ସମାଧାନ ହେଲା କୋରାପୁଟ ସମ୍ବାଇରେ ଆନ୍ଧ୍ର-ଓଡିଶା ଜମି ବିବାଦ ପ୍ରସଙ୍ଗ
କୋରାପୁଟ: ସମାଧାନ ହେଲା କୋରାପୁଟ ସମ୍ବାଇରେ ଆନ୍ଧ୍ର ଓଡିଶା ଜମି ବିବାଦ ପ୍ରସଙ୍ଗ । ଉଭୟ ଗାଁର ଲୋକମାନେ ଆଲୋଚନା କରି ଏହାର ସାମାଧାନର ବାଟ ବାହାର କରିଛନ୍ତି । କୋରାପୁଟ ଜିଲ୍ଲା ପଟାଙ୍ଗି ବ୍ଲକ ଅନ୍ତର୍ଗତ ସାମ୍ବାଇ ପଞ୍ଚାୟତର ଜାମୁଗୁଡା ସୀମାନ୍ତରେ ରହିଥିବା ଜମି ବିବାଦ ଉଭୟ ସୀମାନ୍ତ ଗ୍ରାମବାସୀଙ୍କ ବୁଝାମଣାରେ ବୁଧବାର ସୀମା ଫଳକ ପୋତିଲେ ।
ଓଡିଶାର ଜାମୁଗୁଡା ଗ୍ରାମ ସହ ଆନ୍ଧ୍ରପ୍ରଦେଶର ମିଟାମ ଗ୍ରାମ ମଧ୍ୟରେ ସୀମା ବିବାଦ ରହିଥିଲା । ଦୀର୍ଘଦିନ ଧରି ଏହି ଜମି ବିବାଦ ଲାଗି ରହିଥିବା ବେଳେ ଏବେ ଉଭୟ ଗ୍ରାମବାସୀଙ୍କ ମଧ୍ୟରେ ଆପସ ବୁଝାମଣା ଯୋଗୁଁ ତାହା ସମାଧାନ ହୋଇଛି । ବୁଧବାର ସୀମା ନିର୍ଦ୍ଧାରଣ କରାଯିବା ସହ ଏକ ଫଳକ ଲଗାଇଛନ୍ତି ଉଭୟ ଗ୍ରାମବାସୀ । ଫଳକର ଗୋଟିଏ ପାଖରେ ଓଡ଼ିଶା (ଓ) ଲେଖାଯାଇଥିବା ବେଳେ ଅନ୍ୟପଟେ ବିଦାୟ ଆନ୍ଧ୍ରପ୍ରଦେଶ ବା ‘ଏ’ ବୋଲି ଲେଖାଯାଇଛି । ପ୍ରଶାସନିକ ଅଧିକାରୀ ଯେଉଁସବୁ ସ୍ଥାନ ଚିହ୍ନଟ କରିଥିଲେ ସେହି ସବୁ ସ୍ଥାନରେ ଏହିଭଳି ୬ଟି ପୋଲ ପୋତାଯାଇଛି । ଉଭୟ ଓଡ଼ିଶା ଓ ଆନ୍ଧ୍ରପ୍ରଦେଶ ଗାଁର ଲୋକଙ୍କ ଉପସ୍ଥିତିରେ ଏହି ସମାଧାନ ହୋଇଛି ।
ସୂଚନା ଅନୁଯାୟୀ ଉଭୟ ଗ୍ରାମ ମଧ୍ୟରେ ଦୀର୍ଘ ଦିନ ଧରି ଜମି ବିବାଦ ରହିଥିଲା । ତେଣୁ ଏହାର ସମାଧାନ ପାଇଁ ଦୁଇ ଗାଁର କିଛି ଭଦ୍ରଲୋକଙ୍କୁ ଡକାଯାଇଥିଲା । ଭଦ୍ରଲୋକ ଓ ସ୍ଥାନୀୟ ପ୍ରଶାସନିକ ଅଧିକାରୀଙ୍କ ଉପସ୍ଥିତିରେ ଏବଂ ଦୁଇ ଗ୍ରାମବାସୀଙ୍କ ମଧ୍ୟରେ ଆଲୋଚନା କରାଯାଇ ସୀମା ବିବାଦର ସମାଧାନ କରାଯଇଛି । ଆନ୍ଧ୍ରପ୍ରଦେଶ ମିଟାମ ଗ୍ରାମର କିଛି ଲୋକ ମାଡିବସିଥିବା ଜମିଗୁଡିକୁ ଛାଡିବା ପାଇଁ ସହମତି ପ୍ରକାଶ କରିଥିଲେ । ତେବେ ଏଠାରେ ଆଲୋଚନା ମାଧ୍ୟମରେ ସମାଧାନ ହୋଇଥିଲେ ମଧ୍ୟ, ସୀମାନ୍ତ ସୁନାବେଡ଼ା ଏବଂ ବଡ଼ଲାମ ଗ୍ରାମ ମଧ୍ୟରେ ସମାଧାନ ହୋଇପାରିନାହିଁ ।
