ଅକ୍ଷୟ କୁମାର ଏବଂ ଅମୀର ଖାନଙ୍କୁ ନେଇ ଏମିତି କହିଲେ ’ସିକନ୍ଦର’ର ନିର୍ଦ୍ଦେଶକ

ନନ୍ଦିଘୋଷ ବ୍ୟୁରୋ: ସଲମାନ ଖାନଙ୍କ ଅଭିନୀତ ଫିଲ୍ମ ’ସିକନ୍ଦର’ ଚଳିତ ବର୍ଷ ଇଦରେ ରିଲିଜ ହେବାକୁ ଯାଉଛି । ଟିଜର ରିଲିଜ ହେବା ଦିନରୁ ଏହାକୁ ନେଇ ବେଶ ଚର୍ଚ୍ଚା ହେଉଛି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କି, ବଲିଉଡର ଭାଇଜାନଙ୍କ ଫିଲ୍ମକୁ ଦର୍ଶକେ ଚାହିଁ ରହିଥାନ୍ତି । ଆଉ ଏଭଳି ଏକ ଆକ୍ସନ ମୁଭି ଆସୁଥିବାବେଳେ ଏହାକୁ ନେଇ ଗଣମାଧ୍ୟମରେ ବେଶ ଚର୍ଚ୍ଚା ଆରମ୍ଭ ହୋଇଛି । ତେବେ ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି ପ୍ରସିଦ୍ଧ ସାଉଥ ଫିଲ୍ମର ନିର୍ଦ୍ଦେଶକ ଏ.ଆର. ମୁରୁଗାଦୋସ । ତେବେ ପୂର୍ବରୁ ଅନେକ ହିଟ ଫିଲ୍ମର ନିର୍ଦ୍ଦେଶନା ଭାର ସେ ସମ୍ଭାଳିଥିବାବେଳେ ସିକନ୍ଦର ମଧ୍ୟ ବକ୍ସ ଅଫିସରେ ରେକର୍ଡ କରିବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ଆଶା ରଖାଯାଇଛି । ସେପଟେ ଏହା ପୂର୍ବରୁ ବଲିଉଡର ଖିଲାଡ଼ି ଷ୍ଟାର ଅକ୍ଷୟ କୁମାର ଏବଂ ବଲିଉଡର ମିଷ୍ଟର ପରଫେକ୍ଟଙ୍କୁ ନେଇ ଏକ ପ୍ରତିକ୍ରିୟା ରଖିଛନ୍ତି ନିର୍ଦ୍ଦେଶକ । ଯାହାକି ତାଙ୍କ ଫ୍ୟାନ୍ସଙ୍କୁ ବେଶ ଖୁସି କରିବ ନିଶ୍ଚୟ ।

ସେ ଇଣ୍ଟରଭିୟୁରେ କହିଛନ୍ତି କି, ଗଜନୀ-୨ ବିଷୟରେ ଆମେ ଆଲୋଚନା କରୁଛୁ । ଯାହାର ହିନ୍ଦି ଭର୍ସନ ମଧ୍ୟ ରିଲିଜ୍ ହେବ । ଯେଉଁଥିରେ ଅମୀର ଖାନ ଅଭିନୟ କରିବେ । ଏବଂ ତାମିଲରେ ସୂର୍ଯ୍ୟ ଅଭିନୟ କରିବେ । ମାତ୍ର ଚଳିତ ବର୍ଷ ସିକନ୍ଦର ରିଲିଜ ହେବାକୁ ଥିବାବେଳେ ଏହା ଉପରେ ଅଧିକ ଫୋକସ ଦେଇ ଆମେ କାମ କରିଛୁ । ଆଗକୁ ଆଉ ଏକ ପ୍ରୋଜେକ୍ଟ ରହିଛି । ଏହାପରେ ଯାଇ ଆମେ ଅନ୍ୟ ଫିଲ୍ମ କରିବା ସମ୍ପର୍କରେ ଆଲୋଚନା କରିବୁ ବୋଲି କହିଛନ୍ତି । ତେବେ କହି ରଖୁଛୁ କି, ଗଜନୀ ଫିଲ୍ମ ଦର୍ଶକଙ୍କ ମହଲରେ ବେଶ ଆଦୃତ ହୋଇଥିଲା । ତେବେ ଏହା ଦ୍ବିତୀୟ ଭାଗକୁ ଦର୍ଶକେ ଚାହିଁ ବସିଥିଲେ । ଆଉ ଏବେ ନିର୍ଦ୍ଦେଶକ ଏକ ପ୍ରକାର ଗ୍ରୀନ ସିଗନାଲ ଦେଇଛନ୍ତି ।

ନିର୍ଦ୍ଦେଶକଙ୍କୁ ଅକ୍ଷୟ କୁମାରଙ୍କ ଫିଲ୍ମ ହଲିଡେ ବିଷୟରେ ମଧ୍ୟ ପଚରାଯାଇଥିଲା। ଥଲାପତି ବିଜୟ ଏହାର ତାମିଲ ସଂସ୍କରଣ ‘ଥୁପ୍ପାକ୍କି’ରେ କାମ କରିଥିଲେ। ସେ ଅକ୍ଷୟଙ୍କ ସହିତ ହଲିଡେର ସିକ୍ୱେଲ୍ ତିଆରି କରିବାକୁ ଇଚ୍ଛା ପ୍ରକାଶ କରିଥିଲେ। ସେ କହିଥିଲେ, “ସେତେବେଳେ ସ୍ଲିପର ସେଲର ଧାରଣା ବହୁତ ଅନନ୍ୟ ଥିଲା।” ମୋର କିଛି ଧାରଣା ଅଛି ଏବଂ ମୁଁ ଭବିଷ୍ୟତରେ ଅକ୍ଷୟ କୁମାରଙ୍କ ସହିତ ହଲିଡେ 2 କିମ୍ବା ଥୁପାକ୍କି 2 ତିଆରି କରିବି।