ମଣିପୁରରେ ବିପ୍ଳବର ସ୍ବର, ଲୋକଙ୍କ ପାଖରେ ଖବର ପହଞ୍ଚାଇବାକୁ ନ୍ୟୁଜପେପର ଛାପୁଛନ୍ତି କୁକୀ ସମ୍ପ୍ରଦାୟ

ଇମ୍ଫାଲ: ମଣିପୁରରେ ଇଣ୍ଟରନେଟ ସେବା ବନ୍ଦ । ଲୋକଙ୍କ ପାଖରେ ଖବର ପହଞ୍ଚାଇବାକୁ ନିଜସ୍ବ ଖବରକାଗଜ ଛାପୁଛନ୍ତି କୁକୀ ସମୁଦାୟ । କୁକୀ ଆଦିବାସୀ ସ୍ବେଚ୍ଛାସେବୀଙ୍କ ଉଦ୍ୟମରେ ଜଲେନ ଅଗିନ (ବିପ୍ଳବର ସ୍ବର) ନାମରେ ଏକ ପେପର ପ୍ରିଣ୍ଟ କରାଯାଉଛି । ସାମ୍ପ୍ରଦାୟିକ ହିଂସାରେ ଜଳୁଛି ମଣିପୁର । କୁକୀ-ମିତେଇ ସମୁଦାୟ ମଧ୍ୟରେ ବିବାଦ ଚରମ ସୀମାରେ ପହଞ୍ଚିଛି । ହତ୍ୟା, ଦୁଷ୍କର୍ମ, ପୋଡ଼ାଜଳା ଆଦି ଅନେକ ବର୍ବର ଘଟଣା ସାମ୍ନାକୁ ଆସୁଥିବା ବେଳେ ଅନେକ ଘଟଣା ଲୋକଲୋଚନକୁ ଆସିପାରୁନି । ଏଭଳି ଅନେକ ଘଟଣା ସମ୍ପର୍କରେ ରାଜ୍ୟବାସୀଙ୍କୁ ଜଣାଇବାକୁ ନିଜସ୍ୱ ଖବରକାଗଜ ଛାପୁଛନ୍ତି କୁକୀ ସମୁଦାୟ । କିଛି ଗୁରୁତ୍ବପୂର୍ଣ୍ଣ ଖବର ସଂଗ୍ରହ କରି ଏକ ହଜାର ଲେଖାଏଁ କପି ଛପାଯାଉଛି । ଏହି କପି ରାଜ୍ୟବାସୀଙ୍କ ନିକଟରେ ପହଞ୍ଚାଇ ଲୋକମାନଙ୍କୁ ରାଜ୍ୟର ସ୍ଥିତି ସମ୍ପର୍କରେ ସୂଚନା ଦିଆଯାଉଛି ବୋଲି ଆସିଷ୍ଟାଣ୍ଟ ଏଡିଟର ହାଓପୁ କହିଛନ୍ତି । ରାଜ୍ୟର ସ୍ଥିତି ସହ ଦେଶ ବିଦେଶର ଅନେକ ଗୁରୁତ୍ବପୂର୍ଣ୍ଣ ଖବର ଛାପି ରାଜ୍ୟବାସୀଙ୍କ ନିକଟରେ ପହଞ୍ଚାଉଛନ୍ତି ସ୍ବେଚ୍ଛାସେବୀ ।