରିଥିଲେ ଆଶା କର୍ମୀ । ବର୍ତ୍ତମାନ ଧାନ କଟା ଚାଲୁଥିବାରୁ ଟିକା ନେଲେ ଲୋକ ଅସୁସ୍ଥ ହୋଇ ପଡ଼ିବେ । ଏହା ଦ୍ୱାରା ଚାଷ କାମାରେ ବାଧା ଉପୁଜିବ । ଏଭଳି ଆଶଙ୍କାରେ ଟିକା ନେଉନଥିବା ଜଣାପଡ଼ିଛି । ପ୍ରାୟ ୬ ଘଣ୍ଟା ଅଟକ ରହିବା ପରେ ଉଦଳା ବିଡ଼ିଓ, ତହସିଲଦାର ଓ ପୋଲିସ ପ୍ରଶାସନ ଘଟଣାସ୍ଥଳରେ ପହଞ୍ଚି ଗ୍ରାମବାସୀଙ୍କୁ ବୁଝାସୁଝା କରିବା ପରେ ଅଟକ ରହିଥିବା ଆଶା କର୍ମୀ ଓ ଅଙ୍ଗନବାଡି କର୍ମୀଙ୍କୁ ଉଦ୍ଧାର କରାଯାଇଥିଲା ।
