ଇମ୍ପାଲ: ବର୍ଷେ ପରେ ବି ସୁଧୁରୁନି ମଣିପୁର ସମସ୍ଯା। ସବୁଠି ବଢୁଛି ଶରଣାର୍ଥୀ ସମସ୍ୟା। ଏନେଇ ଉଚ୍ଚସ୍ତରୀୟ ବୈଠକରେ ସ୍ଥିତି ସମୀକ୍ଷା କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ପୂର୍ବରୁ ଗୃହମନ୍ତ୍ରୀଙ୍କୁ ସାକ୍ଷାତ କରି ଆଲୋଚନା କରିଥିଲେ ରାଜ୍ଯପାଳ ଅନସୂୟା ଉଇକେ। ଏହି ବୈଠକରେ ରାଜ୍ଯରେ ନିରାପତ୍ତା ନେଇ ଉଚ୍ଚସ୍ତରୀୟ ସମୀକ୍ଷା କରାଯାଇଥିଲା। ଏନଡିଏ ସରକାର ଆସିବା ପରେ ପ୍ରଥମ ଥର ଲାଗି ଜାମ୍ମୁ ଓ କାଶ୍ମୀର ପରେ ମଣିପୁର ସ୍ଥିତିର ସମୀକ୍ଷା କରାଯାଇଛି।
ବୈଠକରେ କେନ୍ଦ୍ର ଗୃହ ସଚିବ ଅଜୟ ଭାଲ୍ଲା, ଗୁଇନ୍ଦା ବ୍ଯୁରୋ ମୁଖ୍ଯ ତପନ ଡେକା, ନୂଆ ସେନାମୁଖ୍ଯ ଉପେନ୍ଦ୍ର ଦ୍ବିବେଦୀ, ନିରାପତ୍ତା ପରାମର୍ଶଦାତା କୁଲଦୀପ ସିଂ, ମଣିପୁର ମୁଖ୍ଯ ଶାସନ ସଚିବ ବିନୀତ ଯୋଶୀ, ଡିଜିପି ରାଜୀବ ସିଂ, ଆସାମ ରାଇଫଲସ ଡିଜି ପ୍ରଦୀପ ଚନ୍ଦ୍ରନ ନାୟାର ପ୍ରମୁଖ ଯୋଗଦେଇଥିଲେ। ମଣିପୁରରେ ପୁଣି ହିଂସା ବ୍ଯାପିବା ପରେ କେନ୍ଦ୍ର ଗୃହମନ୍ତ୍ରାଳୟ ତୁରନ୍ତ ଏହି ବୈଠକ କରିଛି। ଗତବର୍ଷ ମେ ୩ ତାରିଖରେ ମଣିପୁରରେ ହିଂସା ବ୍ଯାପିଥିବାବେଳେ ବର୍ତ୍ତମାନ ସୁଦ୍ଧା ୨୨୫ ଲୋକଙ୍କ ମୃତ୍ଯୁ ଘଟିଛି ଏବଂ ୫୦ ହଜାର ଲୋକ ବାସଚ୍ଯୁତ ହୋଇଛନ୍ତି।
ଗତ ସପ୍ତାହରେ ସଶସ୍ତ୍ର ଆତଙ୍କବାଦୀ ମୁଖ୍ଯମନ୍ତ୍ରୀ ବୀରେନ ସିଂଙ୍କ କନଭୟ ଉପରେ ହମଲା କରିଥିଲେ। ସେପଟେ ମଣିପୁରର ଫାଇତୋଲ ଅଞ୍ଚଳରେ ଟ୍ରକ ଚଳାଚଳ ସ୍ବାଭାବିକ କରିବା ଲାଗି ପଦକ୍ଷେପ ନିଆଯାଇଛି। ଜିରିବାନ ଜିଲ୍ଲା ସମେତ ଅନ୍ଯାନ୍ଯ ସ୍ଥାନରେ ଆଶ୍ରୟ ନେବାରେ ଲାଗିଛନ୍ତି ଶହ ଶହ ଶରଣାର୍ଥୀ। ଗତ ବର୍ଷ ମେ ମାସରୁ ମେଇତେଇ ଓ କୁକୀ ସମ୍ପ୍ରଦାୟ ମଧ୍ଯରେ ସଂଘର୍ଷ ଏବେ ବି ଜାରି ରହିଛି।
