ନନ୍ଦିଘୋଷ ବ୍ୟୁରୋ : ବେସାମରିକ ବିମାନ ଚଳାଚଳ ମନ୍ତ୍ରାଳୟର ନିଷ୍ପତ୍ତି କ୍ରମେ ଆଜିଠାରୁ ହଟିବ ବିମାନ ଭଡ଼ା ଉପରେ ଲଗାଯାଇଥିବା କଟକଣା l ଗତବର୍ଷ ଡିସେମ୍ବରରେ ବିମାନ ଚଳାଚଳ କ୍ଷେତ୍ର ଲାଗି ଅସ୍ଥାୟୀ ଦର ନିୟନ୍ତ୍ରଣ ନିୟମ ଲାଗୁ ହୋଇଥିଲା l ତାହା ଆଜିଠାରୁ ଅନ୍ତ ଘଟିଛି l ମନ୍ତ୍ରାଳୟ ପକ୍ଷରୁ କୁହାଯାଇଛି- ଟିକେଟ ଦର ନିର୍ଦ୍ଧାରଣ ଉପରେ ଯେଉଁ କଟକଣା ଲାଗୁ ହୋଇଥିଲା ତାହାକୁ ହଟାଇଦିଆଯାଇଛି l ଇଣ୍ଡିଗୋ କ୍ଷେତ୍ରରେ ଦେଖାଦେଇଥିବ ଅଚଳାବସ୍ଥାକୁ ନିୟନ୍ତ୍ରଣ କରିବା ଲାଗି ଏହି ନିୟମ ଲାଗୁ ହୋଇଥିଲା l ଯାତ୍ରୀମାନଙ୍କ ସ୍ବାର୍ଥ ଦୃଷ୍ଟିରୁ ଏହି ପଦକ୍ଷେପ ନେଇଥିଲା ମନ୍ତ୍ରାଳୟ l ନୂଆ ନିଷ୍ପତ୍ତି ଅନୁସାରେ ଏଣିକି ବଜାର ସ୍ଥିତି ଓ ଚାହିଦା ଅନୁସାରେ ବିମାନ କମ୍ପାନି ଦର ନିର୍ଦ୍ଧାରଣ କରିପାରିବେ l ତେବେ ବିମାନ ଟିକେଟ ଭଡ଼ା ଯେପରି ଯଥାର୍ଥ ହେବ ସେଥିପ୍ରତି ଦୃଷ୍ଟି ଦେବାକୁ ପରାମର୍ଶ ଦିଆଯାଇଛି l ଏହା ସହ ଯାତ୍ରୀଙ୍କ ସ୍ବାର୍ଥ ପ୍ରତି ଧ୍ୟାନ ଦେଇ ଭଡ଼ା ନିର୍ଦ୍ଧାରଣ କରିବା ଲାଗି କୁହାଯାଇଛି l ଯଦି କୌଣସି ବିମାନ କମ୍ପାନି ଉଚିତ ଦରଠାରୁ ଅଧିକ ଦର ନିଅନ୍ତି ବା ମନଇଚ୍ଛା ଦର ବଢ଼ାନ୍ତି ତେବେ ତାହାକୁ ଗୁରୁତର ସହ ବିଚାର କରାଯାଇ ପଦକ୍ଷେପ ନିଆଯିବ ବୋଲି କୁହାଯାଇଛି l
