କଲମ୍ବୋ: ଶ୍ରମିକ ପରିବାରରୁ ଟପ ପୋଷ୍ଟ। ଶ୍ରୀଲଙ୍କାର ନୂଆ ରାଷ୍ଟ୍ରପତି ଭାବେ ଆଜି ଶପଥ ନେବେ ଅନୁରା କୁମାର ଦିସାନାୟେକେ। ରାଷ୍ଟ୍ରପତି ନିର୍ବାଚନରେ ନ୍ଯାସନାଲ ପିପୁଲସ ପାୱାର ବା ଏନପିପି ପ୍ରାର୍ଥୀ ଅନୁରା ବିଜୟୀ ହୋଇଛନ୍ତି। ସମାଗି ଜନ ବାଲୱେଗାୟା ପ୍ରାର୍ଥୀ ସାଜିଥ ପ୍ରେମଦାସା ଓ ୟୁନାଇଟେ଼ଡ ନ୍ୟାସନାଲ ପାର୍ଟି ପ୍ରାର୍ଥୀ ତଥା ବର୍ତ୍ତମାନର ରାଷ୍ଟ୍ରପତି ରାନିଲ ବିକ୍ରମସିଂଘେ ପରାସ୍ତ ହୋଇଛନ୍ତି।
ଅନୁରାଙ୍କ ବିଜୟ ନେଇ ନିର୍ବାଚନ କମିଶନ ଘୋଷଣା କରିଛନ୍ତି। ଏହି ନିର୍ବାଚନରେ ନ୍ଯାସନାଲ ପିପୁଲ୍ସ ପାର୍ଟି ସହ ଜନତା ବିମୁକ୍ତି ପେରେମୁନା ବା ଜେଭିପି ସହ ମେଣ୍ଟ ହୋଇଥିଲା। ଶ୍ରୀଲଙ୍କାର କମ୍ଯୁନିଷ୍ଟ ଦଳ ଭାବେ ଜେଭିପି କାର୍ଯ୍ୟ କରୁଛି। ୨୧ ତାରିଖ ନିର୍ବାଚନରେ କୌଣସି ପ୍ରାର୍ଥୀ ୫୦ ପ୍ରତିଶତ ଭୋଟ ପାଇବାକୁ ସକ୍ଷମ ହୋଇ ନଥିବାରୁ ରାଷ୍ଟ୍ରପତି ନିର୍ବାଚନ ଆଇନ-୧୯୮୧ ଅନୁସାରେ ଦେଶରେ ଦ୍ବିତୀୟ ପ୍ରିଫେରେନ୍ସ କାଉଣ୍ଟ ହୋଇଥିଲା।
ଏହି ବ୍ଯବସ୍ଥା ଅନୁସାରେ ଯେଉଁ ପ୍ରାର୍ଥୀ ସବୁଠାରୁ କମ୍ ଭୋଟ ପାଇଥିବେ ସେମାନଙ୍କ ନାଁକୁ ବାଦ୍ ଦେବେ। ପ୍ରଥମ ନିର୍ବାଚନରେ ଦିସାନାୟେକେ ୪୯.୮ ପ୍ରତିଶତ, ପ୍ରେମଦାସା ୨୫.୮ ପ୍ରତିଶତ ଓ ରାନିଲ ୧୬.୪ ପ୍ରତିଶତ ଭୋଟ ପାଇଥିଲେ। ଅନୁରା ଦିସାନାୟେକେ ମାର୍କ୍ସବାଦୀ ଚିନ୍ତାଧାରାରେ ଦୀକ୍ଷିତ। ସେ ଶ୍ରମିକ ପରିବାରରୁ ଆସିଛନ୍ତି। ରାଷ୍ଟ୍ରପତି ନିର୍ବାଚନରେ ଭାଗ ନେଇଥିଲେ ୧ କୋଟି ୭୦ ଲକ୍ଷ ଭୋଟର। ଆଇଏମଏଫ ସହ ହୋଇଥିବା ବିବାଦୀୟ ୨.୯ ବିଲିୟନ ଡଲାରର ବେଲ ଆଉଟ ପ୍ଯାକେଜକୁ ନ ହଟାଇବା ଲାଗି ପ୍ରତିଶ୍ରୁତି ଦେଇଥିଲେ ଅନୁରା।
