କଳିଙ୍ଗ ପରେ ବିର୍ସା ମୁଣ୍ଡାରେ ବିବାଦ: ଟ୍ରାକ ଉପରେ ନାଚିଲେ ଅଭିନେତ୍ରୀ, ଭିଡ଼ ନିୟନ୍ତ୍ରଣରେ ପ୍ରଶାସନ ଫେଲ୍

ରାଉରକେଲା: ଇଏ କି କ୍ରୀଡ଼ା ପ୍ରତିବଦ୍ଧତା ? କଳିଙ୍ଗ ପରେ ବିର୍ସା ମୁଣ୍ଡାରେ ବିବାଦ । ଟ୍ରାକ ଉପରେ ନାଚିଲେ ଅଭିନେତ୍ରୀ । ଭିଡ଼ ନିୟନ୍ତ୍ରଣରେ ପ୍ରଶାସନ ଫେଲ୍ । କଳିଙ୍ଗ ଷ୍ଟାଡିୟମର ଆଥଲେଟିକ ଟ୍ରାକ ଉପରେ ଗାଡି ବୁଲିବା ପରେ ରାଉରକେଲା ବିର୍ସା ମୁଣ୍ଡା ହକି ଷ୍ଟାଡିୟମରେ ହକି ଟର୍ଫ ଉପରେ କଳାକାରମାନେ ନୃତ୍ୟ ପ୍ରଦର୍ଶନ କରୁବାକୁ ନେଇ ସବୁଠି ହୋଇଛି ସମାଲୋଚନା । ରାଉରକେଲା ବିର୍ସା ମୁଣ୍ଡା ହକି ଷ୍ଟାଡିୟମରେ ହିରୋ ହକି ଇଣ୍ଡିଆ ପୁରୁଷ ଲିଗର ଫାଇନାଲ ମ୍ୟାଚରେ ବଲିଉଡ ଅଭିନେତ୍ରୀ ସାରାଅଲ୍ଲୀ ଖାନ ଓ ତାଙ୍କ ଟିମ ଟର୍ଫ ଉପରେ ନୃତ୍ୟ ପ୍ରଦର୍ଶନ କରିବା ଘଟଣାକୁ ହକି ଖେଳାଳି, ହକି ପ୍ରେମୀ ଓ ବରିଷ୍ଠ ହକି କୋଚ ନାପସନ୍ଦ କରିଛନ୍ତି । ବିଶ୍ବର ବୃହତ୍ତ ଷ୍ଟାଡିୟମ ଭାବେ ସାରା ବିଶ୍ବର ରହିଛି ଏହାରି ଉପରେ ନଜର । ଷ୍ଟାଡିୟମର ରକ୍ଷଣାବେକ୍ଷଣ କିପରି ହେଵ ସେଥିପ୍ରତି ଧ୍ୟାନ ଦେଵା ବଦଳରେ ହକି ଟର୍ଫ ଉପରେ କଳାକାର ମାନେ ନୃତ୍ୟ ପ୍ରଦର୍ଶନ କରିବା ଘଟଣାକୁ ବରିଷ୍ଠ ହକି କୋଚ ନାପସନ୍ଦ କରିଛନ୍ତି ।

ରାଉରକେଲା ବିର୍ସା ମୁଣ୍ଡା ହକି ଷ୍ଟାଡିୟମରେ ମୁଖ୍ୟମନ୍ତ୍ରୀ ଓ କ୍ରୀଡା ମନ୍ତ୍ରୀଙ୍କ ଉପସ୍ଥିତିରେ ହକି ଟର୍ଫ ଉପରେ ବଲିଉଡ ଅଭିନେତ୍ରୀ ସାରା ଅଲ୍ଲୀ ଖାନ ଓ ତାଙ୍କ ଟିମ ନୃତ୍ୟ ପ୍ରଦର୍ଶନ କରିବା ଘଟଣାକୁ କ୍ରୀଡ଼ାପ୍ରେମୀ, ସହରବାସୀ ଓ ବୁଦ୍ଧିଜୀବୀ ମାନେ ମଧ୍ୟ ନାପସନ୍ଦ କରିଛନ୍ତି । ସାରା ଅଲ୍ଲି ଖାନଙ୍କ ନୃତ୍ୟ ପ୍ରଦର୍ଶନ ଦେଖିବା ପାଇଁ ଷ୍ଟାଡିୟମ୍ ଵାହାରେ ବ୍ୟାପକ ବିଶୃଙ୍ଖଳା ହୋଇଥିଲା । ହାତରେ ହକି ଟିକେଟ ଥାଇ ମଧ୍ୟ ହଜାର ହଜାର ଦର୍ଶକ ଷ୍ଟାଡିୟମ ଭିତରକୁ ପସି ନପାରି ଧସ୍ତାଧସ୍ତି କରିବା ସହ ଦୁଇ ନମ୍ଵର ଗେଟ ଭାଙ୍ଗି ଧସେଇ ପଶିଥିଲେ । ସରକାର ଓ ପ୍ରଶାସନର ପରିଚାଳନାଗତ ତୃଟି ଯୋଗୁଁ ହଜାର ହଜାର ଦର୍ଶକ ଅସୁବିଧାର ସମ୍ମୁଖୀନ ହୋଇଥିବା ଅଭିଯୋଗ କରିଥିଲେ । ସରକାରଙ୍କ ପରିଚାଳନାଗତ ତ୍ରୁଟି ଓ ଭିଡ ନିୟନ୍ତ୍ରଣ କରିବାରେ ପୋଲିସ ଏବଂ ପ୍ରଶାସନର ଅବ୍ୟବସ୍ଥା ଯୋଗୁଁ ଵହୁ ମହିଳା ଓ ଛୋଟ ଛୋଟ ଛୁଆ ଦଳା ଚକଟାରେ ପଡି ଆହତ ମଧ୍ୟ ହୋଇଥିବା ଅଭିଯୋଗ ହୋଇଛି ।