ଓଡ଼ିଶା ପ୍ରତି ଆନ୍ଧ୍ରବାସୀଙ୍କ ପ୍ରେମ, ମିଶିବାକୁ ଚାହୁଁଛି ୧୮ଟି ଗାଁ

କୋଟିଆ: ଆନ୍ଧ୍ର କୋଟିଆ ଚକ୍ରାନ୍ତ କରିବା ବେଳେ ଓଡ଼ିଶା ପ୍ରତି ଆଗ୍ରହ ଦେଖାଇଲେଣି ଆନ୍ଧ୍ରର ୧୮ଟି ଗାଁ ଲୋକ । ଓଡ଼ିଶାରେ ମିଶିବାକୁ ଚାହୁଁଛନ୍ତି ଆନ୍ଧ୍ରବାସୀ । ଆନ୍ଧ୍ର ଶୁଣୁନି, ଆଶା ରଖିଛନ୍ତି ଓଡ଼ିଶା ଶୁଣିବ । ଆନ୍ଧ୍ର ପ୍ରଦେଶର ୧୮ଟି ଗାଁର ଦୁଇ ହଜାର ଲୋକ ଓଡ଼ିଶା ସରକାରଙ୍କୁ ଏଭଳି ନିବେଦନ କରିଛନ୍ତି ।

ଆନ୍ଧ୍ରପ୍ରଦେଶର ବିଜୟନଗରମ ଜିଲ୍ଲା ସାଲୁର ବ୍ଲକ ଅନ୍ତର୍ଗତ କୋଡ଼ମା ପଞ୍ଚାୟତର ୧୮ଟି ଗାଁର ବାସିନ୍ଦା ଓଡ଼ିଶାରେ ମିଶିବାକୁ ଚାହୁଁଛନ୍ତି । କୋଡମା ପଞ୍ଚାୟତରେ ଏକାଠି ହୋଇ ଏହି ଲୋକମାନେ ଓଡ଼ିଶାରେ ମିଶାଇବା ପାଇଁ ଗୁହାରି କରିଛନ୍ତି । ଏହି ଅବସରରେ ପ୍ରତ୍ୟେକ ଗାଁର ମୁଖିଆ ନିଜ ସମସ୍ୟା କହିଥିଲେ ।

ଗାଁରେ ଭଲ ରାସ୍ତା ନଥିବା ବେଳେ ସ୍କୁଲ ଓ ଅଙ୍ଗନାବାଡି ଘର ଖଣ୍ଡେ ବି ନାହିଁ । କିନ୍ତୁ ଶିକ୍ଷକ ଓ ଅଙ୍ଗନବାଡି କର୍ମୀ ଅଛନ୍ତି । କୋଡମା ପଞ୍ଚାୟତକୁ ଓଡ଼ିଶାରେ ସାମିଲ କରି ଯାତାୟାତ ସୁବିଧା କରିବା ସହ ନିକଟସ୍ଥ ଓଡ଼ିଆ କାଣ୍ଟି କିମ୍ବା ତଳଗୁମାଣ୍ଡି ପଞ୍ଚାୟତରେ ଏକ ସାପ୍ତାହିକ ହାଟ ବସାଇବା ପାଇଁ ନିବେଦନ କରିଥିଲେ । ଓଡ଼ିଶାର କୋଟିଆକୁ ହାତେଇବା ପାଇଁ ଏହି ଅଞ୍ଚଳରେ ଆନ୍ଧ୍ର ପଞ୍ଚାୟତ ନିର୍ବାଚନ କରିବା ପରେ ଓଡ଼ିଶା ସୁପ୍ରିମ୍‌କୋର୍ଟକୁ ଯାଇଛି । ସୁପ୍ରିମକୋର୍ଟରେ ବିଚାରାଧୀନ ଅଛି ମାମଲା । ଏପଟେ ଆନ୍ଧ୍ର ଲୋକ ଓଡ଼ିଶାରେ ମିଶିବାକୁ ଚାହୁଁଛନ୍ତି ।