ଓଡ଼ିଶା ସୀମା ଅକ୍ତିଆରରେ ମାତିଛି ଆନ୍ଧ୍ର: ନନ୍ଦପୁର ରାଇପାହାଡ଼ ଅଞ୍ଚଳରେ ଲଗାଚାଲିଛି ବିଦ୍ୟୁତ ମିଟର

ଭୁବନେଶ୍ବର: ଓଡ଼ିଶା ଦଖଲ ପାଇଁ ଗୋଟିଏ ପରେ ଗୋଟିଏ ପାଦ ଆଗକୁ ବଢାଉଛି ଆନ୍ଧ୍ର । କେବେ କୋଟିଆକୁ ଅକ୍ତିଆର କରିବାକୁ ଚେଷ୍ଟା କରୁଛି ତ କେତେବେଳେ ଲୋକଙ୍କୁ ପ୍ରଲୋଭନ ଦେଖାଇ ନିଜ ଆଡକୁ ଟାଣୁଛି । କେତେବେଳେ ଚାଉଳ ତ କେତେବେଳେ ଅଧାର କାର୍ଡ ଦେଇ ଯୋଜନାରେ ଅର୍ନ୍ତଭୂକ୍ତ କରୁଛି । ଏବେ ରାଜ୍ୟର ବିଜୁଳି କ୍ଷେତ୍ରକୁ ମଧ୍ୟ ନିଜ କବଜାକୁ ନେବା ଆରମ୍ଭ କରିଛି ଆନ୍ଧ୍ର । ହେଲେ ରାଜ୍ୟ ସରକାର ନିରବଦ୍ରଷ୍ଟା ସାଜିବାକୁ ନେଇ ପ୍ରଶ୍ନ ଉଠାଇଛନ୍ତି ବିଭିନ୍ନ ଜନ ସଙ୍ଗଠନ । ଓଡ଼ିଶାର କୋରାପୁଟ ଜିଲ୍ଲା ନନ୍ଦପୁର ରାଇପାହାଡ଼ ଅଞ୍ଚଳରେ ଆନ୍ଧ୍ର ବିଦ୍ୟୁତ ମିଟର ଲଗାଇବା ପ୍ରକ୍ରିୟାକୁ ଜୋରଦାର କରିଛି। ଯାହାକୁ ନେଇ ରାଜ୍ୟ ବିଜେପି ସରକାରକୁ ଟାର୍ଗେଟ କରିଛି ରାଜ୍ୟ ବିଦ୍ୟୁତ ଉପଭୋକ୍ତା ମହାସଂଘ। ପଡୋଶୀ ରାଜ୍ୟଙ୍କ ତରଫରୁ ଯେଉଁ ଉପଦ୍ରବ ଓ ଜବରଦଖଲ ଆରମ୍ଭ ହୋଇଛି ତାକୁ ନେଇ ବିଧାନସଭାର ଏକ ସ୍ୱତନ୍ତ୍ର ଅଧିବେଶନ ଡାକିବାକୁ ଦାବି କରିଛି ମହାସଂଘ । ଘଟଣାକୁ ରାଜ୍ୟ ସରକାରଙ୍କ ଅଣ ଦେଖା ଓ ଆନ୍ଧ୍ରର ମନମାନିକୁ ନେଇ ଆଗକୁ ବଡ଼ ଧରଣର ଆନ୍ଦୋଳନର ଚେତାବନୀ ଦେଇଛି ମହାସଂଘ। ସେପଟେ ଲଗାତର ଆନ୍ଧ୍ରର ଏଭଳି ଉଦ୍ୟମ ବିରୋଧରେ ସରକାର କଠୋର ହେବା କଥା ବୋଲି କହିଛି ଉତ୍କଳ ସମ୍ମିଳନୀ। ଓଡ଼ିଶାର ଅସ୍ମିତା ବଞ୍ଚାଇବାକୁ ରାଜ୍ୟ ସରକାର ଦୃଢ଼ ଓ ଶକ୍ତ ହେବା ଆବଶ୍ୟକ।

