ଚିହ୍ନଟ ହେଲା ଆହୁରି ୨ହଜାର ୫୯୦ ନୂଆ କରୋନା ସଂକ୍ରମିତ, ମୃତ୍ୟୁ ସଂଖ୍ୟା ୩୬୦କୁ ବୃଦ୍ଧି
ଚୀନ୍ରେ ଆତଙ୍କ ଖେଳାଇଛି କରୋନା ଭାଇରସ୍ । ମୃତ୍ୟୁ ସଂଖ୍ୟା ୩୬୦କୁ ଛୁଇଁଛି । ବିଶ୍ୱ ସ୍ୱାସ୍ଥ୍ୟ ସଂଗଠନ ଓ ଚୀନ୍ ସରକାରଙ୍କ ଉଦ୍ୟମ ପରେ ବି କରୋନା ନିୟନ୍ତ୍ରଣକୁ ଆସୁନି । ଚୀନ୍ରେ ଗତ ୨୪ଘଣ୍ଟା ମଧ୍ୟରେ ପୁଣି ୫୪ଜଣଙ୍କ ମୃତ୍ୟୁ ହୋଇଛି ।
୨ହଜାର ୫୯୦ ନୂଆ କରୋନା ସଂକ୍ରମିତଙ୍କୁ ଚିହ୍ନଟ କରାଯାଇଛି । ଏହାସହ ସମଗ୍ର ବିଶ୍ୱରେ କରୋନା ଭୂତାଣୁ ସଂକ୍ରମିତଙ୍କ ସଂଖ୍ୟା ୧୪ ହଜାର ୩୮୦ରେ ପହଞ୍ଚିଛି । ଚୀନ୍ର ହୁବେଇ ସହର କରୋନା ଭାଇରସର କେନ୍ଦ୍ରସ୍ଥଳ ପାଲଟିଛି ।
କରୋନା ଭୟାବହତାକୁ ଦେଖି ଭାରତ ସରକାର ଚୀନରେ ରହୁଥିବା ଭାରତୀୟଙ୍କୁ ଦେଶକୁ ଫେରାଇ ଆଣିବାର ବନ୍ଦୋବସ୍ତ କରିଛନ୍ତି। ଦ୍ୱିତୀୟ ପର୍ଯ୍ୟାୟରେ ଚୀନର ଉହାନ ସହରରୁ ୩୨୩ ଜଣ ଭାରତୀୟଙ୍କୁ ଏୟାରଲିଫ୍ଟ କରିଛି ଭାରତ ।
ଦୁଇଟି ପର୍ଯ୍ୟାୟରେ ଚୀନରୁ ଏପର୍ଯ୍ୟନ୍ତ ୬୪୭ ଭାରତୀୟଙ୍କୁ ଦେଶକୁ ଫେରାଇ ଅଣାଯାଇଛି । କରୋନା ଭାଇରସର ପ୍ରଭାବକୁ ନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ ସାରା ବିଶ୍ୱରେ ଆଲର୍ଟ ଜାରି କରିବା ସହ ଏହାକୁ ମହାମାରୀ ଘୋଷଣା କରିଛି ।
ଭାରତ ସମେତ ବିଶ୍ୱର ୨୪ଟି ଦେଶ କରୋନା ଭାଇରସ ଦ୍ଵାରା ବିଶେଷ ଭାବରେ ପ୍ରଭାବିତ ହୋଇଛନ୍ତି । ଚୀନ୍ ଯିବା ନେଇ ଭାରତ ସରକାର ଆଡଭାଇଜରୀ ଜାରି କରିଛନ୍ତି। ଏଥିରେ ଭାରତୀୟଙ୍କୁ ଚୀନ୍ ନଯିବା ପାଇଁ ପରାମର୍ଶ ଦିଆଯାଇଛି।…
