ଅନୁଗୋଳ : ନାବାଳିକାକୁ ଦୁଷ୍କର୍ମ ପରେ ହତ୍ୟା ଘଟଣାରେ ଦୋଷୀକୁ ଫାଶୀ ଦଣ୍ଡାଦେଶ । ଫାଶୀ ଦଣ୍ଡାଦେଶ ଶୁଣାଇଛନ୍ତି ସ୍ବତନ୍ତ୍ର ପୋକସୋ କୋର୍ଟ । ୨୦୨୫ ମସିହା ଜୁନ ୨୫ ତାରିଖରେ ଘଟିଥିଲା ଘଟଣା । ଜଣେ ୪ ବର୍ଷର ଶିଶୁକୁ ଘରୁ ଅପହରଣ କରି ନେଇ ଆସିବା ପରେ ଗାଁ ମୁଣ୍ଡ ଏକ ନାଳ ନିକଟରେ ଦୋଷୀ ସାବ୍ୟସ୍ତ ବାବୁଲା ଜେନା ଦୁଷ୍କର୍ମ ପରେ ନାବାଳିକାଙ୍କୁ ପଥରରେ ଛେଚି ହତ୍ୟା କରିଥିଲା । ଏହି ଘଟଣାରେ ବାବୁଲାକୁ ଆଜି ଫାଶୀ ଦଣ୍ଡାଦେଶ ଦେଇଛନ୍ତି ସ୍ବତନ୍ତ୍ର ପୋକସୋ କୋର୍ଟ । ନାବାଳିକାକୁ ଅନୁଗୋଳ ଜେରେଙ୍ଗ ଗାଁର ବାବୁଲା ଜେନା ଅପହରଣ କରି ନେଇଥିଲା । ବହୁ ଖୋଜାଖୋଜି ପରେ ମଧ୍ୟ ସେ ଆଉ ମିଳିନଥିଲା । ଏହାପରେ ପରିବାର ଲୋକେ ଥାନାରେ ନିଖୋଜ ମାମଲା ରୁଜୁ କରିଥିଲେ । ହେଲେ ତା ପରଦିନ ନାବାଳିକାର ମୃତ ଦେହ ଘରଠାରୁ ଶହେ ମିଟର ଦୂର ଏକ ନାଳ ନିକଟରୁ ମିଳିଥିଲା । ନାବାଳିକାକୁ ଦୁଷ୍କର୍ମ ପରେ ହତ୍ୟା କରାଯାଇଥିବା ସନ୍ଦେହ କରି ପୁଲିସ ତଦନ୍ତ କରିଥିଲା । ତଦନ୍ତ ବେଳେ ବାବୁଲା ଜେନା ଏହି କାଣ୍ଡ ଭିଆଇଥିବା ଜାଣି ପାରି ପୁଲିସ ତାକୁ ଗିରଫ କରି କୋର୍ଟ ଚାଲାଣ କରିଥିଲା । ଆଜି ଏହି ମାମଲାର ଶୁଣାଣି କରି ବାବୁଲାକୁ ଅପହରଣ, ଦୁଷ୍କର୍ମ ଓ ପରେ ହତ୍ୟା ଘଟଣାରେ ଫାଶୀ ଦଣ୍ଡାଦେଶ ଦିଆଯାଇଛି ।
