ଗୋଟିଏ ପର୍ଯ୍ୟାୟରେ ୧୭୫ ଆସନ ପାଇଁ ଭୋଟ ଦେଉଛି ଆନ୍ଧ୍ର ପ୍ରଦେଶ
1 min read
ଅମରାବତୀ: ଭୋଟ ଦେଉଛି ଆନ୍ଧ୍ର ପ୍ରଦେଶ । ଗୋଟିଏ ପର୍ଯ୍ୟାୟରେ ୧୭୫ଟି ବିଧାନସଭା ଆସନ ଓ ୨୫ ଲୋକସଭା ଆସନ ପାଇଁ ଚାଲିଛି ମତଦାନ । ମୁଖ୍ୟମନ୍ତ୍ରୀ ତଥା YSRCP ଅଧ୍ୟକ୍ଷ ଜଗନ ମୋହନ ରେଡ୍ଡୀ ଓ ମେଣ୍ଟ ମଧ୍ୟରେ ଚାଲିଛି ଜୋରଦାର ଫାଇଟ୍ । ପୁଲିଭେନ୍ଦୁଲା ନିର୍ବାଚନମଣ୍ଡଳୀରୁ ଜଗନ ଲଢୁଥିବା ବେଳେ ଟିଡିପି ସୁପ୍ରିମୋ ଏନ ଚନ୍ଦ୍ରବାବୁ ନାଇଡୁ କୁପ୍ପମ ଓ ଜନସେନା ମୁଖ୍ୟ ତଥା ଅଭିନେତା ପବନ କଲ୍ୟାଣ ପିଠାପୁରମରୁ ନିର୍ବାଚନ ଲଢୁଛନ୍ତି ।
ଜଗନଙ୍କ ୱାଇଏସଆରସିପି ୧୭୫ ବିଧାନସଭା ଓ ୨୫ ଲୋକସଭା ଆସନରୁ ଏକାକୀ ପ୍ରତିଦ୍ବନ୍ଦିତା କରୁଛିୟ, ସେପଟେ ଏନଡିଏ ମେଣ୍ଟରେ ଟିଡିପି ୧୪୪ ବିଧାନସଭା ଓ ୧୭ ଲୋକସଭା ଆସନରୁ ନିର୍ବାଚନ ଲଢୁଛି । ବିଜେପି ୬ ଲୋକସଭା ଆସନ ଓ ୧୦ ବିଧାନସଭା ଆସନରୁ ପ୍ରାର୍ଥୀ ମଇଦାନକୁ ଓହ୍ଲାଇଛି । ସେହିପରି ଜନସେନା ୨ଟି ଲୋକସଭା ଓ ୨୧ ବିଧାନସଭା ଆସନରୁ ପ୍ରତିଦ୍ବନ୍ଦିତା କରୁଛି ।
ଆନ୍ଧ୍ର ପ୍ରଦେଶ କଂଗ୍ରେସ ସଭାପତି ତଥା ଜଗନଙ୍କ ଭଉଣୀ ୱାଇ ଏସ ଶର୍ମିଲା କଡପାରୁ ଲୋକସଭା ଆସନରେ ପ୍ରାର୍ଥୀ ହୋଇଛନ୍ତି । ଗତ ୨୦୧୯ରେ ୱାଇଏସଆରସିପି ୧୫୧ଟି ସିଟ ହାତେଇଥିବା ବେଳେ ଟିଡିପି ୨୩ ଓ ଜନସେନା ଗୋଟିଏ ଆସନରେ ବିଜୟ ଲାଭ କରିଥିଲା ।
