ଠକାମୀର ଶିକାର SHG, ବିରି ବିହନ ବୁଣାର ୪ ମାସ ପରେ ବି ବିରି ଧରୁନି ଫଳ
ଦେବଗଡ଼: ଉଜୁଡିଲା ବିରି ଚାଷ । ନକଲି ବିହନ ଯୋଗୁଁ ଠକାମିର ଶିକାର ହୋଇଛନ୍ତି ସ୍ୱୟଂ ସହାୟକ ଗୋଷ୍ଠୀ । ଦେବଗଡ଼ ଜିଲ୍ଲା ତିଲେଇବଣୀରେ ବିରି ଚାଷ କରିଥିଲେ ଏସଏଚଜି ମହିଳା । ହେଲେ ବିରି ବୁଣା ହେବାର ଚାରିମାସ ପରେ ବି ଗଛରେ ଫଳ ଆସୁନଥିବା ଅଭିଯୋଗ ହୋଇଛି । ଫଳରେ ଋଣ ଆଣି ଚାଷ କରିଥିବା ମହିଳା ଏବେ ଚିନ୍ତାରେ ।
ଠକାମିର ଶିକାର ସ୍ୱୟଂ ସହାୟକ ଗୋଷ୍ଠୀ ମହିଳା । ୪ମାସ ପରେ ବି ବିରି ଫସଲରେ ଧରୁନି ଫଳ । ଆଇଟିଡିଏ ପକ୍ଷରୁ ମିଳିଥିବା ବିହନ ନକଲି ଅଭିଯୋଗ । ମହିଳାଙ୍କୁ ସଶକ୍ତ କରିବାକୁ ତିଲେଇବଣୀ ସମନ୍ୱିତ ଆଦିବାସୀ ଉନ୍ନୟନ ସଂସ୍ଥା ବିରି ଚାଷ ପାଇଁ ବିହନ ଯୋଗାଇ ଦେଇଥିଲା । ହେଲେ ବିରି ବୁଣା ହେବାର ୪ ମାସ ପରେ ବି ଗଛରେ ଫଳ ଆସୁନଥିବା ଅଭିଯୋଗ ହୋଇଛି । ପତ୍ର ସବୁ ନଷ୍ଟ ହେବାକୁ ବସିଥିବା ବେଳେ ହେକ୍ଟର ହେକ୍ଟର ଫସଲରେ ଗାଈ ଗୋରୁ ଚରୁଛନ୍ତି ।
ତିଲେଇବଣୀ ବ୍ଲକ ଦୁଧିଆନାଳୀ ପଞ୍ଚାୟତର ପ୍ରାୟ ୨୫୦ରୁ ଅଧିକ ମହିଳା ଆଇଟିଡିଏରୁ ବିହନ, କୀଟନାଶକ ଓ ସାର ଆଣି ରବି ଫସଲ କରିଥିଲେ । ମାତ୍ର ନିମ୍ନମାନର ବିହନ ଓ ନକଲି କୀଟନାଶକ ପାଇଁ ବିରି ଫସଲରେ ଫଳ ଧରୁନଥିବା ଅଭିଯୋଗ କରିଛନ୍ତି ମହିଳାମାନେ । ସେପଟେ ବିରିରେ ଫୁଲ ଧିରିବା ସମୟରେ ଅତ୍ୟଧିକ ବର୍ଷା ପାଇଁ ଏଭଳି ସମସ୍ୟା ଦେଖା ଦେଇଛି ବୋଲି କହିଛନ୍ତି ଆଇଟିଡିଏ ପ୍ରୋଜେକ୍ଟ ମ୍ୟାନେଜର । ନକଲି ବିହନ ପାଇଁ ବିରି ଫସଲ ନଷ୍ଟ ହେଉ କି ମାତ୍ରାଧିକ ବର୍ଷା ପାଇଁ, ଏହାର ତଦନ୍ତ କରି ଏସଏଚଜି ମହିଳାଙ୍କୁ କ୍ଷତିପୂରଣ ଦେବାକୁ ଦାବି ହୋଇଛି ।
