ଗିରଫ ଆଇଏଫଏସ୍ ଅଭୟକାନ୍ତଙ୍କ ଖୋଲିଲା ଆଉ ଏକ କାରନାମା
1 min read
ବଲାଙ୍ଗିର: ଗିରଫ ଆଇଏଫଏସ ଅଫିସର ଅଭୟକାନ୍ତ ପାଠକଙ୍କ କଳା କାରନାମାର ଆଉ ଏକ ଫର୍ଦ୍ଦ । ବଲାଙ୍ଗିର କେନ୍ଦୁଲିଫ୍ ଡିଭିଜନର ସିସିଏଫ୍ ଥିବା ସମୟରେ ବିଡି କମ୍ପାନୀ ସହ ଚାଲିଥିଲା ମଧୁଚନ୍ଦ୍ରିକା । ଅହେତୁକ ଅନୁକମ୍ପା ପରବର୍ତ୍ତୀ ସମୟରେ ଧରା ମଧ୍ୟ ପଡ଼ିଥିଲା । ମୁଖ୍ୟ ବନ୍ୟପ୍ରାଣୀ ସଂରକ୍ଷକ ତାଙ୍କୁ ରିପୋର୍ଟ ମାଗିଥିଲେ । କିନ୍ତୁ ମୁଖ୍ୟ ବନ୍ୟପ୍ରାଣୀ ସଂରକ୍ଷକଙ୍କ ଚିଠିକୁ ଅତି ଚତୁରତାର ସହ ଅଫିସରୁ ଗାଏବ କରିଦେଇଛନ୍ତି ପାଠକ । ଆରଟିଆଇରୁ ମିଳିଥିବା ତଥ୍ୟ ଅନୁଯାୟୀ ୨୦୧୪-୧୫ ଗୋଟିଏ ସିଜିନରେ ୧୦କୋଟିରୁ ଅଧିକ ଟଙ୍କାର ଦୁର୍ନୀତି ହୋଇଥିବା ଜଣାପଡ଼ିଛି ।
ବଲାଙ୍ଗିର କେନ୍ଦୁପତ୍ର ମଣ୍ଡଳ ଅଧିନରେ ରହିଛି ୮ଟି କେନ୍ଦୁପତ୍ର ଡିଭିଜନ, ୭୦ଟି ରେଞ୍ଜ ଅଫିସ । ନିୟମ କହୁଛି, ଗୋଟିଏ ବଣ୍ଡଲରେ ୫କିଲୋ କେନ୍ଦୁପତ୍ର ରହିଥାଏ । ୧୨ ବଣ୍ଡଲକୁ ନେଇ ଗୋଟିଏ ବସ୍ତା ଅର୍ଥାତ୍ ୬୦ କିଲୋ ହୋଇଥାଏ । ବସ୍ତାର ଓଜନକୁ ମିଶାଇ ଗୋଟିଏ ପ୍ୟାକେଟର ଓଜନ ୬୨ କିଲୋ ହେବା କଥା । କିନ୍ତୁ ୨୦୧୪ ଜୁନ୍ ୨୦ ତାରିଖରେ ୧୪୬୧(୮) ଚିଠିରେ ଡିଏଫ୍ଓ ସମ୍ମିଳନୀରେ ସମସ୍ତ ଡିଏଫଓଙ୍କୁ ଗୋଟିଏ ବସ୍ତାରେ ୬୪ କେଜିରୁ ଅଧିକ ଓଜନ ରଖିବା ପାଇଁ ନିର୍ଦ୍ଦେଶ ଦେଇଥିଲେ ଅଭୟ ପାଠକ । କେନ୍ଦୁପତ୍ର ବଣ୍ଡଲର ଓଜନ ୫କିଲୋ ୨୦୦ ଗ୍ରାମ୍ ବଦଳରେ ୫କିଲୋ ୪୦୦ ଗ୍ରାମ କରି ଦେଇଥିଲେ । ସେହି ଚିଠି ଅନୁସାରରେ ୮ଟି ଡିଭିଜନର ଡିଏଫଓ ସେମାନଙ୍କ ରେଞ୍ଜର ମାନଙ୍କୁ ନିର୍ଦ୍ଦେଶ ଦେଇଥିଲେ । ବିଡି କମ୍ପାନୀଙ୍କୁ ଅହେତୁକ ଲାଭ ଦେବାକୁ ପ୍ରସ୍ତୁତ ହେଇଥିଲା ପୂରା ପ୍ଲାନ୍ । ଗୋଟିଏ ସିଜନରେ ୧୦କୋଟି ଟଙ୍କାରୁ ଊର୍ଦ୍ଧ୍ୱ ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି ।
