ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସଙ୍କ କିଭ୍ ଗସ୍ତ ସମୟରେ ଏୟାର ଷ୍ଟ୍ରାଇକ୍

କିଭ୍: ୟୁକ୍ରେନ ରାଜଧାନୀ କିଭ୍ ଉପରେ ଋଷର ଅଚାନକ ଏୟାରଷ୍ଟ୍ରାଇକ । ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସଙ୍କ କିଭ୍ ଗସ୍ତ ସମୟରେ ଏହି ଏୟାର ଷ୍ଟ୍ରାଇକ ହୋଇଛି । ଗତ ଏପ୍ରିଲ ମଧ୍ୟଭାଗରେ କିବରୁ ଦୂରେଇଥିବା ଋଷର ପୁଣି ଆକ୍ରମଣ ଆଶ୍ଚର୍ଯ୍ୟ କରିଛି । କିଭର ଏକ ସିଟି ସେଣ୍ଟର ଉପରେ ଏହି ଏୟାରଷ୍ଟ୍ରାଇକ ହୋଇଥିବାବେଳେ ୩ଜଣ ଆହତ ହୋଇଥିବା ସୂଚନା ମିଳିଛି । ତେବେ ଏହି ଏୟାରଷ୍ଟ୍ରାଇକରେ ଜାତିସଂଘ ଟିମ୍ ନିରାପଦ ଅଛନ୍ତି ବୋଲି କହିଛନ୍ତି ଜଣେ ମୁଖପାତ୍ର ।

କିଭ୍ ମେୟର କହିଛନ୍ତି- ସେଭଚେନକୋଭସ୍କିରେ ଏହି ଏୟାରଷ୍ଟ୍ରାଇକ ହୋଇଛି । ଏହି ଘଟଣାରେ ଗୁଟେରସ ବି ଚିନ୍ତାପ୍ରକଟ କରିଛନ୍ତି । ସେପଟେ ପୋର୍ଟସିଟି ମାରିୟୁପୋଲରେ ନାଗରିକଙ୍କ ଉଦ୍ଧାର ପ୍ରକ୍ରିୟା ଜାରି ରହିଛି ବୋଲି କହିଛନ୍ତି ଗୁଟେରସ । କିବ୍ ଗସ୍ତରେ ଆସିଥିବା ଗୁଟେରସ କହିଛନ୍ତି- ମାରିୟୁପୋଲରେ ଉଦ୍ଧାର କାର୍ଯ୍ୟ ଲାଗି ଜାତିସଂଘ ସମସ୍ତ ପ୍ରଚେଷ୍ଟା ଜାରି ରଖିଛି ।

ସେପଟେ କିବ୍ ଉପରେ ଏୟାର ଷ୍ଟ୍ରାଇକ ଘଟଣାକୁ ନିନ୍ଦା କରିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । କହିଛନ୍ତି ଋଷର ୫ଟି ରକେଟ ମାଡ଼ ଘଟଣା ଜାତିସଂଘର ଶାନ୍ତି ପ୍ରକ୍ରିୟାକୁ ଏକ ଧକ୍କା । ଯୁଦ୍ଧକୁ ୬୫ ଦିନ ପୂରିଥିବାବେଳେ ପୂର୍ବ ୟୁକ୍ରେନର ଦୋନବାସରେ ଋଷର ଜୋରଦାର ହମଲା ହୋଇଛି । ତେଣେ ମାରିୟୁପୋଲର ଆଜଭୋସ୍ତଲ ଷ୍ଟିଲପ୍ଲାଣ୍ଟରେ ଏବେ ବି ୟୁକ୍ରେନୀୟ ସୈନ୍ୟ ରହି ସଂଘର୍ଷ କରୁଥିବା ସୂଚନା ମିଳିଛି ।