ବଲାଙ୍ଗିର ଉପଜିଲ୍ଲାପାଳଙ୍କ ନାଁରେ ଅସଦାଚରଣ ଅଭିଯୋଗ

ବଲାଙ୍ଗିର: ଉପଜିଲ୍ଲାପାଳଙ୍କ ନାଁରେ ଅସଦାଚରଣ ଭଳି ଗୁରୁତର ଅଭିଯୋଗ । ବଲାଙ୍ଗିର ଉପଜିଲ୍ଲାପାଳଙ୍କ ନାଁରେ ଆସିଛି ଏଭଳି ଅଭିଯୋଗ । ଉପ ଜିଲ୍ଲାପାଳଙ୍କ କାର୍ଯ୍ୟାଳୟରେ କାମ କରୁଥିବା ଜନୈକ ମହିଳ କିରାନୀ ଏହି ଅଭିଯୋଗ ଆଣିଛନ୍ତି । ଏନେଇ ଜିଲ୍ଲାପାଳଙ୍କ ପାଖରେ ଅଭିଯୋଗ କରିଥିଲେ ସମ୍ପୃକ୍ତ ମହିଳା କର୍ମଚାରୀ ।ଉପଜିଲ୍ଲାପାଳ ସଂଜୟ ମିଶ୍ର ଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଅନ୍ୟତ୍ର ବଦଳି କରିବାକୁ ସେ ନିବେଦନ କରିଥିଲେ  ।

ଅଭିଯୋଗ ପରେ ଉପଜିଲ୍ଲାପାଳଙ୍କୁ ଅନ୍ୟତ୍ର ବଦଳି କରିଛନ୍ତି ଜିଲ୍ଲାପାଳ । ତେବେ ଉପଜିଲ୍ଲାପାଳଙ୍କ ଉପରେ ଉଠିଥିବା ଅଭିଯୋଗର ତଦନ୍ତ ପାଇଁ ଏକ କମିଟ ଗଠନ କରାଯାଇଛି । ଜଣେ ମହିଳା କର୍ମଚାରୀଙ୍କ ନେତୃତ୍ୱରେ ୩ ଜଣିଆ କମିଟି ଗଠନ କରାଯାଇଛି । ସେପଟେ ତଦନ୍ତ ମୁତାବକ ପୀଡ଼ିତା କର୍ମଚାରୀଙ୍କ କାଉନସେଲିଂ କରାଯାଇଛି ବୋଲି ତଦନ୍ତରେ ନିଯୋଜିତ ହୋଇଥିବା କମିଟି ମୁଖ୍ୟ କହିଛନ୍ତି ।

ଅନ୍ୟପକ୍ଷରେ ପୁରା ଘଟଣାକ୍ରମ ଉପରେ କୌଣସି ପ୍ରକାରର ପ୍ରତିକ୍ରିୟା ଦେବାକୁ ମନା କରିଦେଇଛନ୍ତି ଜିଲ୍ଲାପାଳ ।