ବଲାଙ୍ଗିର କେନ୍ଦୁପତ୍ର ମଣ୍ଡଳର ମୁଖ୍ୟ ବନ ସଂରକ୍ଷକ ହେବା ପୂର୍ବରୁ ଅଭୟକାନ୍ତ ପାଠକ ଓଏଫଡିସିର ଜେନେରାଲ ମ୍ୟାନେଜର ଥିଲେ । ତେବେ କେନ୍ଦୁପତ୍ର ଡିଭିଜନରୁ କେନ୍ଦୁପତ୍ର ବିକ୍ରି ପାଇଁ ଓଏଫଡିସିକୁ ଯାଇଥାଏ । ତା’ପରେ ଓଏଫଡିସି, ବିଡି କମ୍ପାନୀ ଗୁଡ଼ିକୁ ପଠାଇଥାଏ । ଯେହେତୁ ଅଭୟକାନ୍ତ ପାଠକ ସବୁ ଜାଣିଥିଲେ ଓ ବିଡି କମ୍ପାନୀ ଗୁଡ଼ିକ ସହ ତାଙ୍କର ଭଲ ସମ୍ପର୍କ ଥିଲା । ସେଥିପାଇଁ ବଲାଙ୍ଗିର କେନ୍ଦୁପତ୍ର ମଣ୍ଡଳର ମୁଖ୍ୟ ବନ ସଂରକ୍ଷକ ଦାୟିତ୍ୱ ନେବା ପରେ ଏଭଳି ଚଞ୍ଚକତା କରିବାରେ ସମର୍ଥ ହୋଇଥିଲେ ।
ପ୍ରତିବର୍ଷ ବଲାଙ୍ଗିର କେନ୍ଦୁପତ୍ର ମଣ୍ଡଳରୁ ଓଏଫଡିସି ଜରିଆରେ ବିଡି କମ୍ପାନୀକୁ ଶହ ଶହ ଟନ୍ କେନ୍ଦୁପତ୍ର ଚାଲଣ ହୋଇଥାଏ । ଗୋଟିଏ ଲଟ୍ରେ ୬୦କିଲୋ ବିଶିଷ୍ଟ ୧୦୦ ବସ୍ତା ଯାଇଥାଏ । ଗୋଟିଏ ଡିଭିଜନରୁ ୩୫ଲଟ୍ ଅର୍ଥାତ୍ ୮ଟନ୍ ଚାଲାଣ କରାଯାଏ । ତେବେ ନିୟମ ଅନୁସାରେ ଗ୍ରୀଷ୍ଣରେ ଗୋଟିଏ ବଣ୍ଡଲର ଓଜନ ୫ କିଲୋ ୩୦୦ଗ୍ରାମ, ବର୍ଷା ଋତୁରେ ୫କିଲୋ ୨୦୦ଗ୍ରାମ ଓ ଶୀତ ବେଳେ ୫କିଲୋ ୨୫୦ଗ୍ରାମ ହେବା କଥା । ପାଠକ ନିୟମକୁ ବେଖାତିର କରି ପ୍ରତି ବଣ୍ଡଲରେ ୫କିଲୋ ୪ଶହ ଗ୍ରାମ ରଖିବାକୁ ନିର୍ଦ୍ଦେଶ ଦେଇଥିଲେ । ଯାହା ଫଳରେ ପ୍ରତି ବସ୍ତାରେ ୨ କିଲୋ ୫୦ଗ୍ରାମ ଅଧିକ କେନ୍ଦୁପତ୍ର ରହୁଥିଲା । ବିଡି କମ୍ପାନୀକୁ ଅଧିକ କେନ୍ଦୁପତ୍ର ଚାଲାଣ କରିବା ଫଳରେ ଗୋଟିଏ ଡିଭିଜନରୁ ବର୍ଷକୁ ୧କୋଟି ୭୫ଲକ୍ଷ ଟଙ୍କାର କ୍ଷତି ସହିବାକୁ ପଡ଼ିଛି । ସେହି ହାରରେ ଆଠଟି ଡିଭିଜନରୁ ପାଖାପାଖି ୧୦କୋଟିରୁ ଊର୍ଦ୍ଧ୍ୱ ଟଙ୍କା ଦୁର୍ନୀତି କରିଛନ୍ତି ଅଭୟକାନ୍ତ ।
