ଇନଷ୍ଟାରେ ଫଲୋର୍ସ ୫୬ ଲକ୍ଷ, ଭୋଟ୍ ମିଳିଲା ୧୪୬..

ନନ୍ଦିଘୋଷ ବ୍ୟୁରୋ: ରାଜନୀତି ମଇଦାନରେ ଫେଲ୍ ମାରିଲେ ଅଭିନେତା । ଇନଷ୍ଟାଗ୍ରାମ ଏବଂ ଫେସବୁକରେ ଯେଉଁ ଭଲ ପାଇବା ମିଳିଥିଲା ନିର୍ବାଚନୀ ମଇଦାନରେ କିନ୍ତୁ ଏହାର ପ୍ରଭାବ ଦେଖିବାକୁ ମିଳିନାହିଁ । ଶନିବାର ମହାରାଷ୍ଟ୍ର ନିର୍ବାଚନ ଫଳାଫଳ ପ୍ରକାଶ ପାଉଥିବାବେଳେ ଅଭିନେତା ଏଜାଜ ଖାନ ରାଜନୀତି ଗଣିତରେ ଫେଲ ମାରିଛନ୍ତି । ଶେଷ ଖବର ସୁଦ୍ଧା ୧୮ ରାଉଣ୍ଡରେ ସେ ମାତ୍ର ୧୪୬ ଖଣ୍ଡ ଭୋଟ୍ ପାଇଥିଲେ । ସବୁଠୁ ଆଶ୍ଚର୍ଯ୍ୟ କଥା ହେଉଛି, ଏଜାଜ୍ ଖାନଙ୍କର ଇନଷ୍ଟାଗ୍ରାମରେ ୫.୬ ମିଲିୟନ ଫଲୋୟର୍ସ ଥିବା ବେଳେ ଫେସବୁକରେ ଅଛନ୍ତି ୪.୧ ମିଲିୟନ ଫଲୋୟର୍ସ ।

ଭର୍ସୋଭା ଆସନରୁ ବିଗ୍ ବସର ଏକ୍ସ ପ୍ରତିଯୋଗୀ ଏଜାଜ ଖାନ ୧୮ ରାଉଣ୍ଡର ଗଣନା ପରେ ବି କେବଳ ୧୪୬ ଖଣ୍ଡ ଭୋଟ୍ ହାସଲ କରିପାରିଛନ୍ତି । ନୋଟାରୁ ବି ଏହି ସଂଖ୍ୟା ବହୁତ ପଛରେ ରହିଛି । ନୋଟାରେ ଏ ପର୍ଯ୍ୟନ୍ତ ୧୨୧୬ ଖଣ୍ଡ ଭୋଟ୍ ପଡ଼ିଛି । ନଭେମ୍ବର ୨୦ରେ ଏହି ଆସନରେ ୫୧.୨% ମତଦାନ ହୋଇଥିଲା ।

ତେବେ ଭୋଟ୍ ମାମଲାରେ ଏଜାଜ୍ ବହୁତ କଷ୍ଟରେ ମାତ୍ର ତିନି ଅଙ୍କ ଯାଏ ପହଞ୍ଚି ପାରିଛନ୍ତି । ଏହି ଆସନରେ ଶିବସେନା (ୟୁବିଟି) ପ୍ରାର୍ଥୀ ହାରୁନ ଖାନ ୬୧୯୫୮ ଭୋଟରେ ଆଗୁଆ ଥିବା ବେଳେ ବିଜେପିର ଭାରତୀ ଲଭେବର ୫୮୪୭୪ ଭୋଟ୍ ପାଇ ଦ୍ଵିତୀୟ ସ୍ଥାନରେ ଅଛନ୍ତି ।