ମାଲକାନଗିରି: ମାଲକାନଗିରି ଜିଲ୍ଲାକୁ ୭ ଦଶନ୍ଧି ଧରି ନିଜ କବଜାରେ ରଖିଥିବା ଲାଲବାହିନୀକୁ ଲାଗିଲା ଆଉ ଏକ ଝଟକା। ମାଓ ମୁକାବିଲା ରେ ଆଉ ଏକ ସଫଳତା। ବଣ୍ଡା ଘାଟିରେ ସ୍ଥାପନ ହେଲା ଆଉ ଏକ BSF କ୍ୟାମ୍ପ। ଦିନେ ଏହି ଅଞ୍ଚଳଗୁଡିକୁ ନିଜ ଅକ୍ତିଆରରେ ରଖିଥିଲେ ମାଓବାଦୀ। ପ୍ରଶାସନ ହଉ କିମ୍ବା ରାଜନେତା ଦଶନ୍ଧି ଦଶନ୍ଧି ଧରି କାହାରି ପାଦ ପଡିନାହିଁ। ଫଳରେ ମୁଦୁଲିପଡା ପରି ଅଞ୍ଚଳ ବିକାଶଧାରାରୁ ହଜି ଯାଇଥିଲା। ଏବେ ଲାଲଗଡର ଲାଲବାହିନୀଙ୍କ ଉପରେ ଲାଗିଛି ଅକୁଁଶ। ମାତ୍ର ୧୫ ଦିନ ବ୍ୟବଧାନରେ ବଣ୍ଡା ଘାଟିରେ ପ୍ରତିଷ୍ଠା ହେଲା ପଞ୍ଚଦଶ ବିଏସଏଫ ବାଟାଲିଅନ।
ଜିଲ୍ଲା ମାଓଗଡ କୁହାଯାଉଥିବା ବଣ୍ତାଘାଟିର ମୁଦୁଲିପଡା ରେ ଲାଗିଲା ସୁରକ୍ଷା ବାହିନୀଙ୍କ ଆଉ ଏକ କ୍ୟାମ୍ପ। ଯାହାକି ଆଗାମି ଦିନରେ ମାଓବାଦୀଙ୍କ ଗତିବିଧି ଉପରେ ନଜର ରଖିବା ସହ ଅଞ୍ଚଳ ବିକାଶଧାରାରେ ସହାୟକ ହେବ ବୋଲି ଜିଲ୍ଲା ଆରକ୍ଷୀ ଅଧିକ୍ଷକ ପ୍ରକାଶ କରିଛନ୍ତି। ଅନ୍ୟପଟେ ଗ୍ରାମବାସୀ ଅଞ୍ଚଳର ବିକାଶ ହେବା ସହ ମାଓ ଅତ୍ୟାଚାର ରୁ ମୁକ୍ତ ହେବେ ବୋଲି ଆଶ୍ୱସ୍ତି ଅନୁଭବ କରିଥିବା କହିଛନ୍ତି।
