ପୁଣି ଏକ ହାତୀ ଶାବକର ମୃତ୍ୟୁ, ସଠିକ୍ ସମୟରେ ଚିକିତ୍ସା କଲାନି ବନ ବିଭାଗ
ସମ୍ବଲପୁର: ପୁଣି ଏକ ହାତୀ ମୃତ । ଚିକିତ୍ସା ନପାଇ ଚାଲିଗଲା ହାତୀର ଜୀବନ । ବନ ବିଭାଗର ଅବହେଳା ଯୋଗୁଁ ନିରିହ ହାତୀ ଶାବକର ମୃତ୍ୟୁ ହୋଇଥିବା କୁହାଯାଇଛି ।ସମ୍ବଲପୁର ଜିଲ୍ଲାର ଧମା ରେଞ୍ଜ ତବଲୋଇ ସଂରକ୍ଷିତ ଜଙ୍ଗଲରୁ ଏକ ହାତୀ ଶାବକର ମୃତ ଦେହ ଉଦ୍ଧାର ହୋଇଛି । ହାତୀଟି ଅଢେଇ ବର୍ଷରୁ ୩ ବର୍ଷର ହେବ । କିଛି ଦିନ ପୂର୍ବରୁ ଏହି ହାତୀଟି ଅସୁସ୍ଥ ଥିବା ବନ ବିଭାଗ ଜାଣିବାକୁ ପାଇଥିଲା । ହାତୀଟିର ଶବ ବ୍ୟବଚ୍ଛେଦ ହୋଇସାରିଛି । ହାତୀଟିର ପାଟିରୁ ଅନ୍ତନଳୀ ପର୍ଯ୍ୟନ୍ତ ପଚି ଯାଇଥିବା ଜଣାପଡିଛି । ଯାହାକୁ କୋବାଲଡିସିସ ରୋଗ କୁହାଯାଏ । ଏହାହିଁ ହାତୀ ଶାବକର ମୃତ୍ୟୁର କାରଣ ବୋଲି କୁହାଯାଉଛି ।
ତେବେ ଏଠି ପ୍ରଶ୍ନ ଉଠୁଛି ବନ ବିଭାଗର କର୍ମଚାରୀ ମାନେ ଜାଣିଥିଲେ ହାତୀଟି ଅସୁସ୍ଥ ଅଛି, ତାହେଲେ କାହିଁକି ହାତୀଟିର ଚିକିତ୍ସା କଲେନି । ୧୦ ତାରିଖରେ ବନ କର୍ମଚାରୀ ମାନେ ଏହାର ଭିଡ଼ିଓ ମଧ୍ୟ ଉତ୍ତୋଳନ କରିଥିଲେ । ହେଲେ ଚିକିତ୍ସା କରିନଥିଲେ । ଯଦି ସଠିକ୍ ସମୟରେ ହାତୀଟିର ଚିକିତ୍ସା ହୋଇଥାନ୍ତା ହୁଏତ ହାତୀ ଶାବକଟି ବଂଚି ପାରିଥାନ୍ତା । ଏହା ପୂର୍ବରୁ ମଧ୍ୟ ମାର୍ଚ୍ଚ ୪ ତାରିଖରେ ଏହି ଅଞ୍ଚଳରେ ଏକ ଗୁଳି ବିଦ୍ଧ ହାତୀର ମୃତଦେହ ମିଳିଥିଲା ।
ରାଜ୍ୟରେ ହାତୀ ମୃତ୍ୟୁ ସଂଖ୍ୟା ଦିନକୁ ଦିନ ବଢ଼ୁଥିବା ବେଳେ ସରକାର ଏଥିପ୍ରତି ଅନେକ ପଦକ୍ଷେପ ନେଉଛନ୍ତି ସତ । ହେଲେ ପ୍ରଶାସନ ଓ ବିଭାଗୀୟ ଅଧିକାରୀଙ୍କ ଅବହେଳା ଯୋଗୁଁ ହାତୀଙ୍କ ଜୀବନ ଚାଲିଯାଉଛି । ଏହାପାଇଁ କାହାକୁ ଦାୟୀ କରାଯାଉ ନାହିଁ ବୋଲି ଅସନ୍ତୋଷ ମଧ୍ୟ ତେଜୁଛି ।
