ମାଲକାନଗିରି : ପ୍ରବଳ ବର୍ଷାରେ ଭୁଶୁଡ଼ିଲା ମାଲକାନଗିରି ଏୟାରପୋର୍ଟର ପାଚେରି। ଆଗରୁ ନିମ୍ନ ମାନର ନିର୍ମାଣ କାର୍ଯ୍ୟ ନେଇ ପୂର୍ବରୁ ଅଭିଯୋଗ ହୋଇଥିବା ବେଳେ ବିଗତ ଦିନରେ ମଧ୍ୟ ଅନେକ ଥର ଏହି ପାଚେରୀ ଭାଙ୍ଗି ମରାମତି ହୋଇଥିଲା। ଆଜି ପୁଣି ବର୍ଷା ଯୋଗୁଁ ପାଚେରୀ ଭାଙ୍ଗି ଯାଇଛି। ସେପଟେ ଲଗାଣ ବର୍ଷା ଯୋଗୁଁ ବୁଡ଼ିଲା ପୋଟେରୁ ପୋଲ। ପୋଟେରୁ ପୋଲ ଉପରେ ପ୍ରବାହିତ ହେଉଛି ବନ୍ୟାଜଳ। ମାଲକାନଗିରିରୁ କାଲିମେଳା ଯାତାୟାତ ଠପ ହୋଇଛି। ପୋଲର ଉଭୟ ପାର୍ଶ୍ବରେ ଅଟକିଛି ଗାଡ଼ି ମୋଟର। ୩୨୬ ନମ୍ବର ଜାତୀୟ ରାଜପଥରେ ଥିବା ଏହି ପୋଟେରୁ ପୋଲଟି ପ୍ରତିବର୍ଷ ବର୍ଷା ଦିନରେ ବୁଡ଼ିଯାଇଥାଏ। ଏହାର ଉଚ୍ଚତା ବୃଦ୍ଧି ପାଇଁ ନୂତନ ପୋଲ କାର୍ଯ୍ୟ ଆରମ୍ଭ ହୋଇଥିଲେ ହେଁ ଆଜି ଯାଏଁ ତାହା ସମ୍ପୂର୍ଣ୍ଣ ହୋଇନି। ଫଳରେ ନାନା ସମସ୍ୟାର ସମ୍ମୁଖୀନ ହେଉଛନ୍ତି ଲୋକେ ।
ମାଲକାନଗିରି ଜିଲ୍ଲାରେ ପ୍ରବଳ ବର୍ଷାକୁ ଦୃଷ୍ଟିରେ ରଖି ଆଜି ବନ୍ଦ ରଖାଯାଇଛି ଜିଲ୍ଲାର ସମସ୍ତ ସ୍କୁଲ ଓ ଅଙ୍ଗନବାଡି କେନ୍ଦ୍ର। ଛୁଟି ନେଇ ଘୋଷଣା କରିଥିଲେ ଜିଲ୍ଲାପାଳ। ମାଲକାନଗିରି ଦେଇ ଯାଇଥିବା ଜାତୀୟ ରାଜପଥରେ ଜମିଛି ପାଣି। ରାସ୍ତାରେ ପାଣି ଜମିଥିବାରୁ ଯାତାୟାତରେ ସମସ୍ୟା ଉପୁଜିବା ସହ ବିଭିନ୍ନ ଦୋକାନ ଓ ଘରେ ପଶିଛି ପାଣି।