ଓଡ଼ିଶାର ସୀମାନ୍ତବର୍ତ୍ତି ଗାଁ ଗୁଡିକର ପରିସ୍ଥିତି ଅତି ଜଟିଳ । ଓଡ଼ିଶା ସରକାରଙ୍କ ପାଖରେ ଖବର ନାହିଁ କିମ୍ବା ତତ୍ପରତା ନାହି ବୋଲି କହିଛି ବିଜେଡି। ଓଡ଼ିଶାରେ ଆନ୍ଧ୍ର ବିଜୁଳି ମିଟର ଲଗାଇବାକୁ କେବେ ବି ବରଦାସ୍ତ କରାଯିବ ନାହିଁ ବୋଲି ବିଜେଡି କହିଛି । କଂଗ୍ରେସର କହିବା କଥା ବିଜେପି କ୍ଷମତାକୁ ଆସିବା ପୂର୍ବରୁ କହିଥିଲେ ସୀମା ସମସ୍ୟାକୁ ସମାଧାନ କରିବେ ବୋଲି । କିନ୍ତୁ ଏବେ ଆନ୍ଧ୍ର, ଛତିଶଗଡ଼, ପଶ୍ଚିମବଙ୍ଗ, ଝାଡ଼ଖଣ୍ଡ ଭଳି ପଡୋଶୀ ରାଜ୍ୟ ଓଡ଼ିଶାର ଅଞ୍ଚଳକୁ ଦଖଲ କରୁଛନ୍ତି । ଆନ୍ଧ୍ର ଓଡ଼ିଶାରେ ମିଟର ଲଗାଉଛି ମାନେ ସେ ଓଡ଼ିଶାର ଅଞ୍ଚଳ ଦଖଲ କରିନେଲାଣି । ଲୋକେ ମଧ୍ୟ ଏହାକୁ ଗ୍ରହଣ କରୁଛନ୍ତି। ତୁରନ୍ତ ରାଜ୍ୟର ମୁଖ୍ୟମନ୍ତ୍ରୀ ଓ କେନ୍ଦ୍ର ସରକାର ହସ୍ତକ୍ଷେପ କରିବାକୁ ଦାବି କରିଛି କଂଗ୍ରେସ। ଓଡ଼ିଶାର ସୀମା, ଭାଷା, ସଂସ୍କୃତି ଓ ଐତିହ୍ୟର ସୁରକ୍ଷା ସରକାରଙ୍କ ଦାୟିତ୍ୱ । କିନ୍ତୁ ଏସବୁ କିଛି ହେଉ ନାହିଁ ବୋଲି ଅଭିଯୋଗ ଆଣିଛି ସିପିଆଇଏମ।

ଓଡିଶା ବିଜେପି ସରକାରଙ୍କ ଦୁର୍ବଳତାକୁ ଦେଖି କାଣି ବିଲେଇ ଉପରେ ଅସରପା ଭାଉ ଦେଖାଇବା ନ୍ୟାୟରେ ଆନ୍ଧ୍ର ଓ ଅନ୍ୟ ପଡୋଶୀ ରାଜ୍ୟଗୁଡିକ ଓଡିଶାକୁ ଦଖଲ କରିବାକୁ କୌଣସି ସୁଯୋଗ ହାତଛଡା କରୁନାହାନ୍ତି। ସେପଟେ ବିରୋଧୀ ଯେତେ ଗର୍ଜିଲେ ମଧ୍ୟ ବିଜେପି ସରକାର ଚୁପ ରହୁଥିବାରୁ ଓଡ଼ିଶାର ଭାଗ୍ୟ କଣ ହେବ ତାକୁ ନେଇ ଉଠୁଛି ବଡ଼ ପ୍ରଶ୍ନ।