ଏଭଳି ଏକ ପରମ୍ପରା, ପରିବାରର କାହାର ମୃତ୍ୟୁ ହେଲେ ମହିଳା କାଟି ଦିଅନ୍ତି ଆଙ୍ଗୁଠି
ନୂଆଦିଲ୍ଲୀ: ଦୁନିଆରେ ଅନେକ ଅଜବ ଘଟଣା ଦେଖିବାକୁ ମିଳେ । ପରମ୍ପରା ସବୁଠି ଭିନ୍ନ ଭିନ୍ନ । କିନ୍ତୁ ସାଧାରଣ ପରମ୍ପରା କଥା ଛାଡ଼ନ୍ତୁ ଯଦି ଆଖି ସାମ୍ନାରେ କିଛି ଅଜବ ପରମ୍ପରା ଦେଖିବାକୁ ମିଳେ ଆପଣଙ୍କ ଝାତି ଉଠିବ । ଏଇ ଯେମିତି କେରଳରେ ବୟସ ହୋଇଗଲେ ବୃଦ୍ଧକୁ ଜବରଦସ୍ତି ମାରି ଦିଆଯାଏ । ଠିକ୍ ସେହିଭଳି ଏକ ପରମ୍ପରା ବିଷୟରେ ଜାଣିଲେ ଆପଣ ଆଶ୍ଚର୍ଯ୍ୟ ହେବେ । ଏଠାରେ ପରିବାର ସଦସ୍ୟଙ୍କ ମୃତ୍ୟୁ ହେଲେ ମହିଳାମାନଙ୍କର ଆଙ୍ଗୁଠି କାଟି ଦିଆଯାଏ ।
ଏହି ରୀତିନୀତି ଅତ୍ୟନ୍ତ ଆଶ୍ଚର୍ଯ୍ୟକର । ଘଟଣା ଘଟେ ଇଣ୍ଡୋନେସିଆରେ । ପରମ୍ପରା ନାଁରେ ଏକ ଦଣ୍ଡବିଧାନ ନୁହେଁ ତ ? ଯଦି ଘରର କୌଣସି ସଦସ୍ୟଙ୍କ ମୃତ୍ୟୁ ହୁଏ ତେବେ ଘରର ଜଣେ ମହିଳାଙ୍କ ଆଙ୍ଗୁଠି କାଟିଦିଆଯାଏ ।
ଗଣମାଧ୍ୟମ ସୂଚନା ଅନୁଯାୟୀ, ଦାନି ଜନଜାତିର ମହିଳାମାନଙ୍କୁ ଭାବପ୍ରବଣ ଯନ୍ତ୍ରଣା ବ୍ୟତୀତ ଶାରୀରିକ ଯନ୍ତ୍ରଣା ମଧ୍ୟ ସାମ୍ନା କରିବାକୁ ପଡିଥାଏ । ଯେତେବେଳେ ସେମାନଙ୍କର ପ୍ରିୟଜନଙ୍କ ମୃତ୍ୟୁ ହୁଏ, ଏହି ଇଣ୍ଡୋନେସିଆ ଜନଜାତିର ମହିଳା ସଦସ୍ୟମାନେ ସେମାନଙ୍କର ଆଙ୍ଗୁଠିର ଉପର ଅର୍ଦ୍ଧ ଭାଗକୁ କାଟି ଦିଅନ୍ତି । ବିଶ୍ୱାସ କରାଯାଏ ଯେ ଆଙ୍ଗୁଠି କାଟିବା ଦ୍ୱାରା ଆତ୍ମା ମୃତ ବ୍ୟକ୍ତିଙ୍କଠାରୁ ଦୂରେଇ ରହିଯାଏ ।
ଏହା ମଧ୍ୟ ଶୋକର ଯନ୍ତ୍ରଣା ଅଟେ । କେବଳ ଏତିକି ନୁହେଁ, କିଛି ପିଲାଙ୍କ ଆଙ୍ଗୁଠିକୁ ସେମାନଙ୍କ ମା କାଟି ଦିଏ । ଏହି ପ୍ରଥାକୁ ଇକିପାଲିନ୍ କୁହାଯାଏ । ଆଙ୍ଗୁଠି କଟାଯିବା ଏହି ଅସାଧାରଣ ଅଭ୍ୟାସକୁ ଇଣ୍ଡୋନେସିଆ ସରକାର କିଛି ବର୍ଷ ପୂର୍ବେ ନିଷିଦ୍ଧ କରିଥିଲେ । ହେଲେ ଏବେବି ଅନେକ ସ୍ଥାନରେ ଗୁପ୍ତ ଭାବେ ଏହି ପ୍ରଥା ଚାଲୁ ରହିଛି ।
