ଯୌତୁକ ପାଇଁ ପତ୍ନୀଙ୍କ ଯୌନାଙ୍ଗରେ ଲୁହା ଚେଙ୍କ ଦେବାକୁ ସ୍ବାମୀର ଉଦ୍ୟମ
ତାଳଚେର: ଯୌତୁକ ଲୋଭି ରାକ୍ଷସ ଯେ କେତେ ତଳକୁ ଖସିଯିବ ତାହା ତାଳଚେର ଅଞ୍ଚଳରେ ଦେଖିବାକୁ ମିଳିଛି । ଦୁଇଟି ଛୁଆର ବାପା ହେବା ପରେ ବି ଯୌତୁକ ଲୋଭରେ ମାଆ ସହ ମିଶି ପତ୍ନୀଙ୍କୁ ଅକଥନୀୟ ନିର୍ଯାତନା ଦେବା ସହ ମହିଳାଙ୍କ ଯୌନାଙ୍ଗରେ ଲୁହା ଚେଙ୍କ ଦେବାକୁ ଉଦ୍ୟମ କରି ଫେରାର ହୋଇଯାଇଛି ସ୍ବାମୀ । ଘଟଣା ଘଟିଛି ତାଳଚେର କୋଲୀୟାରି ଥାନା ଏକଡାଳ ଗାଁରେ ।
ଅଭିଯୋଗ ଅନୁସାରେ, ଏକଡାଳ ଗାଁର ପ୍ରେମାନନ୍ଦ ନାଏକ ରେଙ୍ଗାଳି ବଜ୍ରକୋଟ ଅଞ୍ଚଳରର ମିତା (ଛଦ୍ମନାମ)ଙ୍କୁ ୨୦୧୮ ମସିହାରେ ବିବାହ କରିଥିଲେ । ଯୌତୁକ ବାବଦକୁ ମିତାଙ୍କ ପରିବାର ଲୋକେ ୪ ଲକ୍ଷ ଟଙ୍କାର ଘରକରଣା ଜିନିଷ, ୨ ଲକ୍ଷ ନଗଦ ଟଙ୍କା, ସାଢେ ୪ ଭରି ସୁନା ଦେଇଥିଲେ । ବିବାହ ପରେ ତାଳଚେର ଜଗନ୍ନାଥ ମାଇନ୍ସରେ ଚାକିରି କରୁଥିବା ପ୍ରେମାନନ୍ଦ ସେଣ୍ଟ୍ରାଲ କଲୋନୀରେ ଥିବା ଏମସିଏଲ କ୍ୱାର୍ଟର୍ସରେ ପତ୍ନୀଙ୍କ ସହ ରହୁଥିଲେ । ଉଭୟଙ୍କର ଗୋଟିଏ ପୁଅ ଓ ଗୋଟିଏ ଝିଅ ଅଛନ୍ତି ।
ବିବାହର କିଛି ବର୍ଷ ପରେ ପ୍ରେମାନନ୍ଦ ଯୌତୁକ ବାବଦକୁ ଗୋଟିଏ କାର ଦାବି କରିଥିଲେ । ତେବେ ମିତାଙ୍କ ପରିବାର କାର ଦେବାକୁ ଅକ୍ଷମତା ପ୍ରକାଶ କରିଥିଲେ । ଯଦି କାର ନଦେବ ତେବେ ୫ ଲକ୍ଷ ଟଙ୍କା କ୍ୟାସ ଆଣିବାକୁ ମିତାଙ୍କୁ ବାଧ୍ୟ କରିଥିଲେ ପ୍ରେମାନନ୍ଦ ।
ମିତାଙ୍କ ପରିବାର ଲୋକେ ଏତେ ଟଙ୍କା ଦେଇ ନ ପାରିଥିବାରୁ ପ୍ରେମାନନ୍ଦ ଓ ତାଙ୍କ ମାଆ ରୂପବତୀ ନାଏକ ତାଙ୍କ ଉପରେ ଅକଥନୀୟ ନିର୍ଯାତନା ଦେବା ଆରମ୍ଭ କରି ଦେଇଥିଲେ । ଏପରିକି କରେଣ୍ଟ ଦେବା ଭଳି ସଙ୍ଗୀନ ଅଭିଯୋଗ ମିତାଙ୍କ ମାଆ କରିଥିଲେ । ଏନେଇ ପୂର୍ବରୁ ଟାଉନ ଥାନାରେ ଅଭିଯୋଗ ହୋଇଥିଲା । ପୋଲିସ ଉପସ୍ଥିତିରେ ଏଥିରୁ ନିବୃତ୍ତ ରହିବେ ବୋଲି ପ୍ରେମାନନ୍ଦ ଲିଖିତ ସହମତି ଦେଇ ମିତାଙ୍କୁ ସାଙ୍ଗରେ ନେଇଥିଲେ ।
ହେଲେ ଗତ ୪ ତାରିଖ ସକାଳ ପ୍ରାୟ ସାଢେ ୬ଟା ସମୟରେ ସେଣ୍ଟ୍ରାଲ କଲୋନୀ କ୍ୱାର୍ଟର୍ସରେ ମିତାଙ୍କ ହାତଗୋଡ ବାନ୍ଧି ପ୍ରେମାନନ୍ଦ ଲୁହା ରଡ଼ରେ ମାଡ଼ ମାରିବା ସହ ଶରୀରର ବିଭିନ୍ନ ସ୍ଥାନକୁ ଛୁରିରେ ଆକ୍ରମଣ କରିଥିଲେ । ଅଥୟ ମାଡ଼ ଓ ଛୁରି ଆଘାତରେ ଅତ୍ୟଧିକ ରକ୍ତସ୍ରାବ ହୋଇ ମିତା ଚେତାଶୂନ୍ୟ ହୋଇଯାଇଥିଲେ । ପରେ ତାଙ୍କ ମୁହଁରେ ପାଣି ପକାଇ ହୋସକୁ ଆଣିବା ସହ ପୁଣି ଥରେ ମାଡ଼ ମାରିଥିଲେ । ଏପରିକି ତାଙ୍କ ଯୌନାଙ୍ଗରେ ଲୁହା ରଡରେ ଚେଙ୍କ ଦେବାକୁ ଚେଷ୍ଟା କରିଥିଲେ । ଏହି ସମୟରେ ମିତା ଚେତାଶୂନ୍ୟ ହୋଇଯିବାରୁ ମରିଯାଇଥିବା ଭାବି ପୁଅ ସହ ତାଙ୍କୁ ଘରେ ବନ୍ଦ କରି ଫେରାର ହୋଇଯାଇଥିବା ଅଭିଯୋଗ ହୋଇଛି ।
ଖବର ପାଇ କୋଲୀୟାରି ପୋଲିସ ଘଟଣା ସ୍ଥଳରେ ପହଁଚି ମିତାଙ୍କୁ ଉଦ୍ଧାର କରି ସେଣ୍ଟ୍ରାଲ ହସ୍ପିଟାଲରେ ଭର୍ତ୍ତି କରିଥିଲା । ଅବସ୍ଥା ଗୁରୁତର ହେବାରୁ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ଏନେଇ ମିତାଙ୍କ ମାଆ କୋଲୀୟାରି ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଏହାସହ ଫେରାର ପ୍ରେମାନନ୍ଦକୁ ଖୋଜୁଛି ।
