ଲରେନ୍ସ ବିଷ୍ଣୋଇ ଟାର୍ଗେଟରେ ବଡ଼ କମେଡିଆନ

ନନ୍ଦିଘୋଷ ବ୍ୟୁରୋ: ଏନସିପି ଅଜିତ ପାୱାର ଗୋଷ୍ଠୀ ନେତା ବାବା ସିଦ୍ଦିକି ହତ୍ଯାକାଣ୍ଡ ଘଟଣାର ତଦନ୍ତ ବେଳେ ବାହାରିବାରେ ଲାଗିଛି ସଂଘାତିକ ତଥ୍ୟ। ଅଭିଯୁକ୍ତଙ୍କ ପଚରାଉଚରରୁ ମିଳିଛି ଗ୍ଯାଙ୍ଗଷ୍ଟାର ଲରେନ୍ସ ବିଷ୍ଣୋଇର ଟାର୍ଗେଟରେ କିଏ କିଏ ଅଛନ୍ତି। ଟାର୍ଗେଟରେ ବଲିଉଡ ଇଣ୍ଡଷ୍ଟ୍ରିର ଜଣେ ବଡ଼ କମେଡିଆନ ଥିବା ପୋଲିସ ସୂଚନା ଦେଇଛି। କମେଡିଆନ ଜଣକ ବିଗବସ୍ ରିୟଲିଟି ସୋ କମ୍ପିଟିସନ ଜିତିଛନ୍ତି।ଏଥିରୁ ଲରେନ୍ସଙ୍କ ଟାର୍ଗେଟରେ କମେଡିଆନ ମୁନବ୍ବର ଫାରୁକି ଥିବା ସନ୍ଦେହ କରାଯାଉଛି। ମୁନବ୍ବର ଗତ ସିଜନର ବିଗବସ ବିଜେତା। ଲରେନ୍ସ ବିଷ୍ଣୋଇ ଟାର୍ଗେଟରେ ଏନସିପି ନେତା ବାବା ସିଦ୍ଦିକୀଙ୍କ ପୁଅ ଜିଶନ ସିଦ୍ଦିକି ଥିବା ମଧ୍ୟ ପୋଲିସ ସୂତ୍ରରୁ ଜଣାପଡିଛି।

ପଂଜାବୀ ସିଙ୍ଗର ସିଦ୍ଦୁ ମୁସେୱାଲାଙ୍କ ହତ୍ଯାପରେ ଗ୍ଯାଙ୍ଗଷ୍ଟର ଲରେନ୍ସ ବିଷ୍ଣୋଇ ଚର୍ଚ୍ଚାର ଘେରକୁ ଆସିଥିଲା। ଏବେ ବାବା ସିଦ୍ଦିକିଙ୍କ ମୃତ୍ଯୁ ପରେ ଲରେନ୍ସକୁ ନେଇ ପୁଣିଥରେ ଚର୍ଚ୍ଚା ଆରମ୍ଭ ହୋଇଛି। ଲରେନ୍ସ ଆନ୍ତର୍ଜାତିକ ସ୍ତରରେ ଗ୍ଯାଙ୍ଗ ଚଳାଉଥିବା ଅଭିଯୋଗ ହୋଇଛି। ଲରେନ୍ସ ନେଟୱର୍କରେ ଦେଶରେ ୭ଶହରୁ ଅଧିକ ସୁଟର ରହିଥିବା ତଦନ୍ତରୁ ଜଣାପଡିଛି। ସେପଟେ ଗତକାଲି ବାବା ସିଦ୍ଦିକି ହତ୍ଯା ଘଟଣାରେ ତୃତୀୟ ଅଭିଯୁକ୍ତ ଗିରଫ କରିଥିଲା ପୋଲିସ। ଏହି ହତ୍ଯାକାଣ୍ଡରେ ମୋଟ ୬ ଅଭିଯୁକ୍ତଙ୍କୁ ଚିହ୍ନ କରାଯାଇଛି। ଏବେସୁଦ୍ଧା ୩ ଅଭିଯୁକ୍ତ ଧରା ପଡିଛନ୍ତି। ଗତ ୧୨ ତାରିଖରେ ପୁଅ ଜିସାନଙ୍କ କାର୍ଯ୍ୟାଳୟ ଆଗରେ ବାବା ସିଦ୍ଦିକିଙ୍କୁ ଗୁଳିମାଡ଼ କରିଥିଲେ ଦୁର୍ବୃତ୍ତ ।